މިއަހަރުގެ ހައްޖުގެ މަތިވެރި އަޅުކަން އަދާކުރުމަށް ދާ ހައްޖުވެރިންގެ ފުރަތަމަ ގުރޫޕު މާދަމާ ފުރާނެއެވެ.

ދިވެހި ހައްޖު މިޝަންއިން އާއްމުކޮށްފައިވާ މައުލޫމާތުތަކަށް ބަލާއިރު ދިވެހި ހައްޖުވެރިންގެ ފުރަތަމަ ގުރޫޕް ފުރާނީ މާދަމާއެވެ.

މީގެ އިތުރުން އަންގާރަ، ބުރާސްފަތި އަދި އަންނަ ހުކުރު ދުވަހުވެސް ހައްޖުވެރިން ފުރުމަށް ވަނީ ހަމަޖެހިފައެވެ.

މާދަމާ ސައުދީ އަރަބިއަން އެއާލައިން އިން ޖުމްލަ 235 ހައްޖުވެރިން ފުރާއިރު އަންގާރަދުވަހު 257 ހައްޖުވެރިން ބުރާސްފަތި އަދި ހުކުރު ދުވަހުންކުރެ ކޮންމެ ދުވަހަކު 250 ހައްޖުވެރިން ހައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރާނެއެވެ.

ހައްޖުވެރިން ފުރުމަށް ހަމަޖެހިފައިވާ ދުވަސްތަކުގައި އެއާޕޯޓަށް ދަތުރުކުރާ އެއްގަމު އުޅަނދުފަހަރު ދުއްވާ ފަރާތްތަކުން ފުލުހުން ދޭ އިރުޝާދުތަކާ އެއްގޮތަށް ޢަމަލުކުރެއްވުމަށް ފުލުހުންވަނީ އިލްތިމާސްކުރައްވައިފައެވެެ.

އެހެންކަމުން މި ދުވަސްތަކުގައި އެއާޕޯޓަށް ދަތުރުކުރާ އެއްގަމު އުޅަނދުފަހަރު ދުއްވާ ފަރާތްތަކުން ފުލުހުން ދޭ އިރުޝާދުތަކާ އެއްގޮތަށް ޢަމަލުކުރުމަށް ފުލުހުން ވަނީ އެދިފައެވެ.

އަދި އެއާޕޯޓުން ފުރާ އެހެން މީހުންވެސް ޓްރެފިކް ތޮއްޖެހުމުގެ ސަބަބުން ލަސްތަކެއް ކުރިމަތިވުމަކީ އެކަށީގެންވާ ކަމަކަށްވުމާއެކު، އެ ދުވަސްތަކުގައި ފުރާ މީހުންވެސް ދުރާލާ އެއާޕޯޓަށް ގޮސް ފުރުމުގެ އިންތިޒާމުތައް ނިންމުމަށް ފުލުހުން ވަނީ އިލްތިމާސްކުރައްވާފައެވެ.

މީގެ އިތުުރުން ހައްޖުވެރިންނާއެކު އެއާޕޯޓަށް ވަޑައިގަންނަވާ ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުންވެސް ފުލުހުންގެ އިރުޝާދުތަކާ އެއްގޮތަށް އަމަލުކުރެއްވުމަށް ފުލުހުންގެ ޚިދުމަތުން ވަނީ ރައްޔިތުންގެ ކިބައިން އެދިވަޑައިގެންފައެވެ.