ދެ ޤައުމަށް ފައިދާ ކުރާނެ އެތައް ކަމެއް ކުރެވިދާނެ ކަމަށާއި، އެގޮތުން ދިވެހިރާއްޖެއާއި ލަންކާއާ ގުޅޭ ކަނޑުގެ ސަރަހައްދުގެ މުއްސަނދިކަން ދެ ޤައުމަށް ނަފާވާނެހެން ބޭނުން ކުރުމުގެ ފުރުޞަތު އޮތް ކަމަށް ސްރީލަންކާގެ ރައީސް އަނޫރަ ކުމާރަ ޑިސެނާޔަކެ ވިދާޅުވެއްޖެވެ.

އެމަނިކުފާނު މިހެން ވިދާޅުވީ ލަންކާ މޯލްޑިވްސް ބިޒްނަސް ކައުންސިލްގެ ބައްދަލުވުމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

 ބައްދަލުވުމުގައި ވާހަކަފުޅު ދައްކަވަމުން ސްރީލަންކާގެ ރައީސް އަނޫރަ ކުމާރަ ޑިސެނަޔަކަ ވަނީ 2022 ވަނަ އަހަރު އެ ޤައުމަށް ކުރިމަތިވި އިޤްތިޞާދީ ކާރިސާއިން އަރައިގަތުމަށް ގިނަ ފިޔަވަޅުތަކެއް އަޅައި އެކި ސިޔާސަތުތައް ތަންފީޒުކުރަމުންދާކަން ފާހަގަކުރައްވާފައެވެ. އެމަނިކުފާނު ވަނީ މި ބަދަލުތަކާއެކު ލަންކާގައި ސިޔާސީ ހަމަޖެހުން ޤާއިމުކުރެވި އިންވެސްޓަރުންނަށް ފަހި މާހައުލެއް ޤާއިމު ކުރެވިފައިވާ ކަމަށް ވިދާޅުވެފައެވެ.

"އަޅުގަނޑުމެންގެ ކަނޑުގެ ސަރަހައްދަކީ ޤުުދުރަތީ ވަސީލަތް މުއްސަންދި ސަރަހައްދެއް. އެހެންވީމަ ގުޅިގެން މަސައްކަތް ކުރެވޭނެ. ޙާއްސަކޮށް ކާބޯތަކެތީގެ ދާއިރާގެ ތެރެއިން މަހުގެ އުފެއްދުންތައް ތައްޔާރުކުރުމާއި، އެކުއަކަލްޗަރ ފަދަ ދާއިރާތަކުން. ކަނޑުގެ ވަސީލަތްތަކަށް ހަމަހަމަ ފުރުސަތުތަކެއް އޮތްއިރު، ދެމެހެއްޓެނިވިކަމަށް އިސްކަންދީގެ ދެ ޤައުމުގެ ވިޔަފާރިތައް ގުޅިގެން މަސައްކަތް ކުރެވޭނެ" ސްރީލަންކާގެ ރައީސް ވިދާޅުވިއެވެ.

ސްރީލަންކާގެ ރައީސް ދިވެހިރާއްޖެއަށް ކުރެއްވި ފުރަމާނަ ދަތުފުޅުގެ ތެރެއިން، ސްރީލަންކާ މޯލްޑިވްސް ބިޒްނަސް ކައުންސިލުގެ ބައްދަލުވުމުގައި ބައިވެރިވެވަޑައިގެންނެވިއެވެ. މި ބައްދަލުވުމުގައި އިޤްތިޞާދީ ތަރައްޤީއާއި ވިޔާފަރިއާއި ބެހޭ ވަޒީރު މުޙައްމަދު ސައީދު، ވަނީ ރާއްޖެއާއި ލަންކާ ދެމެދު އަހަރެއްގެ މައްޗަށް 162 މިލިޔަން ޑޮލަރުގެ ވިޔަފާރިކުރެވޭކަން ފާހަގަކުރައްވާފައެވެ. އަދި އެކަމުން ދެ ޤައުމުގެ ދެމެދު އޮތް ޒަމާންވީ ގުޅުމާއި ވިޔަފާރީގެ ބަދަހި ގުޅުން ދައްކުވައިދޭ ކަމަށް ވަޒީރު ވިދާޅުވިއެވެ.

އިޤްތިޞާދީ ވަޒީރު ވަނީ ލަންކާގެ އިޤްތިޞާދީ ހާލަތު ބަދަލުކުރުމަށް ރައީސް ޑިސެނަޔަކަ އަޅުއްވާ ފިޔަވަޅުތަކަށް މަރުޙަބާ ދަންނަވާފައެވެ. އަދި މި ފިޔަވަޅުތަކާއެކު، ލަންކާއަކީ ސަރަހައްދުގައި ބަރޯސާވެވޭ ބައިވެރިއެއްކަން ސާބިތުކޮށްދީފައިވާ ކަމަށް ވަޒީރު ވިދާޅުވިއެވެ.