އިސްރާއީލުން އީރާނަށް ދިން ވަރުގަދަ ހަމަލާތަކުގައި އަވަހާރަވި އީރާންގެ ސައިންޓިސްޓުންގެ އަދަދު 14 އަށް އަރައިފިއެވެ.

އަވަހާރަވި ސައިންޓިސްޓުންގެ ތެރޭގައި އީރާންގެ ނިއުކްލިއާ ޕްރޮގްރާމްގެ އިސް ބޭފުޅުން ވެސް ހިމެނެއެވެ.

އަވަހާރަވި ފަރާތްތަކުގެ ތެރޭގައި އީރާނުގެ އެޓޮމިކް އެނަޖީ އޯގަނައިޒޭޝަން (އޭއީއޯއައި)ގެ ކުރީގެ ލީޑަރު ފެރިދޫން އައްބާސީީ އާއި ތެހެރާނުގެ އިސްލާމިކް އާާޒާދު ޔުނިވަސިޓީގެ ރައީސް މުހައްމަދު މެހްދީ ތެހެރާނީ ހިމެނެއެވެ.

މިދިޔަ ހުކުރު ދުވަހު އިސްރާއީލުން، އީރާނަށް ދިން ކުއްލި ހަމަލާގައި ބައެއް ސައިންޓިސްޓުން އަވަހާރަވިއިރު، އެހެން ބައެއް ސައިންޓިސްޓުން އަވަހާރަވެފައިވަނީ ކާރު ބޮމުގެ ހަމަލާތަކުގައި ކަމަށް ރިޕޯޓުތައް ބުނެއެވެ.

ޔަހޫދީންނާ ދެކޮޅަށް އީރާނުން ހަމަލާތައްދިން ވަގުތު ޔަމަނުގެ ހޫތީންވެސް ވަރުގަދަ ރައްދު ހަމަލާތަކެއް ވަނީ ދީފައެވެ. މިއީ އީރާން-އިސްރާއީލް ހަނގުރާމަ ފެށުނު ފަހުން ހޫތީން އިސްރާއީލަށް ދެވަނަ ފަހަރަށް ދިން ހަމަލާތަކެެވެ.

ހޮނިހިރު ދުވަހުގެ ރޭ ދެ ބުރަކަށް އީރާނުން އިސްރާއީލަށް ވަނީ ހަމަލާތައް ދީފައެވެ. ފުރަތަމަ ބުރުގެ ހަމަލާތައް އިރާން ގަޑިން ރޭގަނޑު 11:45 ހާއިރު ފެށުމަށްފަހު، އިސްލާމިކް ރެވޮލިއުޝަން ގާޑްސް ކޯޕްސް (އައި.އާރް.ޖީ.ސީ) އިން "އޮޕަރޭޝަން ޓްރޫ ޕްރޮމިސް 3" ދެވަނަ ބުރު ފަށާފައިވަނީ އީރާން ގަޑިން މެންދަމު 3:34 ހާއިރުއެވެ.

ހޫތީން ދިން ހަމަލާ އަމާޒުކޮށްފައިވަނީ ތެލް އަވީވްގެ ބެން ގޫރިއަން އެއާޕޯޓަށެވެ.

ހޫތީން ހަމަލާތައް ފެށީ އަންގާރަ ދުވަހުއެވެ. އަންގާރަ ދުވަހު އިސްރާއީލަށް ދެ މިސައިލު ހަމަލާ ހޫތީން ދީފައިވާއިރު ޔަހޫދީންވަނީ ޔަމަނުގެ ހުދެއިދާ ބަނދަރަށް ބޮމުން ހަމަލާދީފައެވެ.