ނިއުޒިލޭންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ނޮން-ރެސިޑެންޓް ސަފީރު، މުޙައްމަދު ލުވޭޒް، އެމަނިކުފާނުގެ ސަފީރުކަމުގެ ފަތްކޮޅު، ނިއުޒިލޭންޑްގެ ގަވަރނަރ-ޖެނެރަލް އަދި ކޮމާންޑަރ-އިން-ޗީފް އެންޑް އޯވަރ ދަ ރިއަލްމް އޮފް ނިއުޒިލޭންޑް، ހަރ އެކްސެލެންސީ ދަ ރައިޓް އޮނަރަބަލް ޑޭމް ސިންޑީ ކިރޯ، ޖީ.އެން.ޒެޑް.އެމް.، ކިއު.އެސް.އޯ. އަށް މިއަދު އަރުއްވައިފިއެވެ.

މި ރަސްމިއްޔާތު އޮތީ ވެލިންގޓަންގައި ހުންނަ ގަވަރމެންޓް ހައުސް ގައެވެ.

Ad by Hajj Corporation

މި ރަސްމިއްޔާތުގައި ސަފީރު ލުވޭޒް ވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ފަރާތްޕުޅުން ތަހުނިޔާއާއި ހެޔޮއެދުންތައް ގަވަރުނަރ ޖެނެރަލަށް އަރިސްކުރައްވާފައެވެ. އަދި އެމަނިކުފާނުގެ ސަފީރުކަމުގެ ދައުރުގައި ދެ ޤައުމު ދެމެދުގައި އޮތް ޒަމާންވީ ރަހުމަތްތެރި ގުޅުން އިތުރަށް ބަދަހިކޮށް ހަރުދަނާކުރުމަށް މަސައްކަތްކުރައްވަމުން ގެންދަވާނެކަމުގެ ޔަގީންކަންވެސް އަރުވާފައެވެ.

މި ރަސްމިއްޔާތުގައި ސަފީރު ލުވޭޒްގެ އަރިހުގައި ސިންގަޕޫރުގައި ހުންނަ ދިވެހިރާއްޖޭގެ ހައިކޮމިޝަންގެ ސެކަންޑް ސެކްރެޓަރީ، ޖަލާލާ ސަލީމް ބައިވެރިވެވަޑައިގެންނެވިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ނިއުޒިލޭންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ނޮން-ރެސިޑެންޓް ސަފީރުކަމަށް މުޙައްމަދު ލުވޭޒް ޢައްޔަން ކުރެއްވީ 18 މާރޗް 2025 ގައެވެ. ސަފީރު ލުވޭޒް މިހާރު ހުންނެވީ ދިވެހި ރާއްޖެއިން ސިންގަޕޫރަށް ކަނޑައަޅުއްވާފައި ހުންނަވާ ސަފީރުކަމުގެ މަޤާމުގައެވެ.