ސްރީ ލަންކާއަށް ސަލާމަތީ ގޮތުން ނުރައްކަލެއް ކުރިމަތިވެދާނެ ބޭރު ގައުމުތަކުގެ ލިސްޓުން، ރާއްޖެ ރަސްމީކޮށް އުނިކޮށްފައިވާ ކަމަށް ލަންކާގެ ނޫސްތަކުން ރިޕޯޓުކޮށްފިއެވެ.

މިކަމާ ގުޅޭގޮތުން ދިވެހި ސަރުކާރާއި، ސްރީލަންކާ ސަރުކާރުން ރަސްމީ ބަޔާނެއް އަދި ނެރެފައެއް ނުވެއެވެ.

ލަންކާއަށް ސަލާމަތީގޮތުން ނުރައްކަލެއް ކުރިމަތިވެދާނެ ބޭރު ގައުމުތަކުގެ ލިސްޓުގައި ދިވެހިރާއްޖެ ހިމެނުނީ 2019 ވަނަ އަހަރު ލަންކާގައި ދިން ހަަމަލާތަކަށް ފަހު، އެ ގައުމުގެ ސަލާމަތީ ކަންކަން ވަރުގަދަ ކުރުމުގެ ތެރެއިންނެވެ.

މި ހަމަލާތަކުގައި 258 މީހުން މަރުވެ، ސްރީލަންކާގެ އެތެރޭގެ ސަލާމަތީ ސިޔާސަތުތަކަށް ބޮޑެތި ބަދަލުތަކެއް ގެންނަންޖެހުނެވެ. \

2020 ވަނަ އަހަރުގެ ފެބްރުއަރީ މަހު ދިން ހަމަލާތަކާ ގުޅުންހުރިކަމަށް ބެލެވޭ 4 ދިވެއްސެއްގެ ނަންވެސް ލަންކާ ފުލުހުން ވަނީ ހާމަކޮށްފައެވެ.

ރިޕޯޓުތައް ބުނާގޮތުން މި ލިސްޓުން ރާއްޖެ އުނިކުރެވުނީ ސްރީލަންކާގެ ރައީސް އަނޫރާ ކުމާރާ ދިސަނަޔަކަ ދިވެހިރާއްޖެއަށް ކުރެއްވި ދަތުރުފުޅަށް ފަހުއެވެ.