ފަރުވާކުޑަކަމުން ކުރެވޭ ކަންކަން ރަނގަޅުކޮށް އިސްލާހުވުމަށް ދެވަނަ ފުރުޞަތެއް ނުލިބުމަކީ ދުރުގައިވާ ކަމެއް ނޫންކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް އެފަދައިން ވިދާޅުވީ މަގުމަތީގެ އެކްސިޑެންޓްތަކާއި ގުޅޭގޮތުން، އެނިމޭޓަރ ޔާމިން ރަޝީދު ތައްޔާރުކޮށްފައިވާ ވީޑިއޯއެއް ސޯޝަލް މީޑިއާގައި ހިއްސާކުރައްވާ ލިޔުއްވި މެސެޖެއްގައެވެ.

މިވީޑިއޯއަކީ މަޝްހޫރު އެނިމޭޓަރ ޔާމިން ރަޝީދު އަދި ސެލްމިން އެނިމޭޝަން ސްޓޫޑިއޯ ގުޅިގެން ތައްޔާރުކޮށްފައިވާ ވީޑިއޯއެކެވެ. ދެ މިނެޓު 13 ސިކުންތުގެ މި ވީޑިއޯއިން ބުނެދެނީ ރާއްޖޭގައި މިހާރު އާއްމުވަމުންދާ އެންމެ ބޮޑު އެއް އިޖުތިމާއީ މައްސަލައާއި ގުޅޭ ފުރިހަމަ މެސެޖެކެވެ.

ވީޑިއޯއިން ފެންނަނީ މައިންބަފައިންނާ ވަކިން ދިރިއުޅޭ ފިރިހެން ދަރިފުޅަށް އޭނާގެ ބައްޕަ ހަދިޔާއެއް ދޭން ދާ މަންޒަރެވެ. ގެއިން ނިކުމެ ސައިކަލަށް އަރައިގެން ނައްޓާލިތާ ކުޑަ ވަގުތުކޮޅެއްގެ ތެރޭގައި މައި މަގުން ބާރު ސްޕީޑްގައި ދުއްވާފައި އައި ކާރަކުން ޖެހި އެކްސިޑެންޓްވެ އުމުރަށް ދުނިޔެއާ އަލްވަދާއު ކިޔަންޖެހޭ މަންޒަރެވެ. އެ ވީޑިއޯގައި ސައިކަލުދުއްވަން އިން މީހާގެ ގައިގައި ޖެހުނު ކާރު ދުއްވަން އިނީ ބައްޕަ އެކުއްޖަކަށް ދޭން ހަދިޔަ ހިފައިގެންދިޔަ އޭނާގެ ފިރިހެން ދަރިފުޅެވެ. ވަގުތު ފާއިތުވީމަ އެކަމާ އެ ދަރިފުޅު އިންތިހާއަށް ރޮވެ ހިތާމަކުރާ މަންޒަރު މިވީޑިއޯއިން ފެނިގެންދެއެވެ.

މިއިން ބުނެދެނީ ކޮންމެ ފުރާނައެއްގެ އަގުބޮޑުކަމާއި، މަގުމަތި ބޭނުންކުރާ މީހުންގެ ފުރާނައަށް ރައްކާތެރިވުމަށް ކޮންމެ މީހަކުވެސް މަސައްކަތްކުރަންޖެހޭކަމެވެ."ލައިފް އިޒް ޕްރެޝަސް، ޑްރައިވް ސޭފް"ގެ ނަމުގައި މިފަދަ މުހިންމު މެސެޖެއް މުޖުތަމަޢަށް ދޫކޮށްލުމަށް ޔާމިން ރަޝީދު ކުރައްވާފައިވާ މަސައްކަތް، ރައީސް ޑރ.މުޙައްމަދު މުޢިއްޒު ވަނީ ފާހަގަކުރައްވާފައެވެ.ރައީސް ވިދާޅުވީ މަގުތަކަކީ ރައްކާތެރި ތަނެއްގެ ގޮތުގައި ހެދުމަށް އެންމެ އެކުގައި ގުޅިގެން މަސައްކަތްކުރުމަށް ގޮވާލައްވާފައެވެ. އަދި ފަރުވާކުޑަކަމުން ގޯސްކޮށް ކުރާ ކަންކަން، ރަނގަޅުކުރަން ދެވަނަ ފުރުޞަތެއް ނުލިބުމަކީ ދުރުގައިވާ ކަމެއް ނޫންކަމަށް ރައީސުލްޖުމްހޫރިއްޔާގެ ޕޯސްޓްގައި ވަނީ ފާހަގަކުރައްވާފައެވެ.

މަގުމަތީގެ އަދި ޓްރެފިކް ޤަވާއިދުތަކަށް ސަމާލުކަން ނުދިނުމުގެ ސަބަބުން ދާދިފަހުންވެސް ވަނީ ނުރައްކާތެރި ގިނަ އެކްސިޑެންޓްތަކެއް ހިނގާފައެވެ. އަދި ބައެއްގެ ފުރާނަ ވަނީ ގަވައިދާ ޚިލާފަށް އުޅަނދުތައް ގެންގުޅުމާއި މީހުންގެ ހިތުގައި ބިރުވެރިކަން އުފެދޭގޮތަށް ނުރައްކާތެރިކޮށް އަދި އަޑުގަދަކޮށް އުޅަނދު ދުއްވުން ދަނީ އިތުރުވަމުންނެވެ.