ޑެންގީ ހުން ޖެހިގެން ރިޕޯޓު ކުރި އަދަދު މިދިޔަ އޭޕްރީލް މަހު މައްޗަށް ގޮސްފައިވާ ކަމަށް ސިއްހީ ވުޒަރާއިން ބުނެފިއެވެ.

ސިއްޚީ ވުޒާރާއިން ޢާންމުކުރި ތަފާސްހިސާބުތަކުން ދައްކާ ގޮތުން، ޑެންގީ ހުން ޖެހިގެން އޭޕްރީލް މަހު 124 ކޭސް ވަނީ ރިޕޯޓުކޮށްފައެވެ. މިއީ މި އަހަރުގެ ވޭތުވެ ދިޔަ މަސްތަކާއި އަޅާ ބަލާއިރު، 65.33 އިންސައްތައިގެ އިތުރު އަދަދެކެވެ. އެގޮތުން މި އަހަރުގެ ޖަނަވަރީ މަހު މި ބަލި ޖެހިގެން 75 ފަހަރު ވަނީ ރިޕޯޓުކޮށްފައެވެ. ފެބްރުއަރީ މަހު އިތުރު 80 ކޭސް ރިޕޯޓުކޮށްފައިވާ އިރު، މާރިޗު މަހު 73 ރިޕޯޓުކޮށްފައިވާ ކަމަށް އެ ވުޒާރާއިން މައުލޫމާތު ދެއެވެ.

Ad by Hajj Corporation

މިއާއެކު، މި އަހަރުގެ މިހާތަނަށް އެންމެ ގިނައިން ޑެންގީ ހުން ޖެހިގެން ރިޕޯޓު ކޮށްފައިވަނީ، މާލެ ސަރަހައްދުގެ އިތުރުން ރ.، އަދި އއ. އަތޮޅުން ކަމަށް ވުޒާރާއިން މަުލޫމާތު ދެއެވެ. އެގޮތުން، މިހާތަނަށް މާލެ ސަރަހައްދުން 134 ކޭސް ރިޕޯޓުކޮށްފައިވެއެވެ. އަދި ރ. އަތޮޅުން 57 ކޭސް ރިޕޯޓުކޮށްފައިވާ އިރު، އއ. އަތޮޅުން 40 ރިޕޯޓު ލިބިފައިވާ ކަމަށް ވުޒާރާއިން ބުނެއެވެ.

ޑެންގީ ހުމުން ރައްކާވުމަށް ހެލްތް ޕްރޮޓެކްޝަން އޭޖެންސީ (އެހްޕީއޭ) އިން ވަނީ، މަދިރި އާލާވާ ތަންތަން ނައްތާލުމަށް، އެފަދަ ތަންތަން ހިއްކައި ސާފުކުރުމަށް އިލްތިމާސްކޮށްފައެވެ.