ރާއްޖެ ގެންނަ ބިދޭސީންނާ ގުޅޭ ހުއްދަތަކަށް ސަރުކާރަށް ދައްކަންޖެހޭ ފީތަކާއި ޖޫރިމަނާ ނުދައްކާ ފަރާތްތަކުގެ ތެރެއިން މިހާތަނަށް 7،500 ފަރާތެއް އެކްސްޕެޓް ސިސްޓަމް ބޭނުން ނުކުރެވޭ ގޮތަށް ސަސްޕެންޑް ކޮށްފި އެވެ.

އެކްސްޕެޓް ސިސްޓަމަކީ ރާއްޖެއަށް ބިދޭސީން އެތެރެކުރުމަށް ހުރިހާ ފީތައް ދެއްކުމަށް ބޭނުންކުރާ ސަރުކާރުގެ ސިސްޓަމް އެވެ.

ބިދޭސީންނާއި ގުޅޭ ފީތައް ނުދައްކާ ފަރާތްތަކާއި އެ ފަރާތްތަކުގެ ނަންނައް ހޯމް މިނިސްޓްރީން މީގެ ކުރީން އާންމުކޮށްފައިވާއިރު، އެ ފީތައް ދެއްކުމަށް މުހުލަތުތަކެއް ވެސް ވަނީ ދީފައެވެ. އަދި އެ ފީތައް ނުދައްކާ ފަރާތްތަކަށް ވަކި މުއްދަތެއް ހިނގުމުން އެކްސްޕެޓް ސިސްޓަމް އަށް އެކްސެސް ނުވެވޭގޮތް ހަދާނެކަން އަނގައި ހަނދާންކޮށްދީފަވެއެވެ.

ހޯމް މިނިސްޓްރީ އާއި ހަވާލާދީ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި ބިދޭސީންނާ ގުޅޭ އެއްވެސް ޖޫރިމަނާއެއް މިހާތަނަށް ނުދައްކާ 7،501 ފަރާތްތަކަށް އެކްސްޕެޓް ސިސްޓަމަށް ނުވަދެވޭ ގޮތަށް ވަނީ ބްލޮކްކޮށްފައެވެ.

މި ފައިސާ ދެއްކުމަށް ލުއި އޮޕްޝަންތަކެއް ވެސް ހޯމް މިނިސްޓްރީން ކުރިން ދީފައިވާއިރު، މިހާތަނަށް އެއް އަހަރު ދުވަހަށް ބަހާލައިގެން ފައިސާ ދައްކަން 3،692 ފަރާތަކުން ހޯމް މިނިސްޓްރީ އަށް ވަނީ ހުށަހަޅާފައެވެ.

ހޯމް މިނިސްޓްރީން ބުނެފައިވާ ގޮތުގައި ބިދޭސީންނާއި ގުޅިގެން ދައުލަތަށް ލިބެންޖެހޭ ފީއާއި ޖޫރިމަނާ ޖުމްލަ 253 މިލިއަނަށް އަރައެވެ. އެއީ ވޯކް ޕާރމިޓް ފީގެ ގޮތުގައި 187 މިލިޔަން ރުފިޔާ، ކޯޓާ ފީގެ ގޮތުގައި 63 މިލިޔަން ރުފިޔާ އަދި ކެންސަލޭޝަން ފީގެ ގޮތުގައި 2.7 މިލިޔަން ރުފިޔާ އެވެ.