ކުރިމަގުގައި ދުނިޔެއަށް ބޭނުންވަނީ ޣައްޒާގައި ހިންގަމުންދާ ގަތުލްއާންމު ނިމުމަކަށް ގެނެސް، ފަލަސްތީނަކީ އދ. މެންބަރު ގައުމެއްގެ ގޮތުގައި ބަލައިގަންނާނެ ދުނިޔެއެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އދ. ގައި ރޭ ފެށި، "ސަމިޓް އޮފް ދަ ފިއުޗާ" ގައި ތަގުރީރު ކުރައްވަމުން ރައީސް ވިދާޅުވީ، މާދަމާ ދުނިޔެ ލީޑުކުރަން ތިބި ބަޔަކީ މިއަދުގެ ޒުވާނުން ކަމަށާއި، އެ ޒުވާނުންގެ ޖީލު ބާރުވެރިކުރުވުމުގެ މަސައްކަތް މިއަދު ކުރަން ޖެހޭ ކަމަށެވެ. އެގޮތުން ދުނިޔޭގެ މުސްތަގުބަލު ބިނާކުރުމުގައި ޒުވާނުންގެ ދައުރު ވަރަށް މުހިންމު ކަމަށާއި، މިއަދު ވެސް، ދުނިޔޭގެ ވެށި ބިނާކުރަނީ އެ ޒުވާނުން ކަމަށް ރައީސް ވިދާޅުވިއެވެ.

ޒުވާނުން ބާރުވެރި ކުރުވަން އެބަޖެހޭ. ޒުވާނުންނަކީ މިއަދުގެ ދުނިޔެ ބައްޓަން ކުރަނީ އެ ޒުވާނުން. މާދަމާގެ ދުނިޔޭގައި އެިސްކޮށް ތިބޭނީ ވެސް އެ ޒުވާނުން، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ، އެ ޒުވާން ޖީލަށް ބައިނަލްއަގުވަމީ މަލްޓިރޭޓަރަލް ސިސްޓަމެއް ތައްޔާރުކުރުމުގެ މަޝްވަރާކުރާއިރު، މިއަދަކީ އެ ނިޒާމުގެ ތެރެއިން ނަތީޖާ ނެރެ، އދ. އިން ނިންމާ ނިންމުންތަކާ މެދު ފިޔަވަޅު އަޅަންޖެހޭ ވަގުތު ކަމަށެވެ. އެގޮތުން އަންނަން އޮތް ޖީލުތަކުން، މިއަދުގެ މަސައްކަތްތައް މިނެކިރާނީ، މިއަދު އަޅާ ވަރުގަދަ ފިޔަވަޅުތަކުން ކަމުގައި ރައީސް ވިދާޅުވިއެވެ.

އެއާއެކު، އަންނަން އޮތް ޖީލުތަކުން ބޭނުންވަނީ، ދިމަވާ ކާރިސާތަކާ ކުރިމަތިލައި އެކަންކަމަށް ޙައްލު ހޯދައިދޭނެ ބައެއް ކަމުގައި ރައީސް ވިދާޅުވިއެވެ. އޭގެ މިސާލެއްގެ ގޮތުގައި، ފަލަސްތީނުގައި ހިންގާ ގަތުލް ޢާންމު ހުއްޓުވައި، އދ. ގެ ފުރިހަމަ މެންބަރުކަން ދިނުމުގެ ހިތްވަރު އެ ޖީލުގައި ހުންނަން ބޭނުންވާ ކަމުގައި ރައީސް ވިދާޅުވިއެވެ.

ބޭނުންވަނީ ޣައްޒާގައި ހިންގާ ގަތުލްއާންމު ނިމުމަކަށް ގެނެސް، އދ. ގެ ފުރިހަމަ މެންބަރުކަން ފަލަސްތީނަށް ދިނުމުގެ ހިތްވަރު. އަދި އިންސާނީ ކަރާމާތަށް އަރައިގަންނަ މީހުން ޖަވާބުދާރީ ކުރެވޭނެ ހިތްވަރު. އަންނަން އޮތް ޖީލުތަކުން ބޭނުންވަނީ އެ ހިތްވަރު، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސްގެ ވާހަކަފުޅުގައި، މަލްޓިރޭޓަލް ސިސްޓަމަކާއި، ބައިނަލްއަގުވާމީ ހިންގުމުގެ މުސްތަގުބަލު ބިނާވެފައިވަނީ ޒުވާނުންގެ ހަރަކާތްތެރިވުމުގެ މައްޗަށް ކަމުގައި ވިދާޅުވިއެވެ. އެހެންކަމުން މިއަދު ވެސް، ސިޔާސަތުތައް ބައްޓަން ކުރަން ޖެހޭނީ ހަމައެކަނި މުސްތަގުބަލަށް ވިސްނައިގެން ނޫން ކަމަށާއި މިއަދުގެ ޒުވާނުންގެ އަޑުތަކާއި އުއްމީދުތައް ވެސް، އެ ސިޔާސަތުތަކުގައި ހިމެނެން ޖެހޭ ކަމުގައި ރައީސް ވިދާޅުވިއެވެ.