ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން މިދިޔަ މެއި މަހު، ރާއްޖޭގެ އެންމެ ބޮޑު ދެ ޕްރައިވެޓް ހޮސްޕިޓަލް ކަމަށްވާ އޭޑީކޭ ހޮސްޕިޓަލާއި ޓްރީ ޓޮޕް ހޮސްޕިޓަލުގައި އެޑްމިޓްކޮށްގެން ފަރުވާ ހޯދި މީހުންނަށް، ޖުމްލަ 7.4 މިލިއަން ރުފިޔާގެ އެހީތެރިކަން ފޯރުކޮށްދީފައިވާ ކަމަށް އެންސްޕާ އިން ހާމަކޮށްފިއެވެ.

މި އެހީތެރިކަން ފޯރުކޮށްދީފައިވަނީ އެންސްޕާ މެދުވެރިކޮށް އާސަންދަ ސްކީމްގެ ދަށުންނެވެ.

އެގޮތުން، އޭޑީކޭ ހޮސްޕިޓަލްގައި ފަރުވާ ހޯދި 190 މީހަކަށް ޖުމްލަ 3.2 މިލިއަން ރުފިޔާ ހަރަދުކޮށްފައިވެއެވެ. އޭޑީކޭގައި އެންމެ ގިނައިން ހަރަދުކުރެވިފައިވަނީ ހިތުގެ ބަލިތަކަށް ފަރުވާ ހޯދި 14 މީހަކަށް، 994،871 ރުފިޔާގެ ހޭދައެއް ކޮށްގެންނެވެ. މީގެ އިތުރުން، އެ ހޮސްޕިޓަލުން އެންމެ ގިނަ ކޭސްތަކަކީ ކަށީގެ ބަލިތަކާއި ވިހެއުމާ ގުޅޭ ކޭސްތަކެވެ. މި ދެ ބާވަތުގެ ބައްޔަށްވެސް 27 ކޭސް ވަނީ ބަލާފައެވެ.

ޓްރީ ޓޮޕް ހޮސްޕިޓަލުން ފަރުވާ ހޯދި 334 މީހަކަށް އާސަންދައިން 4.1 މިލިއަން ރުފިޔާ ހަރަދުކޮށްފައިވެއެވެ. ޓްރީ ޓޮޕްގައި އެންމެ ބޮޑު ހޭދައެއް ކޮށްފައިވަނީ ކަށީގެ ބަލިތަކަށް ފަރުވާ ހޯދި މީހުންނަށެވެ. އެގޮތުން، 53 މީހަކަށް 1،221،484 ރުފިޔާ ވަނީ ހަރަދުކޮށްފައެވެ. އެންމެ ގިނަ ކޭސްތަކަކީ ވިހެއުމާ ގުޅޭ ކޭސްތަކެވެ. މިއީ 64 ކޭސްއެވެ.

މި އަހަރުގެ ފުރަތަމަ ފަސް މަސް ދުވަހުގެ ތެރޭގައި އާސަންދައިން 950 މިލިއަނަށް ވުރެ ގިނަ ރުފިޔާ ވަނީ ހަރަދުކޮށްފައެވެ. އާސަންދައަށް މި އަހަރަށް ބަޖެޓުކޮށްފައިވަނީ ޖުމްލަ 1.8 ބިލިއަން ރުފިޔާއެވެ.