ހަމާސްގެ ޤައްސާމް ބްރިގޭޑްސްއިން ޔަހޫދީންނާ ދެކޮޅަށް ދިން ހަމަލާއެއްގައި ގިނަ އަދަދެއްގެ ބަޔަކު ޒަހަމްކޮށްލައިފިއެވެ.

ހަމާސްގެ އަސްކަރީ ގޮފި- ޤައްސާމް ބްރިގޭޑްސްއިން ބުނީ ޣައްޒާގައި ހިންގި އޮޕަރޭޝަންތަކެއްގައި ގިނަ އަދަދެއްގެ އިސްރާއީލު ސިފައިން މަރާލައި އަދި ޒަޚަމްކޮށްލާފައިވާކަމަށެވެ. މި ހަމަލާތައް ދިނީ ގޮވާތަކެތި ބޭނުންކޮށްގެންކަމަށް ހަމާސްއިން ބުނެއެވެ.

މިގޮތުން ރަފާހުގެ އިރުމަތީގައިވާ މަޝްރޫ ސަރަޙައްދުގައި ދިން ހަމަލާއެއް އަމާޒުކޮށްފައިވަނީ 7 މީހުންގެ ގުރޫޕަކަށެވެ.

އަދި ޔަހޫދީ ސިފައިން ފިލާތިބި ގެއަކަށް އަމާޒުކޮށް ހަމަލާއެއްދީފައިވާއިރު ރަފާހުގެ އިރުމަތީގައިވާ އަލް-ޖަނިނާ އަވަށުގައި އުޅުނު ޔަހޫދީންގެ 8 މީހުންގެ ގުރޫޕަކަށްވެސް ވަނީ ހަމަލާތައް ދީފައެވެ.

ހަމަލާތަކުގެ ތެރެއިން ޚާން ޔޫނިސްގެ އުތުރުގައި ހަރަކާތްތެރިވި އިސްރާއީލުގެ ހަތިޔާރު ވެހިކަލަކަށް ހަމަލާދީވެސް ގިނަ ބަޔަކު ވަނީ މަރާލާފައެވެ.

2023 އޮކްޓޯބަރު 7 ވަނަ ދުވަހު ފެށި ހަމަލާތަކަށް މިއަދާއި ހަމައަށް ހުއްޓުމެއް އައިސްފައި ނުވާއިރު، ކޮންމެ ދުވަހަކު ގޮތަކަށް ޣައްޒާގެ އެކި ސަރަހައްދުތަކަށް ހަމަލާތައް ދަނީ ދެމުންނެވެ.