ހަނގުރާމަތައް ހުއްޓާލުމަށާއި، އިސްތިރާތީޖީ ގޮތުން މުހިންމު ހޯރްމުޒް ކަނޑުއޮޅި އަލުން ހުޅުވާލުމުގެ މަޝްރޫއަކަށް އީރާނުން އެއްބަސްވެފައިވާ ކަމަށް ނިއުޔޯކް ޓައިމްސްއިން ރިޕޯޓްކޮށްފިއެވެ.

އީރާނުގެ މަތީ ފަންތީގެ ތިން އޮފިޝަލަކާ ހަވާލާދީ ހޮނިހިރު ދުވަހު އާންމުކުރި މި ރިޕޯޓުގައިވާ ގޮތުން، މިއީ ސަރަހައްދީ ހަމަޖެހުމަށް އެޅޭ މުހިންމު ފިޔަވަޅެކެވެ.

Ad by Hajj Corporation

މި ހުށަހެޅުމުގެ ދަށުން ލުބުނާނު ހިމެނޭހެން ހުރިހާ ފްރަންޓެއްގައި ކުރިއަށްދާ ހަނގުރާމަތައް ހުއްޓާލުމަށް ވަނީ ހަމަޖެހިފައެވެ. މި އެއްބަސްވުމުގެ އެންމެ މުހިންމު އެއް އަމާޒަކީ ބައިނަލްއަގުވާމީ ވިޔަފާރީގައި މުހިންމު ދައުރެއް އަދާކުރާ ހޯރްމުޒް ކަނޑުއޮޅި އަލުން ހުޅުވާލައި، ދަތުރުފަތުރުގެ ރައްކާތެރިކަން ކަށަވަރުކުރުމެވެ.

މި އެއްބަސްވުމުގެ ދަށުން އެމެރިކާއިން އީރާނާ ދެކޮޅަށް ކަނޑުގެ ސަރަހައްދުގައި އަޅާފައިވާ ބްލޮކޭޑް ނުވަތަ ހުރަސްތައް އުވާލުމަށް ވަނީ ހުށަހަޅާފައެވެ. އަދި އީރާނުން އެއްވެސް ފީއެއް ނުވަތަ ޓޯލްއެއް ނެގުމަކާ ނުލައި، ވިޔަފާރި އުޅަނދުފަހަރަށް އެއްވެސް ހުރަހެއް ނެތި އެ ސަރަހައްދުން ދަތުރުކުރެވޭނެ މަގު ފަހިކޮށްދޭނެއެވެ.

ނިއުކްލިއާ ޕްރޮގްރާމާ ގުޅޭގޮތުން ހުރި ހިޔާލުތަފާތުވުންތަކަކީ މަޝްވަރާތަކުގައި ކުރިމަތިވި އެންމެ ބޮޑު ހުރަސް ކަމަށްވާއިރު، އެ މައްސަލަތައް މިވަގުތަށް ވަނީ މަޑުޖައްސާލާފައެވެ. މިކަމާ ގުޅޭގޮތުން ކުރިއަށް އޮތް 30 އާއި 60 ދުވަހުގެ ތެރޭގައި ވަކިން މަޝްވަރާކުރުމަށް ވަނީ ނިންމާފައެވެ. މީގެ އިތުރުން، މި އެއްބަސްވުމުގެ ދަށުން ބޭރު ގައުމުތަކުގައި ފްރީޒްކޮށްފައިވާ އީރާނުގެ 25 ބިލިއަން ޑޮލަރުގެ މުދާ ދޫކޮށްލުމަށް ވެސް ވަނީ ހަމަޖެހިފައެވެ.

ޕާކިސްތާނާއި ގަތަރުން މެދުވެރިއެއްގެ ދައުރު އަދާކޮށްގެން އެކުލަވާލި މި އެއްބަސްވުމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނާއެކު ވެވޭ އެއްބަސްވުމުގެ ބޮޑުބައި މިހާރު ނިމިފައިވާ ކަމަށެވެ. އަދި މިހާރު ކުރިއަށްދަނީ އެންމެ ފަހުގެ ތަފްސީލުތަކާ ގުޅޭ މަޝްވަރާތައް ކަމަށް ވެސް އޭނާ ވިދާޅުވިއެވެ.