މިދިޔަ އާދިއްތަ ދުވަހުގެ ރޭ މާފަންނު ބަސް ޓާމިނަލް ކައިރި ހިނގި ނުރައްކާތެރި އެކްސިޑެންޓުގައި އަނިޔާވި 16 އަހަރުގެ ކުއްޖާއަށް ފަރުވާ ދިނުމަށް ފަހު ހޮސްޕިޓަލުން ދޫކޮށްލައިފިއެވެ.

އައިޖީއެމްއެޗްގެ މީޑިއާ އޮފިޝަލް ވިދާޅުވީ ފަރުވާ ދިނުމަށް ފަހު 16 އަހަރުގެ ކުއްޖާ އިއްޔެ ގެޔަށް ދޫކޮށްލާފައިވާ ކަމަށެވެ.

ބޮޑުތަކުރުފާނު މަގު، މާފަންނު ބަސް ޓާމިނަލް ކުރިމަތީގައި އޮންނަ ކަފިހި ހުރަސްމަތިން ހުރަސްކުރި މީހެއްގެ ގައިގައި، ހުޅަނގުން އިރަށް ދުއްވާފައި ދިޔަ ސައިކަލަކުން ޖެހި، އަދި ކުރިމަތިން އިރުން ހުޅަނގަށް ދުއްވާފައި އައި ޕިކަޕެއްގައި ޖެހި އެކްސިޑެންޓުވީ މި މަހުގެ 13 ވަނަ ދުވަހުގެ ރޭ 20:17 ހާއިރުއެވެ. މި އެކްސިޑެންޓުގައި ސައިކަލު ދުއްވަން އިން، ޔޫސުފް އަލްސަން މުހައްމަދު (17އ) ވަނީ ނިޔާވެފައެވެ.

މި އެކްސިޑެންޓުގައި ސައިކަލު ފަހަތުގައި އިން 16 އަހަރުގެ ކުއްޖަކަށާއި، ކަފިހި ހުރަސްމަތިން މަގު ހުރަސްކުރި 40 އަހަރުގެ މީހާއަށްވެސް ވަނީ އަނިޔާވެފައެވެ