ކުރީގެ ރައީސް އަބްދުﷲ ޔާމީންގެ މައްޗަށް ކުރިން އިއްވާފައިވާ 11 އަހަރުގެ ޖަލު ހުކުމާ ގުޅޭ މައްސަލަ އަލުން ބެލުމުގައި އާ ހެކި ބަލައިގަތުމަށް ދައުލަތުން ހުށަހެޅި މައްސަލަ ސުޕްރީމް ކޯޓުން ބަލައިގަތުމަށް ނިންމައިފިއެވެ.

ވ. އާރަށް ކުއްޔަށް ދޫކުރުމުގެ މުޢާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ބަލައިގަތުމާއި އެ ފައިސާ ލޯންޑަރ ކުރުމުގެ ތުހުމަތުގައި ޔާމީންގެ މައްޗަށް ކުރިން އިއްވާފައިވާ ހުކުމް ހައިކޯޓުން ބާޠިލްކޮށް، މައްސަލަ އަލުން ބެލުމަށް އަންގާފައިވެއެވެ. ނަމަވެސް މައްސަލަ އަލުން ބަލާއިރު ދައުލަތުން ހުށަހެޅި އާ ހެކިތައް ބަލައިނުގަތުމަށް ހައިކޯޓުން ނިންމާފައިވާތީ، މި ނިންމުމާމެދު ދައުލަތުން ސުޕްރީމް ކޯޓަށް ހުށަހެޅި މައްސަލަ މިހާރު ވަނީ ބަލައިގަނެފައެވެ.

މީގެ އިތުރުން، މި މައްސަލައިގައި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމްގެ މައްޗަށް އިއްވާފައިވާ ހުކުމްވެސް ހައިކޯޓުން ބާޠިލްކޮށްފައިވާއިރު، އޭނާގެ މައްސަލަވެސް ސުޕްރީމް ކޯޓުން ވަނީ ބަލައިގަނެފައެވެ.

ސުޕްރީމް ކޯޓުން މި މައްސަލަ ބަލައިގަތް ނަމަވެސް، އަދި އެ ކޯޓުގައި މައްސަލައިގެ އަޑުއެހުންތަކެއް ބޭއްވިފައެއް ނުވެއެވެ. އެހެންނަމަވެސް، އާރަށް މައްސަލައިގެ ޝަރީޢަތް މާދަމާ އަލުން ފެށުމަށް ކްރިމިނަލް ކޯޓުން ވަނީ ތާވަލްކޮށްފައެވެ.

މި މައްސަލައިގެ ކުރިއަށް އޮތް ތާވަލާއި ހިނގާނެ ގޮތާ ބެހޭ އިތުރު މަޢުލޫމާތު ކުރިއަށް އޮތް ދުވަސްތަކުގައި ހާމަވެގެންދާނެ ކަމަށް ބެލެވެއެވެ.