އެމްޑީޕީގެ ހަރުގެއަށް ގެއްލުންދިން މީހާގެ ބަންދަށް 30 ދުވަސް ޖަހައިފިއެވެ.

މި މައްސަލާގައި ހައްޔަރުކޮށްފައިވަނީ، މ. ސްޓާ، މުހައްމަދު ރަޒީން (49އ) އެވެ.

މާލެ ޗާންދަނީ މަގުގައި ހުންނަ އެމްޑީޕީ ހަރުގެ ދޮރަށް ގެއްލުން ދިން މައްސަލަ ފުލުހުންނަށް ރިޕޯޓް ކޮށްފައިވަނީ އޮގަސްޓް 1 ވަނަ ދުވަހުގެ ރޭ 01:30 އެހާކަންހާއިރުއެވެ.

މި މައްސަލާފައި ހައްޔަރުކުރި ރަޒީންއަކީ މީގެކުރިންވެސް އެކި މައްސަލަތަކުގައި ހައްޔަރުކޮށްފައިވާ މީހެކެވެ. އެގޮތުން ކެފޭއެއްގައި ހުރި ރެކެއްގެ ބިއްލޫރިގަނޑު ތަޅާލި މައްސަލާފައި މިދިޔަ އޭޕްރިލް މަހުވެސް އޭނަ ހައްޔަރުކުރިއެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.