ފުލުހުންގެ ޑިއުޓީގައި އުޅެނިކޮށް 2012 ވަނަ އަހަރު ޕޮލިސް ސާޖަންޓް އާދަމް ހަލީމަށް ތޫނު އެއްޗަކުން ހަމަލާދީ މަރާލި މައްސަލައިގައި ދައުލަތުން ދައުވާ އުފުލި މުހައްމަދު ސަމާހު މަރަން ދަށު ކޯޓުތަކުން ކުރި ހުކުމު ސްޕްރީމް ކޯޓުގައި އިސްތިއުނާފުކުރުމުން އެ ހުކުމް ބާތިލުކުރުމަށްފަހު މައްސަލަ އަލުން ބެލުމަށް ސުޕްރީމް ކޯޓުން މިއަދު ހުކުމްކޮށްފިއެވެ.

ސްޕްރީމް ކޯޓުގައި މިއަދު ކުރިއަށް ގެންދިޔަ ހުކުމް ކުރުމުގެ އަޑުއެހުމުގައި ސަމާހުގެ މައްޗަށް ކޮށްފައިވާ މަރުގެ ހުކުމް ވަނީ ބާތިލުކޮށްފައެވެ. 2013 ވަނަ އަހަރު ސަމާހުގެ މައްޗަށް މަރުގެ ހުކުމެއް ކްރިމިނަލް ކޯޓުން އިއްވާފައިވާއިރު، އޭނާ ޖަލުގައި ހުކުމް ތަންފީޒު ކުރަމުންދާތާ މިހާރު 12 އަހަރުވެއްޖެއެވެ.

އާދަމް ހަލީމަށް ހަމަލާދީ މަރާލި ކަމަށް ކުރިމިނަލް ކޯޓުގައި ސަމާހު ފުރަތަމަ އެއްބަސްވި ނަމަވެސް ފަހުން، އެކަމަށް ވަނީ އިންކާރުކޮށްފައެވެ. އަދި އެގޮތަށް އިއުތިރާފްވީ މަޖުބޫރު ކުރުމުން ކަމަށް ފަހުން ވަނީ ބުނެފައެވެ.

ކ. ކާށިދޫއަށް އުފަން އާދަމް ހަލީމް މަރާލީ ޖުލައި 22، 2012 ވަނަ ދުވަހުގެ ރޭ ދަންވަރު ޑިއުޓީއަށް ދިއުމަށް ދިޔަ މަގުމަތީގައި، ގޭބަންދުގައި ހުންނަން ޖެހޭ ރައްޔިތަކު ބަންދުން ވީއްލި ރަށު ތެރޭގައި އުޅޭ ތަން ފެނުމުން އޭނާއަށް ނަސޭޙަތްދީ ގާނޫނަށް ބޯލެނބުމަށް އެދުމުން ކަމަށް ދައުލަތުން ކުރިން ވިދާޅުވެފައިވެއެވެ.

ކާށިދޫ ސުވާސާގޭ ސަމާހުގެ މައްޗަށް ކްރިމިނަލް ކޯޓުން ޖެނުއަރީ 2013 ވަނަ އަހަރު ކުރި މަރުގެ ހުކުމް ހައި ކޯޓުން ދެމެހެއްޓީ ސެޕްޓެމްބަރު 2020 ގައެވެ.

މިއަދުގެ އަޑުއެހުމުގައި ފަނޑިޔާރު ހުސްނުއްސޫދު ވިދާޅުވީ ޤާނޫނު އަސާސީގެ 52 ވަނަ މާއްދާގައި ބުނެފައިވަނީ މީހަކަށް މަޖުބޫރުކޮށްގެން ބަޔާން ހޯދުމާއި ޤާނޫނާ ޚިލާފު ހެކި ހޯދުމަކީ އެއްވެސް ފަރާތަކުން ކޮށްގެންވާނެ ކަމެއް ނޫން ކަމަށާއި އަދި ޤާނޫނާ ޚިލާފަށް ހޯދާ ބަޔާންތަކާއި ހެކިތައް ޝަރީއަތަށް ޤަބޫލުކޮށްގެން ނުވާނޭކަމަށެވެ.

ހުކުމް އިއްވަވަމުން ފަނޑިޔާރު ހުސްނުއްސުއޫދު ވިދާޅުވީ، މީހަކު ކުށަކަށް އެއްބަސް ވިޔަސް، އެ މީހެއްގެ މައްޗަށް ކުށް ސާބިތުވާ ކަމަށް ނިންމޭނީ އެ މީހަކު ދައްކާ ވާހަކަތައް އެއްވެސް ޝައްކެއް ނެތް މިންވަރަށް ކަށަވަރު ކުރުމަށްފަހު ކަމަށެވެ. އަދި ގަސްތުގައި މީހަކު މަރާލުމުގެ ނިޔަތް އޭނާގެ ނެތް ކަމަށް ބުނެ ސަމާހު ކުރިން ދިން ބަޔާނަށް އިންކާރުކޮށްފައިވާކަން ފަނޑިޔާރު ފާހަގަކުރެއްވިއެވެ.

ހުސްނުއްސޫދު ވިދާޅުވި ގޮތުގައި، ސަމާހު ކުރިން ދީފައިވާ ބަޔާނުގައި ހުރި ވާހަކަތަކުން އޭނާ އާދަމް ހަލީމު މަރާލުމުގެ ނިޔަތް އޮތްކަން ހާމަވާ ކަމަށް ޕްރޮސެކިއުޝަނުން ވަނީ ބުނެފައެވެ. ނަމަވެސް ހުސްނުއްސޫދު ވިދާޅުވި ގޮތުގައި ސަމާހު ގަސްތުގައި މީހަކު މަރާލިކަމުގެ ނިޔަތް އޮތްކަން ސާފެއް ނޫނެވެ. އަދި ސަމާހު ކުރިން ދީފައިވާ ބަޔާނުގައި ޕްރޮސެކިއުޝަނުގެ ދައުވާއަށް މަގުފަހިވާ ގޮތަށް ހުރި ތަންތަންކޮޅު ހޮވައިގެން ބައިތައް ވަކިކޮށް ރޫޅާލައިގެން ސަމާހުއާ ދެކޮޅަށް ހުރި ބައިތައް ބޭނުންކުރުމަކީ ރަނގަޅު ގޮތެއް ނޫން ކަމަށް ވަނީ ވިދާޅުވެފައެވެ.

ސަމާހު ކުރިމިނަލް ކޯޓުގައި ކުށަށް އިއުތިރާފްވުމުން އެ މައްސަލައިގެ އިތުރު ހެކި ފުލުހުން ހޯދާފައިނުވާ ކަމަށާއި ސަމާހު ކުރިން ދިން ބަޔާނުގައި އޭނާ ކުށަށް އިއުތިރާފްވީ މަޖުބޫރުކޮށްގެން ކަމަށް ފަހުން ދިން ބަޔާނުގައި ބުނެފައިވާ ކަމަށް ހުސްނުއްސޫދު ވަނީ ވިދާޅުވެފައެވެ. މި މައްސަލައިގައި ފުލުހުން އިތުރު ހެކި ހޯދަން މަސައްކަތްކޮށްފައި ނުވާތީ އާއި ސަމާހުގެ މައްޗަށް މަރުގެ ހުކުމެއް އިއްވީ އޭނާ މަޖުބޫރުން ދީފައިވާ ބަޔާނެއްގެ މައްޗަށް ބިނާކޮށް ކަމަށް ސްޕްރީމް ކޯޓުން ވަނީ ނިންމާފައެވެ.