ކާބޯތަކެތީގެ އަގު މީގެ ކުރިން ދުވަހަކުވެސް އުފުލިގެން ނުދާ މިންވަރަށް އުފުލިފައިވާ ކަމަށް ބުނެ އެމްޑީޕީން ފަތުރަމުންދަނީ ބުހުތާން ދޮގު ސިޔާސީ ވާހަކަތަކެއް ކަމަށް ވިލިމާލެ ދާއިރާގެ މެންބަރު އަދި ޕީއެންސީގެ ޕީޖީ ގްރޫޕްގެ ޑެޕިއުޓީ ލީޑަރު މުޙައްމަދު އިސްމާޢީލް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި މުޙައްމަދު އިސްމާޢީލް ވިދާޅުވެފައިވަނީ، ފެހި ޤާނޫނުއަސާސީގެ ދަށުން އުފެދުނު ޑިމޮކްރަސީގެ ވެރިކަންތަކުގައި ދިވެހިރާއްޖެއަށާއި ދިވެހި ރައްޔިތުންނަށް ހުރިހާ ނަޒަރިއްޔާތަކުން ވެސް އެންމެ އަނިޔާވެރި އަދި އެންމެ ދަތި ދުވަސްތަކެއް ކުރިމަތިކޮށްފައިވަނީ 2008 އިން 2013 އަށް ހިންގި އެމްޑީޕީގެ ރައީސް މުޙައްމަދު ނަޝީދުގެ ވެރިކަމުގައާއި 2018 އިން 2023 އަށް ހިންގި ރައީސް އިބްރާހީމް މުހައްމަދު ސޯލިހުގެ ވެރިކަމުގައި ކަމަށެވެ.

Ad by Hajj Corporation

"ތިމާމެން ބޭނުންވާ ސިޔާސީ މަންފާއެއް ހާސިލުކުރުމަށްޓަކައި ފިތުނަފަސާދައަށް މަގުފަހިވާގޮތަށް ސައްހަނޫން ދޮގު މަޢުލޫމާތު ފެތުރުމަކީ އިސްލާމީ ރިވެތި އުސޫލުތަކާ ޚިލާފު ދަށުދަރަޖައިގެ ހަޑިމުޑުދާރު ހުތުރު ޢަމަލެއް،" މުޙައްމަދު އިސްމާޢީލް ވިދާޅުވިއެވެ.

އެމްޑީޕީން ޒިންމާދާރުކަމާއެކު ސިޔާސީ މަސައްކަތް ކުރަން ދަސްކޮށް، ޒިންމާދާރު ސިޔާސީ ޕާޓީއެއްގެ ގޮތުގައި ރައްޔިތުންނަށް ނަމޫނާ ދައްކަން ޖެހޭ ކަމަށް މުޙައްމަދު އިސްމާޢީލް ވިދާޅުވިއެވެ.

ދޮގު ވިއްކައިގެން އަބަދަކު ރައްޔިތުންގެ ރުހުމެއް ނުހޯދޭނެ ކަމަށާއި، ދޮގު ވިއްކައިގެން އަބަދަކު ކާމިޔާބީއެއް ވެސް ނުހޯދޭނެކަން ދަންނަންވާނެ ކަމަށް ވެސް މުހައްމަދު ވަނީ ވިދާޅުވެފައެވެ.