ޗެލްސީއަށް ޖޮރެލް ހާޓޯ ގެނައުމަށް 37 މިލިއަން ޕައުންޑަށް އަޔަކްސް އާއެކު އެއްބަސްވުމަކަށް އަތުވެއްޖެއެވެ.

19 އަހަރުގެ ނެދަލޭންޑްސް ޑިފެންޑަރު ޗެލްސީއާއެކު 2032 ވަނަ އަހަރާ ހަމައަށް 7 އަހަރުގެ އެއްބަސްވުމެއްގައި ސޮއިކުރުމަށް ވަނީ ހަމަޖެހިފައެވެ. އޭނާ މިހާރުވަނީ ލަންޑަނަށް ދަތުރުކޮށް މެޑިކަލް ޓެސްޓް ހެދުމުގެ ހުއްދަ ލިބިފައެވެ.

ހާޓޯއަކީ ލެފްޓް ބެކް އަދި ސެންޓަރު ބެކްގެ ޕޮޒިޝަންގައި ކުޅެން ކުޅަދާނަ ކުޅުންތެރިއެކެވެ. އޭނާ އަޔަކްސްގެ ސީނިއަރ ޓީމަށް ފުރަތަމަ ކުޅުނީ 2023 ވަނަ އަހަރުގެ ފެބްރުއަރީ މަހުގައި 16 އަހަރާއި 335 ދުވަސް އުމުރުގައެވެ.

އޭނާ މިހާތަނަށް އަޖެކްސްއަށް 75 މެޗު ކުޅެފައިވާއިރު، 2023 ވަނަ އަހަރުންފެށިގެން ނެދަލޭންޑްސްގެ ސީނިއަރ ޓީމުންވެސް ހާޓޯއަށް ޖާގަލިބެމުންދެްއެވެ. އަޔަކްސްއިން ހާޓޯ ވިއްކާލަން ނިންމީ ވޭތުވެދިޔަ ދެ އަހަރު ޗެމްޕިއަންސް ލީގުގައި ނުކުޅެވުމުގެ ސަބަބުން ދަތިވެފައިވާ މާލީ ހާލަތު ރަނގަޅު ކުރުމަށެވެ.

ޗެލްސީން މި ސަމަރ ޓްރާންސްފަރގައި އިތުރު އެޓޭކިން ކުޅުންތެރިއަކު ގެނައުމަށް މަސައްކަތް ކުރަމުންދާއިރު، އާރްބީ ލައިޕްޒިގްގެ ޒަވީ ސިމޯންސްގެ އޭޖެންޓުންނާއެކު މަޝްވަރާތައް ކުރިއަށް ގެންގޮސްފައިވެއެވެ. އަދި ކްރިސްޓޯފަރ އެންކުންކު އަދި ނިކޮލަސް ޖެކްސަން ފަދަ ކުޅުންތެރިން ވިއްކާލުމަށްވެސް ކްލަބުން ވިސްނަމުންދެއެވެ.