ކުރީގެ ކްލަބް ޕެރިސް ސެއިންޓް ޖާމަން (ޕީއެސްޖީ) އާއެކު އުފެދިފައިވާ ގާނޫނީ މައްސަލައިގެ އެންމެ ފަހުގެ ނިންމުމާ ގުޅިގެން، ފުޓްބޯޅައޮގެ 'ޑިކްޓޭޓަރ'ގެ ގޮތުގައި މަޝްހޫރުވެފައިވާ ސުޕަރ ސްޓަރ ކީލިއަން އެމްބާޕޭ އެ ކްލަބަށް ބަދަލުގެ ގޮތުގައި 60،000 ޔޫރޯ ދެއްކުމަށް ކޯޓުން އަމުރުކޮށްފިއެވެ.

ފްރާންސްގެ 'ލެކީޕް' އިން ރިޕޯޓްކޮށްފައިވާ ގޮތުގައި، ޕެރިސް ކޯޓް އޮފް އެޕީލް އިން މި ހުކުމް އިއްވީ ނުލިބި ހުރި ބޯނަހާއި އެހެނިހެން އިނާޔަތްތަކުގެ ގޮތުގައި 60 މިލިއަން ޔޫރޯ ހޯދުމަށް އެމްބާޕޭ ހުށަހެޅި މައްސަލައާ ގުޅިގެން ޕީއެސްޖީން އެ ފައިސާ ފްރީޒްކޮށްފައި ބަހައްޓަން ޖެހުމުގެ ސަބަބުންނެވެ. އެމްބާޕޭ ކޯޓަށް މައްސަލަ ހުށަހެޅީ އޭނާއަށް ލިބެންޖެހޭ ފައިސާ ދިނުމަށް ޕީއެސްޖީން ދެކޮޅު ހަދާފައިވާ ކަމަށް ބުނެއެވެ.

Ad by Hajj Corporation

އެމްބާޕޭގެ ގާނޫނީ ޓީމުން ޖުމްލަ 263 މިލިއަން ޔޫރޯގެ ބަދަލެއް ހޯދުމަށް އެދުނު ނަމަވެސް، ކޯޓުން މައިގަނޑު ގޮތެއްގައި ބަލާފައިވަނީ ކުޅުންތެރިޔާއަށް ދޭންޖެހި ނުދެވި ހުރި އަދަދުތަކަށެވެ.

މި މައްސަލައިގައި ޑިސެމްބަރު 2025 ގައި ކޯޓުން ވަނީ އެމްބާޕޭއަށް ޕީއެސްޖީން ބަދަލު ދޭންޖެހޭނެ ކަމަށް ނިންމާފައެވެ. ނަމަވެސް، އެހާ ބޮޑު އަދަދެއްގެ ފައިސާ ފްރީޒްކޮށްފައި ބަހައްޓަން ޖެހުމުގެ ސަބަބުން ދަތިތަކާ ކުރިމަތިވި ކަމަށް ބުނެ ޕީއެސްޖީން ހުށަހެޅި ކައުންޓަރ-ކްލެއިމްވެސް ފަނޑިޔާރު ވަނީ ބަލައިގެންފައެވެ.

އެންމެ ފަހުގެ މި ނިންމުމާއެކު، ދެފަރާތުގެ ދެމެދުގައި ހިނގި މި މައްސަލައާ ގުޅިގެން އެމްބާޕޭ މިހާރު ވަނީ ޕީއެސްޖީއަށް 60،000 ޔޫރޯ ދައްކަން ޖެހިފައެވެ.