ފްރާންސްގެ ފުޓްބޯޅައިގައި މިހާތަނަށް ދިމާވި އެންމެ ބޮޑު ޤާނޫނީ ދެބަސްވުންތަކުގެ ތެރޭގައި ހިމެނޭ، އެމްބާޕޭ އާއި ޕީ.އެސް.ޖީ އާ ދެމެދު ހިނގާ މައްސަލައިގެ އަޑުއެހުންތައް ނިމި، އެ މައްސަލައިގެ ޙުކުމް އަންނަ ޑިސެމްބަރު 16 ގައި އިއްވުމަށް ހަމަޖެހިއްޖެއެވެ. އާރް.އެމް.ސީ ރިޕޯޓުކޮށްފައިވާ ގޮތުގައި، ހޯމަ ދުވަހު ބޭއްވުނު އަޑުއެހުމުގައި އެއްވެސް ކުރިއެރުމެއް ލިބިފައިނުވާތީ، ދެ ފަރާތުގެ ދެމެދުގައިވާ މާލީ ދެބަސްވުންތައްވަނީ އިތުރަށް ވަރުގަދަވެފައެވެ.

އެމްބާޕޭ ބުނާ ގޮތުގައި ޕީ.އެސް.ޖީ އިން އޭނާއަށް ނުދައްކާ €55 މިލިއަން ޔޫރޯގެ ބޯނަސްތަކާއި މުސާރަ ލިބެންޖެހެއެވެ. އޭނާގެ ވަކީލުން ދަޢުވާކުރާ ގޮތުގައި، ރެއާލް މެޑްރިޑަށް ދިއުމަށްޓަކައި އެ ފައިސާ ދޫކޮށްލުމަށް އެމްބާޕޭ އަނގަބަހުން އެއްބަސްވި ކަމަށް ޕީ.އެސް.ޖީ އިން ބުނި ނަމަވެސް، އެ ކްލަބުން އެއްބަސްވުމަށް އިޙްތިރާމްކޮށްފައި ނުވާ ކަމަށެވެ. މީގެ ކުރިން، އެމްބާޕޭގެ ވަކީލުން ވަނީ ޕީ.އެސް.ޖީގެ އެކައުންޓުތަކުން ވަގުތީ ގޮތުން €55 މިލިއަން ޔޫރޯ ހިފަހައްޓާފައެވެ.

Ad by Hajj Corporation

މި މައްސަލަ އިތުރަށް ބޮޑުވެފައިވާއިރު، އެމްބާޕޭ މިހާރު އެދެމުންދަނީ ޖުމްލަ €240 މިލިއަން ޔޫރޯއަށެވެ. އޭނާގެ ވަކީލުން ދަޢުވާކުރާ ގޮތުގައި، އޭނާގެ ކުރީގެ ކޮންޓްރެކްޓްތަކުގެ ބައެއް ބައިތައް ދާއިމީ ވަޒީފާގެ ގޮތުގައި އަލުން ބެލެހެއްޓުމުން، ޤާނޫނީ އޮނިގަނޑަށް ބޮޑެތި ބަދަލުތަކެއް އަންނާނެއެވެ. މީގެ އިތުރުން މާލީ އަދި މަޤްބޫލުކަމުގެ ގެއްލުންތަކުގެ ބަދަލުވެސް އޭނާ ވަނީ އެދިފައެވެ.

މި ދަޢުވާތަކަށް ރައްދު ދިނުމުގެ ގޮތުން ޕީ.އެސް.ޖީ އިން ވަނީ އެމްބާޕޭގެ މައްޗަށް €98 މިލިއަން ޔޫރޯގެ ކައުންޓާ ދަޢުވާއެއް ހުށަހަޅާފައެވެ. އެ ކްލަބުން ތުހުމަތުކުރާ ގޮތުގައި، އެމްބާޕޭގެ ސަބަބުން ކްލަބަށް މާލީ ގެއްލުންތަކެއް ވެފައިވާ ކަމަށާއި، އެ ކްލަބުން އެއްވެސް ގޯހެއް ހަދާފައި ނުވާ ކަމަށް ބުނެ އެމްބާޕޭގެ ދަޢުވާތައް ވަނީ ދޮގުކޮށްފައެވެ.

މަސައްކަތާބެހޭ ކޯޓުގައި ދެ ފަރާތުންވެސް ވަނީ ވަރަށް ތަފާތު ދަލީލުތައް ހުށަހަޅާފައެވެ. މިމައްސަލައިގައި ކޯޓުން ބޭރުން އެއްބަސްވުމަކަށް ނާދެވުމުން، މައްސަލައިގެ ނިންމުން މިހާރުވަނީ ފަނޑިޔާރުގެ އަތްމައްޗަށް ދޫކޮށްލާފައެވެ. ޑިސެމްބަރު މަހުގެ މެދުތެރޭގައި އިއްވާ މި ޙުކުމަކީ ފްރާންސްގެ ފުޓްބޯޅައިގެ ކޮންޓްރެކްޓްތައް ހަދާނެ ގޮތަށް ބޮޑު ބަދަލެއް ގެނެސްދާނެ ނިންމުމެކެވެ.