ރެއާލް މެޑްރިޑްގެ ފޯވަޑް ރޮޑްރިގޯ ކުރިއަށް އޮތް ޓްރާންސްފާ މާކެޓްގައި ވިއްކާލަން އެ ކްލަބުން ތައްޔާރުވަމުން އަންނަ ކަމަށް ބްރެޒިލްގެ ސްޕޯޓްސް ނޫސް، އީއެސްޕީއެން ބްރެޒިލްއިން ރިޕޯޓްކޮށްފިއެވެ. ނަމަވެސް، މިކަން ވާނީ ހަމައެކަނި ކުޅުންތެރިޔާ ވެސް ކްލަބު ދޫކޮށްލަން ބޭނުންވާ ނަމަ ކަމަށް އެ ރިޕޯޓްގައި ބުނެފައިވެއެވެ.

ރޮޑްރިގޯގެ ޝައުގު ބޮޑަށް ހުރީ އިނގިރޭސި ޕްރިމިއާ ލީގަށް ބަދަލުވުމަށެވެ. މީގެ ކުރިން އޭނާ ހޯދަން އާސެނަލް، ލިވަޕޫލް އަދި މެންޗެސްޓަރ ސިޓީ ފަދަ ކްލަބްތަކުން ޝައުގުވެރިކަން ފާޅުކޮށްފައިވެއެވެ. ރެއާލް މެޑްރިޑުން ބޭނުންވަނީ ރޮޑްރިގޯ އެ ކްލަބު ދޫކޮށްލާ ނަމަ، ހަމައެކަނި ދާއިމީ ގޮތެއްގައި ވިއްކާލުމަށެވެ. އެ ކްލަބުން އޭނާ ލޯނު އެއްބަސްވުމެއްގެ ދަށުން ދޫކޮށްލުމަށް ޝައުގުވެރިކަމެއް ނުދެއެވެ. މީގެ އިތުރުން ފާއިތުވެދިޔަ 24 ގަޑިއިރުގެ ތެރޭގައި ޗެލްސީއިންވެސް ރޮޑްރީގޯގެ ސޮއި ހޯދުމަށް މަސައްކަތް ކުރަން ފަށާފައިވާކަން ރިޕޯޓްތައް ބުނެއެވެ.

Ad by Hajj Corporation

ރޮޑްރިގޯއަށް މިހާރު ދިމާވެފައިވާ އެންމެ ބޮޑު މައްސަލައަކީ ރެއާލް މެޑްރިޑާއެކު އޭނާގެ ފޯމު ދަށްވެފައިވުމެވެ. މިކަމުގެ ސަބަބުން އޭނާގެ މާކެޓް އަގަށް ވަރަށް ބޮޑު އަސަރެއް ކޮށްފައިވެއެވެ. މީގެ އިތުރުން މިސީޒަނުގައި ޒަބީ އެލަންސޯ ރެއާލް ާއި ހަވާލުވިފަހުން ރޮޑްރީގޯއަށް ޓީމުގެ ފުރަތަމަ 11 އިން ޖާގަލިބޭނީ ވަރަށް މަދުންނެވެ.

ރޮޑްރީގޯގެ ފޯމު ދަށްވުމާއެކު އޭނާގެ ކުޅުމަށް ފާޑުކިޔުންތައް އަމާޒުވެފައިވާއިރު، ކްލަބުގެ މެނޭޖްމަންޓް ވެސް އޭނާއާ މެދު ގޮތެއް ނިންމަން މަޖުބޫރުވެފައިވާ ކަމަށް ރިޕޯޓްތައް ބުނެއެވެ.

ރެއާލް މެޑްރިޑުގެ ޕްލޭނަކީ ރޮޑްރިގޯގެ ބަދަލުގައި އެހެން ކުޅުންތެރިއަކު ގެނައުމަށް ފައިސާ ހޯދުމެވެ. ނަމަވެސް، އޭނާގެ ފޯމު ދަށްވުމުގެ ސަބަބުން މިހާރު އޭނާ ވިއްކާލައިގެން ބޮޑު އަގެއް ހޯދުމަކީ ދަތި ކަމެއް ކަމަށް ބެލެވެއެވެ.