އަތޮޅުތައް އުވާލުމަކީ ކުރަންއުޅޭކަމެއްނޫންކަމަށާއި، ގެންނާނީ ރައްޔިތުން އެދޭ ހެޔޮބަދަލުކަމަށް ބާރަށު ދާއިރާގެ މެމްބަރު އިބްރާހީމް ޝުޖާޢު ވިދާޅުވެއްޖެއެވެ.

ޝުޖާޢު މިފަދައިން ވިދާޅުވީ، ރާއްޖޭގެ އަތޮޅުތައް އުވާލަން އުޅޭކަމަށް ދޭހަވާ މޭރަމަކުން އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު އެކްސްގައި ކުރެއްވި ޕޯސްޓަކާއި ގުޅިގެންނެވެ.

Ad by Hajj Corporation

ވަހީދުގެ ޕޯސްޓަށް ރައްދުދެއްވައި ޝުޖާޢު ވަނީ، އަތޮޅު އުވާލަން އުޅެނީ ކޮންބައެއްތޯ ސުވާލުކުރަށްވާފައެވެ. އަދި އަތޮޅު އުވާލުމަކީ މި ސަރުކާރުން ކުރަން އުޅޭ ކަމެއް ނޫންކަމަށް ވިދާޅުވެފައެވެ.

ޝުޖާޢު ވިދާޅުވީ، ގެންނާނީ ރައްޔިތުން ތާޢީދު ކުރާނެ ހެޔޮ ބަދަލު ކަމަށެވެ. އަދި އެބަދަލަށް ހިޔާލު ދިނުމުގެ ފުރުސަތު ވަހީދުމެންނަށް ވެސް އޮންނާނެކަމަށް ވިދާޅުވިއެވެ.

‏’’އަޅުގަނޑު ދެރަވަނީ ވައްޑެ އިންނެވި މަޖިލީހަކުން ޤާނޫނަށް ބާރުދެއްވައި އެތަންފީޒު ކުރުމަށް އަޅުގަނޑު އިން ކައުންސިލަކުން މަސައްކަތް ކުރުމުން އެކަމަށް ވައްޑެމެންގެ ސަރުކާރުން ހުރަސް އެޅީމަ.އެދުވަހު ވައްޑެ އަނގައިން އެއްވެސް ބަހެއް ނުނިކުތޭ އިނގޭތޯ؟ހަމަ ނުނިކުތީއޭ އިނގޭތޯ!އެހެން ވީމާ ނިޒާމާ ބީރައްޓެހީ ކޮން ބައެއްތޯ؟މިމަޢުޟޫގައި ސިޔާސީ ވާހަކަ ނުދައްކަވަމާ ބަހީ!’’ ޝުޖާޢު ވިދާޅުވެފަވެއެވެ.

ޝުޖާއު ވަނީ މި ސަރުކާރުން (ޕީއެންސީ) އާއި މިހާރުގެ އިދިކޮޅު (އެމްޑީޕީ) ކުރި ތަޖުރިބާގެ އަލީގައި ރައްޔިތުން ބޭނުންވާ ނުވަތަ އެދޭގޮތައް ބަދަލު ގެންނައުމަށް ދެބައި މީހުން އެކުގައި މަސައްކަތް ކުރުމަށް އެދިވަޑައިގެންފައެވެ.