ޕީއެސްޖީ އިން ޖިއަންލުއިޖި ޑޮނަރުމާގެ މުސްތަގުބަލާމެދު ސުވާލު އުފެދިފައިވާ ދަނޑިވަޅެއްގައި، ލިލްގެ ގޯލްކީޕަރު ލޫކަސް ޝެވަލިއޭގެ ސޮއި ހޯދުމުގެ އެންމެހައި ކަންކަން ނިމިފައިވާކަމަށް ރިޕޯޓްތައް ލިބެންފަށައިފިއެވެ. މި ޑީލްގެ އަގަކީ 40 މިލިއަން ޔޫރޯ (34 މިލިއަން ޕައުންޑް) އެވެ.

23 އަހަރުގެ ޝެވަލިއޭ އާއެކު ފަސް އަހަރުގެ އެއްބަސްވުމަކަށް އައިސްފައިވާކަމަށްވެއެވެ.

ޝެވަލިއޭ އަކީ 2022 ގައި ޕްރޮފެޝަނަލް ފުޓްބޯޅައަށް ނުކުތް ފަހުން، ފްރާންސްގެ ލީގު 1 ގެ އެންމެ އިތުބާރުހުރި ގޯލްކީޕަރުންގެ ތެރެއިން އެކަކެވެ. މިދިޔަ ސީޒަންގައި ލިލްއާއެކު 48 މެޗު ކުޅެ، 13 މެޗެއްގައި ކްލީން ޝީޓް ހިފަހައްޓާފައިވެއެވެ. އޭނާގެ ބޯލް ޑިސްޓްރިބިއުޝަން ހުނަރަކީ ޕީއެސްޖީގެ ކޯޗު ލުއިސް އެންރިކޭގެ އޭނާ ކުލަބަށް ގެންނަން ނިންމި އެންމެ ބޮޑު ސަބަބެވެ.

ޕީއެސްޖީއިން އައު ކީޕަރެއްގެ ސޮއި ހޯދަނީ ފަސްޓް ޗޮއިސް ގޯލްކީޕަރު ޑޮނަރުމާގެ މުސްތަގުބަލާމެދު ސުވާލު އުފެދިފައިވާ ދަނޑިވަޅެއްގައެވެ. މިދިޔަ ސީޒަންގައި ރަނގަޅު ފޯމެއް ދައްކަމުން އައި ނަމަވެސް، އޭނާގެ ކޮންޓްރެކްޓް އައު ކުރުމުގެ މަޝްވަރާތަކާއި މުސާރައާ ގުޅޭ ގޮތުން ދެފަރާތުން އެއްބަސްވުމަކަށް ނާދެވި، ކޮންޓްރެކްޓް އައުކުރުން މިހާރު ވަނީ މަޑުޖެހިފައެވެ. ޑޮނަރުމާގެ ސޮއި ހޯދުމަށް ޗެލްސީ އާއި ޔުނައިޓެޑް މަސައްކަތް ކުރާކަމަށް އެކިފަރާތްތަކުން ވަނީ ހާމަކޮށްފައެވެ.