އިސްލާމިކް މިލިޓަރީ ކައުންޓަރ ޓެރަރިޒަމް ކޯލިޝަން (އައި.އެމް.ސީ.ޓީ.ސީ) އިން އިންތިޒާމްކޮށްގެން "އިމާމުންނާއި ވާޢިޡުންގެ ޤާބިލުކަން އިތުރުކުރުން" ގެ ނަމުގައި ބާއްވާ ތަމްރީނު ޕްރޮގްރާމް މިއަދު މާލޭގައި ފަށައިފިއެވެ.

މި ޕްރޮގްރާމަކީ އައި.އެމް.ސީ.ޓީ.ސީގެ "ވަސަތާ" ސްޓްރެޓެޖިކް އިނީޝިއޭޓިވްގެ ދަށުން ހިންގޭ ޕްރޮގްރާމެކެވެ.

މި ޕްރޮގްރާމުގައި ދިވެހިރާއްޖޭގެ އެކި ކަންކޮޅުތަކުން ޚާއްޞަކޮށް ހޮވާލެވިފައިވާ އިމާމުންނާއި، ވާޢިޡުންނާއި އަދި ޚަތީބުން ބައިވެރިވެއެވެ.

ޕްރޮގްރާމް ފެށުމުގެ ރަސްމިއްޔާތުގައި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރަފީޢު އަދި އައި.އެމް.ސީ.ޓީ.ސީގެ ސެކްރެޓަރީ ޖެނެރަލް މޭޖަރ ޖެނެރަލް މުޙައްމަދު ބިން ސަޢީދު އަލް-މުޣައިދީ ބައިވެރިވެވަޑައިގެންނެވިއެވެ.

މި ރަސްމިއްޔާތުގައި އިސްލާމީ ކަންތައްތަކާބެހޭ ވަޒީރު ވިދާޅުވީ، މި ތަމްރީނު ޕްރޮގްރާމަކީ ޓެރަރިޒަމާއި ހައްދުފަހަނައަޅާދިއުމާ ބެހޭގޮތުން ޞައްޙަ މަޢުލޫމާތު ފޯރުކޮށްދިނުމަށް ބާއްވާ މުހިންމު ޕްރޮގްރާމެއް ކަމަށެވެ. އަދި ޓެރަރިޒަމަކީ އެއްވެސް ދީނަކާ ގުޅުމެއް ނެތް ފިކުރީ ބައްޔެއް ކަމަށާއި، އޭގެ ފަރުވާއަކީ އިސްލާމްދީނުގެ އުސޫލުތަކުގެ މައްޗަށް ބިނާކޮށް ޞައްޙަ ޢިލްމާއި މަޢުލޫމާތު ފޯރުކޮށްދިނުން ކަމުގައި ވިދާޅުވިއެވެ.

ވަޒީރު އިތުރަށް ވިދާޅުވީ، ސަޢޫދީ ޢަރަބިއްޔާއަކީ ޓެރަރިޒަމާ ދެކޮޅަށް މަސައްކަތް ކުރުމުގައި ފުޅާ ތަޖުރިބާއާއި ހުނަރު ލިބިފައިވާ ޤައުމެއް ކަމަށާއި، މިކަމުގައި ދިވެހިރާއްޖެއާއި އެހެން ޤައުމުތަކަށް ވެސް އެ ޤައުމުގެ ފަރާތުން ވަރަށް ބޮޑު މަންފާއެއް ލިބިގެންދާނެ ކަމަށެވެ. އަދި ދިވެހިރާއްޖެ ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ ދަށުން ޓެރަރިޒަމާއި ހައްދުފަހަނައަޅާދިއުމާ ދެކޮޅަށް މަސައްކަތްތައް ކުރަމުން ގެންދާ ކަމަށް ވިދާޅުވިއެވެ.

މި ރަސްމިއްޔާތުގައި އައި.އެމް.ސީ.ޓީ.ސީގެ ސެކްރެޓަރީ ޖެނެރަލް ދެއްކެވި ވާހަކާގައި ވިދާޅުވީ، މި ތަމްރީނު ޕްރޮގްރާމުން ދައްކުވައިދެނީ ޓެރަރިޒަމާ ދެކޮޅަށް މަސައްކަތްކުރުމަކީ ހަމައެކަނި އަސްކަރީ ގޮތުން ކުރެވޭ ކަމެއް ނޫން ކަމަށެވެ. މިއީ އެކި ދާއިރާތަކުން ކުރެވޭ ކަމެއް ކަމަށާއި، އޭގެ ތެރޭގައި ހައްދުފަހަނައަޅާފައިވާ ފިކުރުތަކާ ދެކޮޅަށް ރަނގަޅު ވިސްނުމާއި ބުރަދަންހުރި ޙުއްޖަތްތަކުން ކުރިމަތިލުން ހިމެނޭ ކަމަށް ވިދާޅުވިއެވެ.

5 ދުވަހުގެ މުއްދަތަށް ކުރިއަށްދާ މި ޕްރޮގްރާމުގައި ހިމެނެނީ:

- ހައްދުފަހަނައަޅާފައިވާ ޖަމާޢަތްތަކުން ބޭނުންކުރާ ޕްރޮޕެގަންޑާގެ އުކުޅުތައް

- އަސަރުފޯރުވަނިވި ޢާންމު ވާހަކަދެއްކުމުގެ އަސާސްތައް

- މުޢާމަލާތުކުރުމުގެ ހުނަރުތައް

- މެދުމިނުގެ އަދި ހަމަހަމަކަމުގެ މަފްހޫމުތައް

- ކާމިޔާބު ވަޢުޡު ތަޖުރިބާތައް ޙިއްޞާކުރުން

މި ޕްރޮގްރާމަކީ އައި.އެމް.ސީ.ޓީ.ސީން މެންބަރު ޤައުމުތަކާއެކު ފިކުރީ އަދި ސަލާމަތީ ދެ ދާއިރާ އެކުލެވޭ ޖުމްލަ ސްޓްރެޓެޖީއެއްގެ ދަށުން ޓެރަރިޒަމާ ދެކޮޅަށް ކުރަމުންދާ މަސައްކަތްތަކުގެ ތެރެއިން ހިންގޭ ޕްރޮގްރާމެކެވެ. މި މަސައްކަތްތަކުގެ ތެރޭގައި ޓެރަރިޒަމަށް ފައިނޭންސްކުރުމާއި މަނީ ލޯންޑަރިންގ ހުއްޓުވުމާ ބެހޭގޮތުން ހޭލުންތެރިކަން އިތުރުކުރުމަށް ހިންގޭ އެކިއެކި އިނީޝިއޭޓިވްތަކާއި، ހައްދުފަހަނައަޅާފައިވާ ފިކުރުތަކާ ކުރިމަތިލުމަށް ވާޢިޡުންނަށް ޒަމާނީ ވަސީލަތްތަކާއި އުކުޅުތައް ދަސްކޮށްދިނުން ހިމެނެއެވެ.