ކުށެއްގެ ތުޙުމަތުގައި ހައްޔަރުކޮށްފައިނުވާ މީހެއްގެ އޯޑިއޯ ސާމްޕަލް ނެގުމަށް އަމުރެއް ނުކުރެވޭނެ ކަމަށާއި ޖިނާޢީ އިޖުރާޢަތުގެ ޤާނޫނުގެ 48 ވަނަ މާއްދާއާ ޙަވާލާދީ އެފަދަ އަމުރެއް ނެރެވޭނީ ކުށެއްގެ ތުހުމަތުގައި ހައްޔަރުކޮށްފައިވާ ފަރާތެއްގެ މައްޗަށްކަމަށް ދިވެހިރާއްޖޭގެ ސްޕްރީމް ކޯޓުން ކަނޑައަޅައިފިއެވެ.

އެގޮތުން، ކުށެއްގެ ތުހުމަތު ކުރެވޭ މީހެއްގ ފޮޓޯ އަދި އޯޑިއޯ ސާމްޕަލް ނެގުމަށް ނެރެފައިވާ އަމުރަކީ ޖިނާއީ އިޖުރާއަތުގެ ޤާނޫނުގެ 48 ވަނަ މާއްދާގެ ދަށުން ނެރެވިދާނެ އަމުރެއްކަން ނުވަތަ ނޫންކަން ބަލަންޖެހޭކަމަށްވެސް ސްޕްރީމް ކޯޓުން މިއަދު ނިންމު ނިންމުމުގައި ބަޔާންކޮށްފައިވެއެވެ.

އޭގެ އިތުރުން، މައްސަލައަކާ ގުޅުގެން ދައުލަތުން މީެހއްގެ މައްޗަށް ދައުވާ އުފުލުމަށް ނިންމައިފިނަމަ، އަދި އެހާތަނަށް އޭނާގެ ފޮޓޯ އަދި އޯޑިއޯ ދިނުމަށް އޭނާ އެއްބަސްވެފައިނުވާނަމަ، އޭނާ އިންކާރު ކުރި ކުރުމަކީ ޤާނޫނީ ގޮތުން ބަލައިގަނެވޭނެ އުޒުރެއްކަން ނުވަތަ ނޫންކަން ކަނޑައަޅާނީ އެ މައްސަލައިގެ ޝަރީއަތުގައިކަމަށް ދެކިލައްވާކަމަށްވެސް ފަނޑިޔާރު އަޒްމިރަލްދާ ޒާހިރު ވިދާޅުވިއެވެ.

ފަނޑިޔާރު އަޒްމިރަލްދާގެ މި ރަޢުޔަށް ދެން ތިއްބެވިި ދެ ފަނޑިޔާރުންކަމަށްވާ ފަނޑިޔާރު މަހާޒް އަލީ ޒާހިރު އަދި ފަނޑިޔާރު ހުސްނުއްސުއޫދު ވަނީ ތާއީދު ކުރައްވާފައެވެ.

މި މައްސަލައާ ގުޅިގެން ހައިކޯޓުން މީގެ ކުރިން ނިންމާފައިވަނީ، އަމުރެއް ނެރެންޖެހޭ ކޮންމެ ފަހަރަކު އެމީހަކީ ހައްޔަރު ކުރަންޖެހޭ މީހެއްގެ ގޮތުގައި މާނަ ނުކުރެވޭނެ ކަމަށާއި އެގޮތަށް މާނަކުރާނަމަ މައްސަލަތައް ތަޙުޤީޤު ކުރުމުގައި ފުލުހުންނަށް އެތައް ހުރަސްތަކެއް ދިމާވާނެ ކަމަށެވެ.

ހައިކޯޓުގެ މި ނިންމުމުގައި ތަފާތުވި ރަޢުޔެއް ދެއްވާފައިވަނީ ފަނޑިޔާރު މުޙައްމަދު ޝަނީޒެވެ. ޝަނީޒް ފާހަގަ ކުރައްވާފައިވާ ގޮތުގައި މައްސަލައަކާ ގުޅިގެން ކާފީ ހެކި ލިބިފައިނެތް ޙާލަތުގައި މީހެއްގެ މައްޗަށް އެފަދަ އަމުރެއް ނެރުމަކީ އަމިއްލަ ނަފްސާ ދެކޮޅަށް ބަޔާނެއް ނުދިނުމުގެ ޙައްޤަށް ހުރަސް އެޅޭ ކަމެއް ކަމަށެވެ.

ދައުލަތުން ދެކޭ ގޮތުގައި ޖިނާއީ އިޖުރާއަތުގެ 48 ވަނަ މާއްދާ ކިޔުމުން އެމާއްދާގެ (ނ) ގައި ބަޔާން ކުރާ “ކުށުގެ ތުހުމަތުގައި ހައްޔަރުކޮށްފައިވާ މީހާ” ގެ މާނައިގެ ތެރޭގައި ކުށުގެ ތުހުމަތުގައިވާ މީހާވެސް ހިމެނިގެން ދާނެއެވެ. އެގޮތުން އެ އަކުރުގައި ބަޔާންކުރާ އިޖުރާއަތު ހަމައެކަނި ހިނގާނީ ހައްޔަރުކޮށްފައިވާ މީހުންގެ މައްޗަށް ނޫންކަމަށް ދައުލަތުން ފާހަގަކުރިއެވެ.