ރާއްޖޭގައި ވަޒީފާ އަދާކުރާ ބިދޭސީންގެ މުސާރަ ބެންކު އެކައުންޓަށް ޖަމާކުރަން މަޖުބޫރުކޮށްފިއެވެ.

ހޯމް މިނިސްޓްރީން މިއަދު ދިވެހިރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވައިދަށް ގެނައި އިސްލާހުގައި ވަނީ،ރާއްޖޭގައި ވަޒީފާ އަދާކުރާ ބިދޭސީންގެ މުސާރަ ދެން ޖަމާކުރަން ޖެހޭނީ، މަރުކަޒީ ބެންކު (އެމްއެމްއޭ)ގައި ރަޖިސްޓްރީކޮށްފައިވާ ނުވަތަ އެ އޮތޯރިޓީން ހުއްދަ ދީފައިވާ އެ މުވައްޒަފެއްގެ ބެންކު އެކައުންޓަށް ކަމަށެވެ.

Ad by Hajj Corporation

މި ގަވައިދަށް އަމަލުކުރަން ފަށާނީ، މިއަދުން ފެށިގެން 30 ދުވަހުގެ ފަހުންނެވެ. ބިދޭސީންގެ މުސާރަ ބޭންކް އެކައުންޓަށް ޖަމާކުރަން ޖެހޭ ގޮތަށް ގާނޫނުން ލާޒިމް ކުރީ ބިދޭސީންގެ އަތުން ރެމިޓެންސް ޓެކްސް ނެގުމަށެވެ. ބިދޭސީންގެ އަތުން ރެމިޓެންސް ޓެކްސްގެ ގޮތުގައި ނަގަނީ ބޭރަށް ފޮނުވާ ފައިސާގެ ތިން އިންސައްތަ އެވެ.

ރާއްޖޭގެ ވަޒީފާގެ ބާޒާރުގައި ބިދޭސީންނަށް ބަރޯސާވެފައިވާ މިންވަރު ދަނީ އިންތިހާއަށް އިތުރުވަމުންނެވެ. އެހެންކަމުން، ދިވެހިންނަށް ވަޒީފާގެ ފުރުސަތުތައް ފަހިކޮށްދީ، ވަޒީފާގެ މާހައުލުގައި ދިވެހިންގެ ބައިވެރިވުން އިތުރުކުރުމަށްޓަކައި މިހާރުން ފެށިގެން ދުރުރާސްތާގެ ޕްލޭންތަކެއް ހަދަންޖެހެއެވެ. މީގެ އިތުރުން، ބިދޭސީން ވަޒީފާ އަދާކުރާ ދާއިރާތަކަށް ބަލައިން ތައުލީމީ ނިޒާމުގެ ތެރެއިން ޓެކްނޮލޮޖީއާއި، ހުނަރާއި، ވިޔަފާރީގެ އުކުޅުތައް ދަންނަ ގާބިލު ދިވެހި މަސައްކަތްތެރި ޖީލެއް ބިނާކުރެވޭފަދަ ގޮތަކަށް ކަންކަން ބައްޓަން ކުރަންޖެހެ އެވެ.