ކުރިއަށް އޮތް 20 އަހަރު ދުވަހުގެ ޤައުމީ ތަރައްގީގެ މާސްޓާ ޕްލޭން އެކުލަވާލުމުގެ މަސައްކަތް ފެށުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

އެ މަސައްކަތް ފެށުމަށް ނިންމެވިކަން އެމަނިކުފާނު އިއުލާނުކުރެއްވީ، މިއަދު ރައީސް އޮފީހުން ސޯޝަލް މީޑިޔާއަށް ދޫކުރި ވީޑިޔޯ މެސެޖެއްގައެވެ.

އެ މެސެޖުގައި ރައީސް ވިދާޅުވީ، އިއްޔެގެ ކެބިނެޓު ބައްދަލުވުމުގައި، ރާއްޖޭގެ ކުރިއަށް އޮތް 20 އަހަރުގެ ޤައުމީ ތަރައްގީގެ މާސްޓާ ޕްލޭން އެކުލަވާލުމުގެ މަސައްކަތް ފެށުމަށް ނިންމާފައިވާ ކަމަށާއި، އެ މަސައްކަތް ކުރާނީ ރައްޔިތުންގެ ވެސް ބައިވެރިވުން އެކަމުގައި ހިމެނޭ ގޮތުން ކަމަށެވެ. އަދި އެ މަސައްކަތް ކުރާނީ ރައްޔިތުން، ޤައުމީ ތަރައްގީ ބައްޓަން ކުރަން ބޭނުންވާ ގޮތަށް ކަމަށް ރައީސް ވިދާޅުވިއެވެ.

ސިނަމާލެ ބުރިޖު -- ފޮޓޯ/ ޓްވިޓާ

ރައީސް ވިދާޅުވީ، އެ މަސައްކަތުގައި ރާއްޖޭގެ ސިޔާސީ ޕާޓީތަކާއި، ޖަމިއްޔާތަކާއި، އެކިއެކި ސްޓޭލް ހޯލްޑަރުންނާއި، ތަޖުރިބާކާރުންނާއި އަދި ކަމުވޮށިގެންވާ ބޭފުޅުންގެ ޚިޔާލު ވެސް ހިމެނޭނެ ކަމަށެވެ. އަދި އެ ޕްލޭން ވާނީ، ވަކި ގާނޫނަކުން ގާނޫނީ ބާރުވެރިކަން އެކަމަށް ލިބޭނެ ޕްލޭނަކަށް ކަމަށް ރައީސް ވިދާޅުވިއެވެ.

20 އަހަރު ދުވަހުގެ ގައުމީ ތަރައްގީގެ ޕްލޭން ހެދުމުގެ ވާހަކަ، ގައުމީ ތަރައްގީގެ ޕްލޭން ހަދާނެ ގޮތާއި އެކަން ކުރިއަށް ގެންދާނެ ގޮތުގެ ނިންމުން އިއްޔެގައި އަޅުގަނޑުމެން ނިންމުން. އިރާދަކުރެއްވިއްޔާ ކުރިއަށް އޮތް އެ އަހަރު ދުވަހުގެ ތެރޭގައި ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް އަދި ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާއި، އެކިއެކި ސްޓޭކް ހޯލްޑަރުންނާއި، އެކިއެކި އެކްސްޕާޓުންނާއި، ހުރިހާ ފަރާތްތަކެއް ހިމެނޭ ގޮތަށް ވަރަށް ފުރިހަމަ ބައިވެރިވުމާއި މަޝްވަރާއާއެކީގައި، ގައުމީ ތަރައްގީގެ މާސްޓާ ޕްލޭނެއް ކުރިއަށް އޮތް 20 އަހަރު ދުވަހަށް އިރާދަކުރެއްވިއްޔާ ތަރައްގީކުރުމުގެ މަސައްކަތް މި ފަށާނީ. އަދި މި ޕްލޭނަކީ އަޅުގަނޑު ހަމަ ވައުދުވީ ގޮތަށް، އެ ޕްލޭނަށް ގާނޫނީ ބާރުވެރިކަން، ގާނޫނީ ހިމާޔަތްތެރިކަން ލިބިގެންދާ ޕްލޭނަކަށް ހެދުމަށްޓަކައި، ގާނޫނު އަސާސީއާއި ގާނޫނަށް ވަކިން ޚާއްސަކޮށް މިކަމަށް ހަދާ ގާނޫނަކާއެކީގައި ހެދިގެންދާނެ ޕްލޭނަކަށް ވާނެ. މީގެ މަގްސަދަކީ ރައްޔިތުންގެ ޚިޔާލާއި މަޝްވަރާއާއި އެއްކޮށް ރައްޔިތުން ބޭނުންވާ ގޮތަށް ރާއްޖޭގެ ތަސައްވުރު ކުރިއަށް އޮތް 20 އަހަރުގެ ދުވަހަށް ކަނޑއެޅިގެންދާ ދިއުމަކީ ރައްޔިތުންނަށް އެކަމުގެ ޔަގީންކަން އޮންނަ ކަމަކަށް ހެދުން، ގާނޫނަކުން އެއަށް ބާރުވެރިކަން ލިބފައިވާ ކަމަކަށް ހެދުން. ގާނޫނީ ހިމާޔަތްތެރިކަން ލިބުން. - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ، އެ ޕްލޭނުގެ މަޝްވަރާތައް ރާއްޖޭގެ ހުރިހާ ރަށެއްގައި ވެސް ކުރާނެ ކަމަށެވެ. އަދި އެ މަސައްކަތުގެ ތެރެއިން އެކި ދާއިރާގެ ތަޖުރިބާކާރުން އެ މަސައްކަތުގައި ބައިވެރިވާނެ ކަމަށާއި، އޭގެ ތެރޭގައި އިގްތިސާދީ ދާއިރާ، އިޖްތިމާއީ ދާއިރާ، ގަވަނަންސް ދާއިރާ ސްޕެޝަލް ޕްލޭނިން ދާއިރާ އަދި އާބަން ޑެވެލޮޕްމަންޓް ދާއިރާގެ ތަޖުރިބާކާރުން ވެސް ހިމެނޭނެ ކަމުގައި ރައީސް ވިދާޅުވިއެވެ. އަދި ވިދާޅުވީ، އެ މަސައްކަތުގައި ބޭރުގެ ބައެއް ފަރާތްތަކުގެ އެހީ ވެސް ލިބޭނެ ކަމަށާއި، އެހެން ނަމަވެސް، އެ މަސައްކަތުގައު ލީޑުކުރާނީ ދިވެހިން ކަމަށެވެ.

އެކިއެކި ދާއިރާތަކުގެ އެކްސްޕާޓުން މީގައި ބައިވެރިވާނެ، އިގްތިސާދީ ދާއިރާ، އިޖްތިމާއީ ދާއިރާ އަދި ގަވަނަންސް ދާއިރާއިން، ސްޕެޝަލް ޕްލޭނިން ދާއިރާއިން، އާބަން ޑެވެލޮޕްމަންޓް ދާއިރާއިން، ރާއްޖެއިން ބޭރުން ވެސް އިރާދަކުރެއްވިއްޔާ ބައެއް މީހުން އަންނާނެ. އެކަމަކު މި ލީޑް ކުރަން ތިބޭނީ ދިވެހިން. ދިވެހި ގައުމުދެކެ ލޯބިވާ، ގައުމިއްޔަތުގެ ވިސްނުންހުރި ގައުމީ ބަހާތަކާއި ގައުމިއްޔަތު ހިމާޔަތްކުރުމުގެ ވިސްނުމުގައި ތިބި މީހުން ތިބެގެން ކަމާބެހޭ ބޭރުގެ އެކްސްޕާޓުންގެ އެހީތެރިކަމާއެކު އިރާދަކުރެއްވިއްޔާ ރައްޔިތުންގެ ފުރިހަމަ ބައިވެރިވުމާއެކީގައި މި ޕްލޭން ހެދިގެން ދާނެ، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް އިތުރަށް ވިދާޅުވީ، ގައުމުގު ތަރައްގީ ކުރިއަށް ގެންދަން އެމަނިކުފާނު ބޭނުންފުޅުވާ ގޮތާއި، ގައުމު އޮންނަން ބޭނުންވާ ގޮތް ރައްޔިތުންނަށް، މެނިފެސްޓޯގައި އެމަނިކުފާނު ވިދާޅުވެދެއްވި ކަމަށެވެ. އަދި އެ މަސައްކަތުގައި ރާއްޖޭގެ އެންމެހާ ރައްޔިތުންގެ އެއްބާރުލުން ދިނުމަށް އެމަނިކުފާނު އެދިވަޑައިގެންނެވިއެވެ.