ފުވައްމުލަކުގައި ރޭ ދަންވަރު ހިނގި އެކްސިޑެންޓެއްގައި އުމުރުން 17 އަހަރުގެ ކުއްޖަކު ނިޔާވެއްޖެ އެވެ.

މި ހާދިސާއާ ގުޅިގެން ފުލުހުން ހާމަކޮށްފައިވާ ގޮތުގައި އެ ކުއްޖާ ނިޔާވީ، ފުވައްމުލަކު ފުނާޑު އަވަށުން ހުސްނުހީނާ މަގުން ސައިކަލެއްގައި ދަނިކޮށް ފާރުގައި ޖެހި ކޮންޓްރޯލް ނުވެ، މަގުބައްތި ހަރުކޮށްފައިވާ ހޮޅިދަނޑިއެއްގައި ޖެހިގެންނެވެ.

Ad by Hajj Corporation

މި އެކްސިޑެންޓުގައި ސައިކަލް ދުއްވަން އިން ކުޑަ ކުއްޖާ ހޮސްޕިޓަލަށް ގެންގޮސް ފަރުވާދެމުން ދަނިކޮށް، ރޭ 3:38 ހާއިރު ނިޔާވެފައިވާ ކަމަށް ފުވައްމުލަކު ހޮސްޕިޓަލާ ހަވާލާދީ ފުލުހުން ވިދާޅުވިއެވެ.

ފުލުހުން ވިދާޅުވީ ފުވައްމުލަކުގައި ދުއްވާފައި ދިޔަ ސައިކަލެއް ފާރުގައި ޖެހި ކޮންޓްރޯލް ނުވެ ގޮސް އެ ސަރަހައްދުގައި ހުރި މަގުބައްތި ހޮޅިދަނޑީގައި ޖެހި އެކްސިޑެންޓުވެފައިވާ މައްސަލަ ރޭ 2:40 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.

އެނގިފައިވާ ގޮތުގައި ސައިކަލް ދުއްވަން އިން ކުއްޖާގެ ބޮލަށް ވަރަށް ބޮޑެތި ގެއްލުންތަކެއް ވަނީ ލިބިފައެވެ. އެ ކުއްޖާއަށް ފަރުވާ ދިނުމަށް ފުވައްމުލަކު ހޮސްޕިޓަލަށް ގެންދިޔައިރު ވެސް ހާލު ވަރަށް ސީރިއަސްއެވެ.