ހަޤީޤަތެއްނެތް ކަންކަމުގެ މައްޗަށް ބިނާކޮށް ދައްކާ ވާހަކައަކުން އޭނާ ކުރާ ސިޔާސީ މަސައްކަތް ނުހުއްޓުވޭނެކަމަށް ދުށުމީ މޮޔަކެމއްކަމަށް ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާޢު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝުޖާޢު ވިދާޅުވެފައިވަނީ، އޭނާ އާއި އަދި އޭނާގެ ވިޔަފާރި ކުންފުނި އޮފިޝަލް އިވެންޓްސްއާ ގުޅޭގޮތުން ފެތުރެމުންދާ ވާހަކަތަކަކީ އަސްލެއް އޮތް ނުވަތަ ފޭކް އެއްޗެއްކަން ދެނެގަތުމަށް ދަތިވާ ކަމަށެވެ. އެއީ އެއްވެސް ރަސްމީ އިދާރާއަކުން އެކަމާ ގުޅޭ މަޢުލޫމާތެއް ލިބިފައިނުވާތީ ކަމަށް އޭނާ ވިދާޅުވިއެވެ.

Ad by Hajj Corporation

"އެއީ ޞައްޚަ ލިޔުމެއް ނަމަ، އެއީ މަސައްކަތްތައް ކާމިޔާބު ކުރިގޮތާއި މަސައްކަތް ކުރިގޮތް ވަރަށް ބޮޑަށް އޮޅޭގޮތަށް ނުވަތަ ގަސްދުގައި ހަޤީޤަތް އޮޅުވާލައި، އަޅުގަނޑުގެ ޙިއްސާވާ ވިޔަފާރި ކުންފުންޏަށް ގެއްލުން ދިނުމުގެ މަގްޞަދުގައި ކޮށްފައިވާ ކަމެއް،" ޝުޖާޢު ވިދާޅުވިއެވެ.

ޝުޖާޢު އިތުރަށް ވިދާޅުވީ، އޭނާގެ ކުންފުންޏަކީ ދިވެހިރާއްޖޭގެ ޤާނޫނުތަކާއި ޤަވާއިދުތަކުގެ ތެރެއިން މަސައްކަތްކުރާ ކުންފުންޏެއް ކަމަށާއި، ރައީސް ޔާމީން، ރައީސް ޞާލިޙް އަދި ރައީސް ޑރ. މުޢިއްޒުގެ ވެރިކަމުގައިވެސް އެކި ޕްރޮޖެކްޓުތައް ކާމިޔާބުކަމާއެކު ހިންގާފައިވާ ކަމަށެވެ.

ޝުޖާޢު އިތުރަށް ފާހަގަކުރެއްވި ގޮތުގައި، އޭނާގެ ހިއްސާ އޮންނަ އެއްވެސް ކުންފުންޏަކާ ގުޅޭގޮތުން މިއަދާ ހަމައަށްވެސް އެއްވެސް އިދާރާއަކުން މައްސަލައެއް ބަލާފައެއް ނުވެއެވެ. އަދި މިފަދަ ހަޤީޤަތެއްނެތް ކަންކަމުގެ މައްޗަށް ބިނާކޮށް ދައްކާ ވާހަކައަކުން އޭނާ ކުރައްވާ ސިޔާސީ މަސައްކަތް ހުއްޓުވޭނެ ކަމަށް ދުށުމީ މޮޔަކަމެއްކަމުގައި ވެސް އޭނާ ވިދާޅުފަވެއެވެ.