އިސްލާމްދީނުގައި އަންހެނުންނަކީ ދަށުދަރަޖައިގެ، ނިކަމެތިކުރެވިފައިވާ، އަދި އަނިޔާ ލިބެމުންދާ ބައެއްކަމަށް ލާދީނީ މީހުން ބުނެއުޅެއެވެ. އެހެނަސް ޙަޤީޤަތުގައިވެސް އެއީ ތެދެއްތޯ

މިލިއަނުން ގުނާލެވޭ މުސްލިމުންނަކީ އެހާ އަނިޔާވެރި ބައެއްތޯ ނުވަތަ މިއީ ވަކި ފަރާތަކަށް ބުރަވެފައިވާ މީޑިއާއިން އުފައްދާ ދޮގު ވިސްނުންތަކެއްތޯ؟ މިއީ ވެސް ކުރަން ރަނގަޅު ސުވާލުތަކެކެވެ.

ޤުރުއާނުގެ ސޫރަތުލް ބަޤަރާގެ 228 ވަނަ އާޔަތުގެ މާނައިގާވެއެވެ.:

"އަދި އަންހެނުންނަށް ފިރިހެނުންގެ މައްޗަށް ޙައްޤުތަކެއް ވެއެވެ. ފިރިހެނުންނަށް އަންހެނުންގެ މައްޗަށްވާ ޙައްޤުތަކާ އެއްފަދައިންނެވެ."

މި އާޔަތުގައި އިސްލާމްދީނުގައި އަންހެނުންނާއި ފިރިހެނުންގެ ދެމެދުގައިވާ ހަމަހަމަކަމާއި އެކަކު އަނެކަކަށް އަދާކުރަންޖެހޭ ޒިންމާތަކުގެ ވާހަކަ ބަޔާންކުރައްވާފައިވެއެވެ.

މީގެ ސާދަ ސަތޭކައަށްވުރެ ގިނަ އަހަރު ކުރިން، އިސްލާމްދީނުން އަންހެނުންނަށް ދެއްވާފައިވާ ޙައްޤުތައް ހޯދަން، ހުޅަނގުގެ އަންހެނުން މަސައްކަތް ފަށާފައިވަނީ ދާދި ފަހުންނެވެ.

1930 ގެ އަހަރުތަކުގައި،

'އެނީ ބެސަންޓް' ފާހަގަކުރެއްވި ގޮތުގައި، "ވޭތުވެދިޔަ ވިހި އަހަރުގެ ތެރޭގައި އެކަނި ކްރިސްޓިއަން އިނގިރޭސިވިލާތުން އަންހެނުންގެ މުދަލުގެ ޙައްޤު ޤަބޫލުކޮށްފައިވާއިރު، އިސްލާމްދީނުގައި މި ޙައްޤު އަބަދުވެސް ދެއްވާފައި." އެވެ.

އެހެންކަމުން، އިސްލާމްދީނުގައި އަންހެނުންނަށް މަގާމެއް ނުވާކަމަށް އުނގަންނައިދޭ ކަމަށް ބުނުމަކީ ބޮޑު ދޮގެކެވެ.

ފިރިހެނުންނާއި އަންހެނުން އެންމެން ވެސް އުފެދިފައިވަނީ އާދަމްގެފާނު (ޢަލައިހިއްސަލާމް)ގެ ކިބައިންނެވެ. އިސްލާމްދީން ބާރުއަޅަނީ ދެ ޖިންސުގެ މީހުންނާމެދު ވެސް އިންސާފާއި ހެޔޮ އަޚްލާޤުގެ މަތިން މުޢާމަލާތްކުރުމަށެވެ.

ނިއުމަތްދެއްވުމާއި ޒިންމާކުރުވުމުގައި ހަމަހަމަ

ފިރިހެނުންނާއި އަންހެނުން އަޅުކަން ކުރަނީ އެއްގޮތަކަށެވެ. އެމީހުން އަޅުކަން ކުރަނީ އެއް އިލާހަކަށެވެ (ﷲ އަށެވެ). އަދާކުރަނީ އެއް އަޅުކަމެކެވެ. ތަބާވަނީ އެއް ފޮތަކަށެވެ. އަދި ގެންގުޅެނީ އެއް ޢަޤީދާއެކެވެ. މާތްﷲ އިންސާނުންގެ މެދުގައި ޙުކުމް ކުރައްވަނީ ހަމަހަމަކަމާއި އިންސާފުވެރިކަމާ އެކުގައެވެ. ފިރިހެނުންނާއި އަންހެނުންނާމެދު އިންސާފުވެރިކޮށް ކަންތައް ކުރުމާއި، އެމީހުންނަށް ދޭންޖެހޭ ޖަޒާއާ ބެހޭގޮތުން ޤުރްއާނުގެ އެތައް އާޔަތެއްގައި މާތްﷲ ވަނީ ބާރުއަޅުއްވާފައެވެ.

ޤުރުއާނުގެ ސޫރަތުއް ތައުބާގެ 72 ވަނަ އާޔަތުގެ މާނާގައިވެއެވެ.

"އަންހެނުންނާއި ފިރިހެނުންގެ ތެރެއިން އީމާންވި މީހުންނަށް، އެތަންތާގެ ދަށުން އާރުތައް ދެމިދެމިހުންނަ ސުވަރުގެތަކާއި، ޢަދުނުގެ ސުވަރުގެތަކުގައިވާ ރިވެތި ގަނޑުވަރުތައް، ﷲ ވަޢުދުވެ ވޮޑިގެންވެއެވެ."

މި އާޔަތުގައި މާތްﷲ ސުބުޙާނަހޫ ވަތަޢާލާ އީމާންވެއްޖެ ދެޖިންސުގެ އަޅުތަކުންނަށް ވަޢުދުވެ ވޮޑިގަންނަވާ މަތިވެރި ދަރުމައިގެ ވާހަކަ ބަޔާންކުރައްވާފައިވެއެވެ.

މި އާޔަތުން ދޭހަކޮށްދެނީ، ޘަވާބު ލިބުން ބިނާވެގެންވަނީ މީހެއްގެ ޢަމަލުތަކުގެ މައްޗަށް ކަމާއި، ޖިންސުގެ މައްޗަކަށް ނޫން ކަމެވެ. މީހަކަށް ޘަވާބު ދެއްވުމުގައި އަދި ޙުކުމް ކުރެއްވުމުގައި ޖިންސަކަށް އެއްވެސް ބެއްލެވުމެއް ނުވެއެވެ.

އިސްލާމްދީން އެހެން ދީންތަކާ އަޅާބަލާއިރު، އަންހެނުންނާއި ފިރިހެނުންގެ މެދުގައި ޢަދުލުވެރިކަން ޤާއިމުކުރެއެވެ. މިސާލަކަށް، މަނާކުރެވިފައިވާ ގަހުން ފަރިއްކުޅުއްވުމުގައި ޙައްވާގެފާނުގެ ކުށް އާދަމުގެފާނަށްވުރެ ބޮޑުކަމުގައި އިސްލާމްދީން ބަލައެއް ނުގަނެއެވެ. އިސްލާމްދީނުގައިވާ ގޮތުން، އާދަމުގެފާނާއި ޙައްވާގެފާނު ވެސް ފާފަވެރިވެވަޑައިގަތެވެ. އަދި ދެ ބޭކަލުން ވެސް ތައުބާވެވަޑައިގަތެވެ. އަދި ﷲ ދެ ބޭކަލުންނަށް ވެސް ފާފަފުއްސެވިއެވެ.

އުގެނުމުގައި ހަމަހަމަ

ފިރިހެނުންނާއި އަންހެނުން އެއްހަމައެއްގައި އިލްމު ހޯދުމަށް ބާރުއަޅައެވެ.

ނަބިއްޔާ ޞައްލަﷲ ޢަލައިހި ވަސައްލަމަ ޙަދީޘްކުރެއްވިއެވެ:

"ކޮންމެ މުސްލިމަކަށްމެ އިލްމު ހޯދުމަކީ ފަރުޟެކެވެ."

އަދި ރަސޫލާގެ ޒަމާނުގައާއި އޭގެ ކައިރި ޒަމާންތަކުގައި މަޝްހޫރު އަންހެންހެން ޢިލްމުވެރިން ވަނީ އުޅުއްވާފައެވެ. އޭގެ ތެރޭގައި އެކަލޭގެފާނުގެ އާއިލާގެ ބޭކަނބަލުންނާއި ޞަޙާބީ އަންހެނުންނާއި އެބޭކަނބަލުންގެ ދަރިކަނބަލުން ހިމެނެއެވެ. އެންމެ ފާހަގަކޮށްލެވޭ އެއް ބޭކަނބަލަކީ ރަސޫލާގެ އަނބިކަނބަލުން ޢާއިޝަތުގެފާނެވެ. އެކަމަނާގެ ކިބައިން އިސްލާމީ ޝަރީޢަތުގެ ހަތަރުބައިކުޅަ އެއްބައި ވަނީ ރިވާކުރެވިފައެވެ.

އެހެން އަންހެން ބޭކަނބަލުންނަކީ ފިޤުހުގެ މަޝްހޫރު ޢިލްމުވެރިންނެވެ. އަދި މަޝްހޫރު ފިރިހެން ޢިލްމުވެރިން އެބޭކަނބަލުންގެ އަރިހުން ޢިލްމު އުނގެނިވަޑައިގެންފައިވެއެވެ.

އަނބިމީހާ ނުވަތަ ފިރިމީހާ އިޚްތިޔާރުކުރުމުގައި ހަމަހަމަ ޙައްޤު

އިސްލާމްދީނުގައި އަންހެނުންނަށް ފިރިމީހާ ޚިޔާރުކުރުމުގެ ޙައްޤު ދީފައިވެއެވެ. އަދި ކައިވެނިކުރުމަށްފަހުވެސް އެމީހުންގެ އަސްލު ޢާއިލާއިން ދީފައިވާ ނަން ބޭނުންކުރުމުގެ ޙައްޤު ދީފައިވެއެވެ. އެހެންނަމަވެސް، ކުޅަގުގެ ލާދީނީ މީހުންނަށް މިހައްޤު ކަށަވަރެއް ނުވެއެވެ. އަދި އެހެން ދީންތަކުގައި މައިންބަފައިން އެމީހުންގެ ދަރިން މަޖުބޫރުން ކައިވެނިކުރުވައެވެ. މިއީ އެފަދަ ބައެއް މީހުންގެ ޘަޤާފީ އާދަކާދައެކެވެ. އެހެން ނަމަވެސް، އިސްލާމްދީނުގައި މިއީ މަނާކުރެވިފައިވާ ކަމެއް ކަމަށް ބެލެވެއެވެ.ކީރިތި ރަސޫލާ ﷺ ގެ ޒަމާނުގައި، އަންހެނަކު އެކަލޭގެފާނުގެ އަރިހަށް އައިސް ދެންނެވިއެވެ،

"އަހަރެންގެ ބައްޕަ އަހަރެން އަހަރެންގެ ބޮޑުބޭބެއާ ކައިވެނިކޮށްދިނީ އޭނާގެ އިޖުތިމާޢީ ދަރަޖަ މަތިކުރުމަށްޓަކައެވެ. އަދި އަހަރެންނަށް މިކަމަށް މަޖުބޫރުކުރެވުނީމެވެ."

ރަސޫލާ ﷺ އެ އަންހެންކުއްޖާގެ ބައްޕައަށް ގޮވާލެއްވިއެވެ. އަދި އޭނާގެ ކުރިމަތީގައި އެ އަންހެންކުއްޖާއަށް ކައިވެނީގައި ދެމިހުރުމާއި ނުވަތަ ކައިވެނި ބާޠިލުކުރުމުގެ އިޚްތިޔާރު ދެއްވިއެވެ. އެ އަންހެންކުއްޖާ ޖަވާބުދިނެވެ،

"އޭ ﷲ ގެ ރަސޫލާއެވެ! އަހަރެންގެ ބައްޕަ ކުރި ކަމަށް އަހަރެން ރުހިއްޖައީމެވެ. އެކަމަކު އަހަރެން ބޭނުންވީ އެހެން އަންހެނުންނަށް (އެމީހުން މަޖުބޫރުން ކައިވެނިކުރުވޭ ގޮތަށް ނޯންނާނެކަން) ދައްކާލާށެވެ."

ހަމަހަމަ ނަމަވެސް ތަފާތު

އާންމު އުޞޫލެއްގެ ގޮތުން ފިރރިހެނުންނާއި އަންހެނުންނަށް ހަމަހަމަ ޙައްޤުތަކެއް ލިބިދީފައިވީ ނަމަވެސް، އެ ދެ ޖިންސަށް ދެވިފައިވާ ވަކި ޙައްޤުތަކާއި ޒިންމާތައް އެއްގޮތެއް ނޫނެވެ. ފިރިހެނުންނާއި އަންހެނުންނަށް ލިބިދީފައިވަނީ އެއްބަޔަކު އަނެއްބަޔަކަށް ފުރިހަމަވާ ޙައްޤުތަކަކާއި ޒިންމާތަކެކެވެ.

ހަށިގަނޑުގެ ބޭރާއި އެތެރޭގެ ތަފާތުތަކުގެ އިތުރުން، ފިރިހެނުންނާއި އަންހެނުންގެ ސިކުނޑިން ބަސް، މަޢުލޫމާތު އަދި އިޙްސާސްތައް ފަދަ ކަންކަން ދެނެގަންނަ ގޮތުގައި ވެސް ތަފާތުތަކެއް ހުންނަކަން ސައިންޓިސްޓުންނަށް އެނގެއެވެ.

ހާވަޑް ޔުނިވަރސިޓީގެ ސޯޝިއޯ-ބަޔޮލޮޖީގެ މާހިރު، އެޑްވަޑް އޯ. ވިލްސަން ވިދާޅުވި ގޮތުގައި، އަންހެނުން އާންމު ގޮތެއްގައި ފިރިހެނުންނަށް ވުރެ މޮޅުވަނީ ވާހަކަދެއްކުމުގެ ހުނަރާއި، އަނެކުންގެ އިޙްސާސްތައް ދެނެގަތުމާއި، އިޖްތިމާޢީ ހުނަރުތަކުގައެވެ. އެހެންނަމަވެސް، ފިރިހެނުން އާންމު ގޮތެއްގައި މޮޅުވަނީ މުސްތަޤިއްލުކަމާއި، އިސްވެރިކަމާއި، ޖާގައާ ގުޅުންހުރި އަދި ހިސާބު ވިސްނުމުގެ ހުނަރުތަކާއި، މަޤާމާ ގުޅުންހުރި އުދާސްކަން ފަދަ ސިފަތަކުގައެވެ.

ދެ ޖިންސުގެ މެދުގައި ހުރި ތަފާތުތައް އެއްކިބާކޮށް، ދެ ޖިންސާމެދު އެއްގޮތަކަށް ޢަމަލުކުރުމަކީ ބުއްދިވެރިކަމެއް ނޫނެވެ. އިސްލާމްދީން އުގަންނައިދެނީ ފިރިހެނުންނާއި އަންހެނުންނަށް ލިބިދީފައިވަނީ އެއްބަޔަކު އަނެއްބަޔަކަށް ފުރިހަމަވާ، ނަމަވެސް ތަފާތު ދައުރުތަކެއްކަމަށެވެ. އެއީ އެ ދެ ޖިންސުގެ ޠަބީޢަތާ އެންމެ ގުޅޭ ގޮތަށެވެ.

މާތްﷲ ވަޙީކުރައްވާފައިވެއެވެ:"އަދި ފިރިހެނާ އަންހެނާއާ އެއްފަދައެއް ނޫނެވެ." (ޤުރްއާން 3:36)"ހެއްދެވި ފަރާތަށް (އެކަލާނގެ މަޚްލޫޤުންގެ ޙާލު) ނޭނގޭނެ ހެއްޔެވެ؟ އަދި އެކަލާނގެއީ އޯގާވަންތަ، މޮޅަށް ދެނެވޮޑިގެންވާ ރަސްކަލާނގެއެވެ." (ޤުރްއާން 67:14)

ޢާއިލީ ޔުނިޓް

މާތްﷲ ފިރިހެނުންނާއި އަންހެނުން ހެއްދެވީ ތަފާތު ގޮތަކަށް، އެކި ދައުރުތަކާއި، ހުނަރުތަކާއި އަދި ޒިންމާތަކާ އެކުގައެވެ. މި ތަފާތުތަކަކީ މަތިވެރިކަމެއް ނުވަތަ ދަށްކަމެއްގެ ހެކިތަކެއް ނޫނެވެ. އެހެނެއްކަމަކު، އެއީ ޚާއްޞަވެގެންވާ ކަންތައްތަކެކެވެ. އިސްލާމްދީނުގައި ޢާއިލާއަކީ ވަރަށް މުހިންމު އެއްޗެކެވެ. ފިރިހެނާގެ ޒިންމާއަކީ ޢާއިލާގެ މާލީ ދުޅަހެޔޮކަން ކަށަވަރުކުރުމެވެ. އަންހެނާ ޢާއިލާގެ ޖިސްމާނީ، ތަޢުލީމީ އަދި ނަފްސާނީ ދުޅަހެޔޮކަމަށް ހިއްސާކުރެއެވެ. މިކަމުން އެކަކު އަނެކަކާ ވާދަކުރުމުގެ ބަދަލުގައި އެއްބާރުލުން ބޮޑުވެގެންދެއެވެ. އެމީހުންގެ އެކިއެކި ޒިންމާތައް އަދާކުރުމުގެ ސަބަބުން ވަރުގަދަ ޢާއިލާތައް އުފެދި، އޭގެ ސަބަބުން ވަރުގަދަ މުޖުތަމަޢުތައް އުފެދެއެވެ.

އަދި ހަމައެހެންމެ، ނަފްސާނީ ގޮތުން ވެސް ފިރިހެނުންނާއި އަންހެނުންނަށް އެކަކު އަނެކަކާ ނުލައި އުފާވެރި ދިރިއުޅުމެއް ނުހޭދަކުރެވެއެވެ.

މާތްﷲ މިކަން ރީތިކޮށް ބަޔާންކުރައްވާފައިވަނީ މިފަދައިންނެވެ:

"އެކަނބަލުންނަކީ ތިޔަބައިމީހުންނަށްވާ ހެދުމެކެވެ. އަދި ތިޔަބައިމީހުންނަކީ އެކަނބަލުންނަށްވާ ހެދުމެކެވެ." އަލްޤުރުއާން 2:187

މިތަނުގައި ހެދުމަކީ ފިނިހޫނުކަމާއި، ރައްކާތެރިކަމާއި އަދި ރީތިކަން ދޭ އެއްޗެކެވެ. މިއީ އިސްލާމްދީނުގައި ފިރިމީހާއާއި އަނބިމީހާގެ ގުޅުން މާނަކުރެވިފައިވާ ގޮތެވެ.

ފިރިމީހާއާއި އަނބިމީހާގެ ގުޅުން ލޯތްބާއި ރަޙުމަތްތެރިކަން

ކީރިތި ރަސޫލާ (ޞައްލަﷲ ޢަލައިހި ވަސައްލަމަ) އަންހެނުންނާމެދު އެންމެ ރަނގަޅު ގޮތުގައި މުޢާމަލާތްކުރުމަށް ފިރިހެނުންނަށް ބާރުއަޅުއްވާފައިވެއެވެ.

"ތިޔަބައިމީހުންގެ ތެރެއިން އެންމެ ހެޔޮވެގެންވަނީ އަނބިންނާމެދު އެންމެ ރަނގަޅަށް މުޢާމަލާތްކުރާ މީހުންނެވެ."

އަދި ޤުރުއާނުގައި މާތްﷲ ވަހީކުރައްވާފައިވެއެވެ.

"އަދި އެކަލާނގެ އާޔަތްތަކުގެ ތެރެއިން ވަނީ، ތިޔަބައިމީހުން އެބައިމީހުންގެ ގާތުގައި ހަމަޖެހުމާއެކު ދިރިއުޅުމަށްޓަކައި، ތިޔަބައިމީހުންގެ ތެރެއިން ތިޔަބައިމީހުންނަށް އަނބިން ހެއްދެވުމެވެ. އަދި ތިޔަބައިމީހުންގެ މެދުގައި ލޯބިވެރިކަމާއި އޯގާތެރިކަން ލެއްވިއެވެ. ހަމަކަށަވަރުން، ވިސްނާ ބަޔަކަށް މިކަންކަމުގައި ހެކިތަކެއްވެއެވެ." (ޤުރުއާން 30:21)

ޢާއިޝަތުގެފާނު އަރިހުގައި ކީރިތި ރަސޫލާގެ ގޭތެރޭގެ އުޅުއްވުންފުޅު ކިހިނެއްތޯ އެއްފަހަރަކު ދެންނެވުނެވެ.

އެކަމަނާ ވިދާޅުވިއެވެ؛

"އެކަލޭގެފާނު ގޭގައި ހުންނަވަނީ ތިޔަބައިމީހުންގެ ތެރެއިން މީހަކު ފަދައިންނެވެ. އެހެނަސް އެކަލޭގެފާނަކީ ވަރަށް މަޑުމައިތިރި އަދި ދީލަތިވަންތަ ބޭކަލެކެވެ... އެކަލޭގެފާނު ގޭތެރޭގެ އާދައިގެ މަސައްކަތްތަކުގައި އަނބިންނަށް އެހީތެރިވެވަޑައިގަތުމަށް ތައްޔާރަށް ހުންނެވިއެވެ. [އެކަލޭގެފާނު] އަމިއްލަފުޅަށް ހެދުންކޮޅު ފަހުއްވައި އަދި ފައިވާންކޮޅު މަރާމާތުކުރެއްވިއެވެ."

ޢާންމުގޮތެއްގައި، އެކަލޭގެފާނުގެ އަނބިން ކުރައްވާ ކޮންމެ މަސައްކަތެއްގައި އެހީތެރިވެވަޑައިގަތެވެ.

މައިންނާއި އަންހެން ދަރިންގެ މަތިވެރި މަޤާމު

މައިމީހާއަކީ ދަރިފުޅުގެ މައްޗަށް އެންމެ ބޮޑު ނުފޫޒެއް އޮންނަ ފަރާތެވެ. ޚާއްޞަކޮށް ކުޑައިރު، އޭނާގެ ލޯބިވެރިކަމާއި، އަޅާލުމާއި އަދި ކުލުނުގެ ސަބަބުންނެވެ. ޝައްކެއްވެސް ނެތް ގޮތުގައި، މުޖުތަމަޢުއެއްގެ ކާމިޔާބީ ބިނާވެގެންވަނީ މައިންގެ މައްޗަށެވެ. އެހެންކަމުން، އިސްލާމްދީނުގައި މައިންގެ ޤަދަރު މަތިވެރިކޮށް، އެބައިމީހުންގެ ދަރަޖަ މަތިކުރުމަކީ އެންމެ ރަނގަޅު ކަމެކެވެ.

ﷲ ކީރިތި ޤުރުއާނުގައި ވަޙީކުރައްވާފައިވެއެވެ:"އަދި އިންސާނާއަށް ތިމަން ﷲ އަމުރުކުރެއްވީމެވެ. އޭނާގެ މައިންބަފައިންނަށް ހެޔޮކޮށް ހިތުމަށާއި، އޯގާތެރިވުމަށެވެ. އޭނާގެ މަންމަ އޭނާ އުފުލީ އުނދަގުލާއެކުގައެވެ. އަދި އޭނާ ވިހެއީވެސް އުނދަގުލާއެކުގައެވެ." (ޤުރުއާން 46:15)

އެއްފަހަރަކު ނަބިއްޔާ ﷺ ގެ އަރިހުން އެއްބޭކަލަކު ސުވާލުކުރެއްވިއެވެ.

"އޭ ﷲ ގެ ރަސޫލާއެވެ! މީސްތަކުންގެ ތެރެއިން އަހުރެންގެ ހެޔޮ އަޚްލާޤަށް އެންމެ ޙައްޤުވެގެންވަނީ ކާކުތޯއެވެ؟" ނަބިއްޔާ ﷺ ޖަވާބު ދެއްވިއެވެ: "ކަލޭގެފާނުގެ މަންމައެވެ." އެ މީހާ ދެފަހަރު އިތުރަށް "ދެން ކާކުތޯއެވެ؟" އެހުމުން، އެއްފަދަ ޖަވާބެއް ލިބުނެވެ. ހަމައެކަނި ހަތަރުވަނަ ފަހަރު އެހުމުން ނަބިއްޔާ ﷺ ޖަވާބު ދެއްވީ "ދެން ކަލޭގެފާނުގެ ބައްޕައެވެ." މައިންނަށް ހެޔޮކޮށް ހިތުމާއި އޯގާތެރިވުމަށް އެކަނި ނޫނެވެ ސަވާބު ލިބެނީ. ޙަޤީޤަތުގައި، އިސްލާމްދީނުގައި ފިރިހެން ދަރިން ބޮޑުކުރުމަށް ނުލިބޭ ޚާއްޞަ ސަވާބެއް އަންހެން ދަރިން ބޮޑުކުރުމަށް ކަނޑައަޅުއްވާފައިވެއެވެ.

ކީރިތި ރަސޫލާ މުޙައްމަދު ﷺ ޙަދީޘްކުރެއްވިއެވެ:

"ﷲ ދެ އަންހެން ދަރިން ދެއްވާފައިވާ މީހަކު، އެ ދެ ކުދިންނަށް އޯގާތެރިވެއްޖެނަމަ، އެކަން އޭނާ ސުވަރުގެ ވަނުމުގެ ސަބަބަކަށް ވާނެއެވެ."

ނިއްމާލުމުގެ ކުރިން

އިސްލާމްދީން އައުމުގެ ކުރިން، އަންހެނުންނަކީ ލަދުވެތި ބައެއްގެ ގޮތުގައި ބެލެވުނެވެ. އަންހެން ކުދިން ދިރިހުއްޓާ ވަޅުލެވުނެވެ. ޒިނޭގެ ޢަމަލު ފެތުރިފައިވިއެވެ. ވަރިކުރުމުގެ ބާރު ހަމައެކަނި ފިރިހެނުންގެ އަތުގައި އޮތެވެ. ތަރިކަ ލިބެނީ ހަމައެކަނި ބާރުގަދަ މީހުންނަށެވެ. އަދި އަނިޔާވެރިކަން ފެތުރިފައިވިއެވެ. އިސްލާމްދީން އައިސް މި ހުރިހާ ކަމެއް ނައްތާލިއެވެ. މިއަދުވެސް "ތަރައްޤީވެފައިވާ ޤައުމުތަކުގައި" ވެސް އަންހެނުންނަށް ޢިއްޒަތާއި ކަރާމާތް އަދި ޝަރަފު ނުލިބެއެވެ. އެއް މަސައްކަތަކަށް އެއްވަރުގެ މުސާރަ ލިބުން ދުރު ވާހަކައެކެވެ. އިސްލާމްދީނުގައި އަންހެނުންނަކީ އަގުހުރި، ޤަދަރުދަރުވެރި ބައެކެވެ. އެއީ ނިކަމެތިކޮށް ހިތައި، އިހާނާތްތެރިވާންވީ ބައެއް ނޫނެވެ. ބައެއް މެދުއިރުމަތީގެ ޤައުމުތަކުގައި ނުވަތަ މުސްލިމް ޢާއިލާތަކުގައި އަންހެނުންނާމެދު ކުރެވޭ ނުރަނގަޅު މުޢާމަލާތްތަކަކީ، ބައެއް މުސްލިމުން ގޯސްކޮށް ޢަމަލުކުރާ ސަޤާފީ ކަންކަމުގެ ސަބަބުން ކުރެވޭ ކަންކަމެވެ. އިސްލާމްދީނުގެ ސަބަބުން ކުރާ ކަންކަމެއް ނޫނެވެ. އިސްލާމްދީނަކީ އަނިޔާވެރި ދީނެއް ނަމަ، ދުނިޔޭގެ އެތައް އަންހެނުންނެއް އަމިއްލަ އިޚްތިޔާރުގައި އިސްލާމްދީނަށް ވަންނަނީ ކީއްވެގެން ހެއްޔެވެ؟