ށ. މިލަންދޫގައި މަސައްކަތްކުރާ ބައެއް ފުލުހުންގެ އެކައުންޓުތަކަށް ގިނަ އަދަދެއްގެ ފައިސާ ޖަމާވެފައިވާ މައްސަލައެއް ބަލަމުން އަންނަކަމަށް ފުލުހުން ރޭ ބުނެފިއެވެ.

ފުލުހުން މިކަން ހާމަކުރީ އެފަދަ މައްސަލައެއް ބަލަމުންދޭތޯ ފުލުހުންގެ ވަޓްސްއަޕް މީޑިއާ ގްރޫޕްގައި ނޫސްވެރިޔަކު ކުރި ސުވާލަށް މައުލޫމާތު ދެމުންނެވެ.

ފުލުހުން ބުނީ މިލަންދޫ ޕޮލިހުގައި މަސައްކަތްކުރާ ބައެއް ފުލުހުންގެ ބޭންކް އެކައުންޓުތަކަށް ގިނަ އަދަދެއްގެ ފައިސާ ޖަމާކޮށްފައިވާ މައްސަލައެއް އެ އިދާރާގެ ޕްރޮފެޝަނަލް ސްޓެންޑާޑްސް ކޮމާންޑުން ތަހްގީގުކުރަމުން އަންނަކަމަށެވެ.

މި މައްސަލަ ތަހްގީގުކުރުމަށް މިކަމުގައި ތުހުމަތުވާ ފުލުހުން މިވަގުތު ތިބީ މާލެއަށް ގެނެސްފަައިކަމަށް ވެސް ފުލުހުން ބުންޏެވެ.

މި ފައިސާ އެ ފުލުހުންގެ އެކައުންޓަށް ޖަމާކޮށްފައި ވަނީ ފުލުހުންގެ ކެއުމުގެ ކަންކަން އިންތިޒާމުކުރާ ފަރާތުންކަމަށް އަޑުފެތުރިފައިވެއެވެ. ނަމަވެސް ފުލުހުން އަދި އެކަން ކަށަވަރުކޮށެއް ނުދެއެވެ.