ނަފްސާނީ ބަލި މީހުންނަށް އެހީ ފޯރުކޮށްދިނުމަށް ގާއިމުކޮށްފައިވާ ހެލްޕް ލައިންގެ ހިދުމަތް މިއަހަރުގެ މިހާތަނަށް 5000 އަށްވުރެ ގިނަ މީހުން ހޯދާފައިވާކަމަށް ސިއްހީ ވުޒާރާއިން ބުނެފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަފްތާ 14ގެ ވަޢުދެއްގެ ދަށުން، 21 ފެބްރުއަރީ 2023 ގައި ފެށުނު މި ހެލްޕްލައިންގެ މައިގަނޑު މަޤްޞަދަކީ ނަފްސާނީ ގޮތުން އުނދަގޫވާ އެކިއެކި ހާލަތްތަކުގައި އަދި ނަފްސާނީ ބަލި ހުންނަ އެކި އުމުރުފުރައިގެ މީހުންނަށް، 24 ގަޑިއިރު ނަފްސާނީ ފުރަތަމަ އެހީތެރިކަން ފޯރުކޮށްދިނުމެވެ.

ނަފްސާނީ ބަލި ތަޙައްމަލު ކުރަމުންދާ މީހުންނަށް ފުރަތަމަ އެހީ ހޯދުމަށް ގުޅޭނެ ޤައުމީ ނަންބަރަކީ 1677 އެވެ.

ސިއްޙީ ވުޒާރާއިން ބުނީ މިހެލްޕް ލައިންގެ ޚިދުމަތް 2024 ގައި 2576 މީހުން ހޯދާފައިވާކަމަށެވެ. ނަމަވެސް މިއަހަރުގެ ޖެނުއަރީމަހުން ފެށިގެން ޖުލައިމަހުގެ ނިޔަލަށް 5820 މީހުން ހެލްޕް ލައިންގެ ޚިދުމަތް ހޯދާފައިވާކަން ސިއްހީ ވުޒާރާއިން ވަނީ ފާހަގަކޮށްފައެވެ.