ލަންކާގައި ދިރިއުޅޭ ދިވެހިންނަށް މެޑިކަލް އަދި ސްޕައުސް ވިސާ 1 އަހަރު ދުވަހަށް ދޭން ފަށައިފި

5 އޯގަސްޓު 2025 - 15:57

ސްރީލަންކާގައި ދިރިއުޅޭ ދިވެހި ރައްޔިތުންނަށް ދޫކުރާ މެޑިކަލް ވިސާ އަދި ސްޕައުސް ވިސާގެ މުއްދަތު އެއް އަހަރު ދުވަހަށް އިތުރުކުރުމަށް ސްރީލަންކާ ސަރުކާރުން ނިންމައިފިއެވެ.
ދިވެހި ޚާރިޖިއްޔާ އިން ބުނިގޮތުގައި މި ބަދަލު ތަންފީޒުކުރަން ފަށާފައި ވަނީ 2025 ވަނަ އަހަރުގެ އޮގަސްޓް 1 ވަނަ ދުވަހުން ފެށިގެންނެވެ.

Ad by Hajj Corporation
ދިވެހި ޚާރިޖީ ވުޒާރާއިން މިކަން ހާމަކުރަމުން ބުނެފައިވަނީ، ސްރީލަންކާއަކީ ގިނަ އަދަދެއްގެ ދިވެހިން ދިރިއުޅެމުންދާ އަދި ޞިއްޙީ ފަރުވާ ހޯދުމަށް ދަތުރުކުރާ ޤައުމަކަށްވެފައި، މި ނިންމުމަކީ ދިވެހި ރައްޔިތުންނަށް ވިސާއާ ގުޅޭ ކަންކަމުގައި ދިމާވާ ގޮންޖެހުންތަކަށް ލިބިގެންދާނެ ޙައްލެއް ކަމަށެވެ.
މި ބަދަލާއެކު، ސްރީލަންކާގެ ރައްޔިތުންނާ ކައިވެނިކޮށްގެން އުޅޭ ދިވެހިންނަށް ދޫކުރާ ސްޕައުސް ވިސާގެ މުއްދަތުވެސް އެއް އަހަރު ދުވަހަށް އިތުރުވެގެންދާނެއެވެ. އަދި ލަންކާގައި ވަޒީފާ އަދާކުރާ ނުވަތަ މަތީ ތައުލީމް ހާސިލްކުރާ ދިވެހިންގެ އަނބިން/ފިރިންނަށް ވެސް އެއް އަހަރުގެ ވިސާ ލިބޭ ގޮތް ވަނީ ހަމަޖައްސައިފައެވެ.
ވިސާއަށް އެދޭ ފަރާތްތަކުގެ ސަމާލުކަމަށް
ދިވެހި ޚާރިޖިއްޔާއިން ވިސާއަށް އެދި ހުށަހަޅާ ފަރާތްތަކުގެ ސަމާލުކަމަށް ގެނެސްދީފައިވާ ގޮތުގައި، ސެކިއުރިޓީ ކްލިއަރެންސްއަށް ހުށަހަޅަންޖެހޭ ލިޔެކިޔުންތައް ފުރިހަމަކުރުމަކީ އެންމެ މުހިންމު އެއް ކަމެވެ. ސެކިއުރިޓީ ކްލިއަރެންސްގެ ރެކޯޑުގައި އެއްވެސް މައްސަލައެއް ފާހަގަކުރެވިއްޖެނަމަ، ވިސާ ބާޠިލުވުން ފަދަ ނޭދެވޭ ނަތީޖާއެއް ކުރިމަތިވެދާނެކަމަށް ސްރީލަންކާ ސަރުކާރުން ވަނީ އިންޒާރުދީފައެވެ.
މި ބަދަލުތައް އައިސްފައިވަނީ ޖުލައި 28 އިން 30 އަށް ސްރީލަންކާގެ ރައީސް އަނޫރާ ކުމާރާ ޑިސަނާޔަކެ ރާއްޖެއަށް ކުރެއްވި ފުރަމާނަ ދަތުރުފުޅާ ގުޅިގެންނެވެ. މި ދަތުރުފުޅުގައި ދެ ޤައުމުގެ މެދުގައި ވަނީ ގިނަ އެއްބަސްވުންތަކެއްގައި ސޮއިކުރެވިފައެވެ.