ބާސެލޯނާގެ ގޯލްކީޕަރު އިނާކީ ޕެނާ، ކްލަބާއެކު އޮތް އެއްބަސްވުން ނިމުމަކަށް ގެނައުމަށް މަޝްވަރާކުރަމުންދާ ކަމަށް ވަނީ ހާމަވެެއްޖެއެވެ. ކުރިޔަށް އޮތް ސީޒަނަށް ތައްޔާރުވުމަށް ބާސެލޯނާއިން އިތުރު ކީޕަރެއްގެ ސޮއި ހޯދާފައިވާއިރު، ޕެނާގެ އިތުރުން ބާސެލޯނާގައި ތިން ކީޕަރުން މިހާރު އެބަތިއްބެވެ.

ކްލަބުގެ ފުރަތަމަ ޓީމުގެ ގޯލްކީޕަރުންގެ ގޮތުގައި ޖުއާން ގާސިއާ އަދި ވޯޖެކް ޝްޗެސްނީ ހަމަޖެއްސުމަށް ރޭވިފައިވާއިރު، ތިންވަނަ ގޯލްކީޕަރެއްގެ ގޮތުގައި ޑިއެގޯ ކޮޗެން ބޭއްވުމަށް ވަނީ ނިންމާފައެވެ. ނަމަވެސް، ގާސިއާ އަދި ޝްޗެސްނީގެ ރަޖިސްޓްރޭޝަންގެ މައްސަލަ ހައްލުނުވެ އޮތުމާއެކު، މިވަގުތު ޕެނާއަކީ ޓީމުގައި ރަޖިސްޓަރީ ކުރެވިފައިވާ ހަމައެކަނި ފިޓް ގޯލްކީޕަރެވެ. މީގެ އިތުރުން ޓާ ސްޓެގެން ވެސް އަދިވެސް ހުރީ ބާސެލޯނާގެ ކުޅުންތެރިއެއްގެގޮތުގައެވެ.

ޕެނާއަށް ވަނީ ފާއިތުވި ސީޒަނުން ފެށިގެން ބާސާއިން އޭނާއަށް ޖާގައެއް ނެތްކަން އެނގިފައެވެ. ހާންސީ ފްލިކްގެ އެކުލަވާލުންތަކުގައި ޖެނުއަރީ މަހުން ފެށިގެން ޕެނާ ހިމެނިފައެއް ނުވެއެވެ. އޭނާގެ އެއްބަސްވުމުގައި އަދި އެއް އަހަރު ދުވަސް ބާކީ އޮތްއިރު، އޭނާގެ މުސާރައަކީ ސެލްޓާ ވީގޯ އަދި ސެވިއްޔާ ފަދަ ކްލަބުތަކަށް ގޮންޖެހުމަކަށްވެފައިވެއެވެ.

ސްޕެއިންގެ ކްލަބުތަކުން ބޭނުންވަނީ ޕެނާ ހިލޭ ޓްރާންސްފަރއެއްގެ ގޮތުގައި ގެނެސް، އެކަށީގެންވާ މުސާރައެއްގައި ފުރަތަމަ ގޯލްކީޕަރެއްގެ ގޮތުގައި ބޭނުންކުރާށެވެ. އަދި ގަލަޓަސަރޭއަށް ބަދަލުވުމަކީވެސް އޭނާއަށް އޮތް އެހެން ފުރުސަތެކެވެ.

މި މައްސަލައިގެ ކުރިއެރުން ލަސްވަމުންދިޔަ ނަމަވެސް، ޕެނާ ވަނީ ބާސާގެ އޭޝިއާ ދަތުރުގައި ބައިވެރިވެ، ޕްރޮފެޝަނަލްކޮށް ތަމްރީނުތަކުގައި ބައިވެރިވަމުންނެވެ. ރަޖިސްޓްރޭޝަންގެ މައްސަލަތައް ހައްލުވުމާއެކު، އޯގަސްޓް މަހުގެ ކުރީކޮޅު އޭނާގެ ޓްރާންސްފަރ ނިމޭނެ ކަމަށް ބެލެވެއެވެ.