ވެލާނާ އިންޓަނޭޝަނަލް އެއަރޕޯޓުގެ ތަރައްޤީއަށް ހުރިހާ ފައިސާއަކާއި ކޮންޓްރެކްޓަރާއި ހުރިހާކަމެއް ހަމަޖެހިފައި އޮތްއިރުވެސް މަސައްކަތުގެ ހަމައެކަނި ޓަމިނަލްގެ މަސައްކަތް ނުނިމި 5 އަހަރުވެގެންދިޔުމަކީ އެކަމުގައި ކުރީ ސަރުކާރުގެ އިޚްލާސްތެރިކަން ނެތުން ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި ހޯމަ ދުވަހުގެ ރޭ ވާހަކަފުޅު ދައްކަވަމުން ވަޒީރު ވިދާޅުވީ، ރާއްޖޭގެ އިޤްތިޞާދު އިތުރު ހަރުފަތަކަށް ގެންދާނެ ބޮޑު ޢުމްރާނީ ތަރައްޤީގެ މަޝްރޫޢަކަށް މުޅި ޤައުމު ދަރަނިވެރިކުރުވި މަޝްރޫޢެއްކަމަށް ބަޔަކު ބުނާ ބުނުމަކީ ހަނި ވިސްނުމެއް ކަމަށެވެ.

Ad by Hajj Corporation

"އަޅުގަނޑު ވަރަށް ހައިރާންވޭ ޖީއެމްއާރަށް، އެއަރޕޯޓު ދިން ބޭފުޅުން، އޯވަރ ނައިޓުގަ އެއްޗެހީގެ އަގު ބޮޑުކުރި ބޭފުޅުން، އެނބުރި އެއީ ދަރަނީގެ ކޮންޓްރިބިއުޝަނަކޭ ވީއައިއޭއަކީ ބުނާތީ. އެއީ އެއްވެސް ޙަގީގަތެއް އޭގައި އޮތް ވާހަކައެއް ނޫން،" ވަޒީރު ވިދާޅުވިއެވެ.

ވަޒީރު ސަޢީދު ފާހަގަކުރެއްވި ގޮތުގައި ނިމިދިޔަ ދައުރުގައި ދަރަނި ދެއްކޭނެ އިންތިޒާމެއް ނެތި 40 ބިލިޔަން ރުފިޔާގެ ދަރަންޏެއް އުފައްދާފައިވެއެވެ. އަދި މަޝްރޫޢުގެ މަސައްކަތުގައި ފަރުވާ ކުޑަކުރުމުގެ ސަބަބުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެން ވަރަށް ކުޑަ މުއްދަތެއްގެ ތެރޭގައި ގިނަ މަސައްކަތްތަކެއް ކުރައްވަންޖެހިވަޑައިގަތް ކަމަށް ވިދާޅުވިއެވެ.

ވަޒީރު އިތުރަށް ފާހަގަކުރެއްވި ގޮތުގައި ރައީސް މުޢިއްޒު އެންމެ އިސްކަމެއް ދެއްވީ ދަތި އުނދަގޫތަކާއެކުވެސް ވީއެންމެ އަވަހަށް އެއަރޕޯޓުގެ އައު ޓަރމިނަލް އޮޕަރޭޝަނަލައިޒް ކުރެއްވުމަށެވެ.

މިއަދު އެއަރޕޯޓަކީ ދިވެހިން ފަޚުރުވެރިވާފަދަ އެސެޓަކަށް ހެދިފައިވާ ކަމަށާއި، އައު ޓަރމިނަލް އޮޕަރޭޝަނަށް ގެނެވުމާއެކު ފޮރިން އިންވެސްޓަރުންނަށްވެސް ރާއްޖެއާމެދު އިތުރު ޔަޤީންކަމެއް އުފެދިފައިވާ ކަމަށް ވަޒީރު ވިދާޅުވިއެވެ.