ސިނަމާލެ ބްރިޖު ހައިވޭ މަތިން މިރޭ ހިނގި އެކްސިޑެންޓެއްގައި ސައިކަލެއް ދުއްވަން އިން މީހަކަށް އަނިޔާވެ، އޭނާއަށް އައިޖީއެމް ހޮސްޕިޓަލުގައި ފަރުވާ ދޭން ފަށައިފިއެވެ.

ފުލުހުން ބުނި ގޮތުގައި، މި އެކްސިޑެންޓް ހިނގާފައި ވަނީ މިރޭ (31 އޮކްޓޯބަރު 2025) 18:48 ހާއިރުއެވެ.

Ad by Hajj Corporation

ފުލުހުން ދިން މައުލޫމާތުގައިވާ ގޮތުން، މި އެކްސިޑެންޓް ހިނގާފައި ވަނީ ހުޅުމާލެއިން މާލެއަށް ދަތުރުކުރި ސައިކަލެއް، ބްރިޖް ލައިޓަށް މަޑުކޮށްގެން އޮތް ޕިކަޕެއްގެ ފަހަތުގައި ޖެހިގެންނެވެ. ސައިކަލު ދުއްވި މީހާއަށް އޭނާ ދުއްވި އުޅަނދު ކޮންޓްރޯލް ނުކުރެވިގެން މިގޮތަށް ޖެހިފައިވާ ކަމަށް މައުލޫމާތު ލިބެއެވެ.

މި ހާދިސާގައި އަނިޔާވި މީހާއަކީ 57 އަހަރުގެ ދިވެހި ފިރިހެނެއް ކަމަށް ފުލުހުން ވަނީ ހާމަކޮށްފައެވެ. އޭނާގެ ބޯ ފަޅައިގެންގޮސް އަތަށް ވެސް އަނިޔާވެފައިވާ ކަމަށް ފުލުހުން ބުންޏެވެ. އަދި އޭނާއަށް މިހާރު އައިޖީއެމް ހޮސްޕިޓަލުގައި ދަނީ ފަރުވާ ދެމުންނެވެ.

މި އެކްސިޑެންޓާ ގުޅިގެން ފުލުހުން ދަނީ އިތުރަށް ބަލަމުންނެވެ.