ބާސެލޯނާގެ ސްޕޮޓިފައި ކެމްޕް ނޫ އަލުން ހުޅުވުމަށް ސިޓީ ކައުންސިލުން ރަސްމީކޮށް ހުއްދަ ދީފިއެވެ. މި ހުއްދައަކީ ސަލާމަތީ މިންގަނޑުތަކަށް ބަދަލު ގެނެސް ދޫކޮށްފައިވާ ހުއްދައެކެވެ.

މި ހުއްދައިގެ ދަށުން ސްޓޭޑިއަމް އަލުން ހުޅުވޭނީ މަރުހަލާތަކަކަށް ބަހާލައިގެންނެވެ. ފުރަތަމަ މަރުހަލާގައި 27،000 ސަޕޯޓަރުންނަށް ސްޓޭޑިއަމަށް ވަދެވޭނެއެވެ. މިއީ ކުލަބުގެ ތާރީހީ ސްޓޭޑިއަމްއަށް އަނބުރާ ވަނުމަށް އެޅުނު މުހިންމު ފިޔަވަޅެކެވެ.

Ad by Hajj Corporation

މިހާރު ކުލަބުން ޕްލޭންކުރެވިފައިވާގޮތުން ސެޕްޓެމްބަރު 14 ގައި ވެލެންސިއާއާ ދެކޮޅަށް ކުޅޭ މެޗު ކުޅެންހަމަޖެހިފައިވަނީ ކޭމްޕް ނޫގައެވެ. އެތާރީޚަށް 30،000 މީހުންނަށް ސްޓޭޑިއަމަށް ވަދެވޭނެއެވެ. އަދި ކުރިއަށް އޮތް މަސްތަކުގައި އިތުރު ސްޓޭންޑްތައް ހުޅުވުމާއެކު މި އަދަދު 45،000 އަށް އިތުރުވެ، އަހަރު ނިމޭއިރު 62،000 މީހުންގެ ޖާގައަށް އިތުރުވާނެ ކަމަށް ބެލެވެއެވެ.

އޯގަސްޓް 18 އާއި 24 އާ ދެމެދު، 2025-26 ސީޒަން އެކުގައި ކެމްޕް ނޫގައި ކުޅުމަށް ބާސެލޯނާއިން ސިޓީ ކައުންސިލް، ލަ ލީގާ އަދި ޔުއެފާއަށް ރަސްމީކޮށް އަންގާނެއެވެ. މިކަމާ ގުޅޭ ގޮތުން ކަމާބެހޭ ފަރާތްތަކުން 2-3 ހަފްތާގެ ތެރޭގައި ޖަވާބު ދޭނެ ކަމަށް ބެލެވެއެވެ.

1.5 ބިލިއަން ޔޫރޯގެ އަގުހުރި މަރާމާތުގެ މަސައްކަތްތަކާ ގުޅިގެން 2023 ގެ މޭ މަހުން ފެށިގެން ކެމްޕް ނޫ ވަނީ ބަންދުކުރެވިފައެވެ. އަދި އޯގަސްޓް މަހު ޖުއާން ގަމްޕަރ ޓްރޮފީ މި ސްޓޭޑިއަމްގައި ބޭއްވުމަށް ކުލަބުން އުންމީދުކޮށްފައިވެއެވެ.