ފަސް ޤައުމަކުން، އެއިން ކޮންމެ ޤައުމަކުން އަހަރުގެ މިހައިތަނަށް ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އާންމުކުރި ތަފާސް ހިސާބަށް ބަލާއިރު ރާއްޖެއަށް މި އަހަރުގެ މިހާތަނަށް ޖުމްލަ 1.4 މިލިއަން ފަތުރުވެރިން ވަނީ ޒިޔާރަތްކޮށްފައެވެ. މި އަދަދަކީ މިދިޔަ އަހަރުގެ މި މުއްދަތުގައި ޒިޔާރަތްކުރި 1.2 މިލިއަން ފަތުރުވެރިންނަށްވުރެ 10 ޕަސެންޓް އިތުރު އަދަދެކެވެ.

މި މުއްދަތުގައި ފަސް ޤައުމަކުން، އެއިން ކޮންމެ ޤައުމަކުން އަހަރުގެ މިހައިތަނަށް ލައްކައަކަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.

އެ ޤައުމުތަކަކީ، ޗައިނާ، ރަޝިޔާ، އިނގިރޭސިވިލާތް، އިޓަލީވިލާތް އަދި ޖަރުމަނު ވިލާތެވެ.

އަހަރުގެ މިހާތަނަށް އެންމެ ގިނައިން ފަތުރުވެރިން އައި 10 ޤައުމު

1. ޗައިނާ - 207،700 ފަތުރުވެރިން
2. ރަޝިއާ - 154،100 ފަތުރުވެރިން
3. އިނގިރޭސިވިލާތް - 121،900 ފަތުރުވެރިން
4. އިޓަލީ - 103،700 ފަތުރުވެރިން
5. ޖަރުމަނު - 100،400 ފަތުރުވެރިން
6. އިންޑިއާ - 85،800 ފަތުރުވެރިން
7. އެމެރިކާ - 48،100 ފަތުރުވެރިން
8. ފްރާންސް - 40،100 ފަތުރުވެރިން
9. ސްޕެއިން - 31،800 ފަތުރުވެރިން
10. ސްވިޓްޒަލޭންޑް - 26،400 ފަތުރުވެރިން

ރާއްޖެއަށް އަހަރުގެ މިހާތަނަށް އެވަރެޖްކޮށް ދުވާލަކު 5،400 ފަތުރުވެރިން ޒިޔާރަތްކުރާކަމަށް ޓޫރިޒަމް މިނިސްޓްރީން އާންމުކުރި ތަފާސް ހިސާބުން އެނގެއެވެ.

ޓޫރިޒަމް ސިނާއަތް ކުރިއަރުވައި، ތަރައްގީކުރުމަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ވަރަށް އިސްކަމެއް ދެއްވައިގެން ކުރަށްވަމުން ގެންދަވާ މަސައްކަތެކެވެ.