ރިޔާސީ އިންތިހާބާއި ރައްޔިތުންގެ މަޖިލިހުގެ އިންތިހާބު އެއްކޮށްލުމާ ގުޅޭގޮތަށް ގާނޫނުއަސާސީ އަށް ހުށަހެޅި އިސްލާހާ ދެކޮޅު ހެދުމަށް އިދިކޮޅު މައި ޕާޓީ - އެމްޑީޕީގެ ގައުމީ މަޖިލީހުން ނިންމައިފިއެވެ.

ބުރާސްފަތިދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގައި، ގަލޮޅު އުތުރު ދާއިރާގެ މެމްބަރު މީކާއިލް އަހުމަދު ނަސީމް ވަނީ، ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ގަރާރެއް ހުށަހަޅުއްވައިފައެވެ. އެ ގަރާރުގައި ފާހަގަކުރެއްވި ބައެއް ނުކުތާ ތަކަކީ:

Ad by Hajj Corporation

• ރައްޔިތުންނާ ގުޅުން ހުރި މި ފަދަ މުހިއްމު ކަމެއްގައި އާއްމުގެ ހިޔާލު ނުވަތަ ބަސް ހޯދަން މަޝްވަރާކުރުމަކީ މުހިއްމު ކަމަކަށް ވިއަސް، ގާނޫނުއަސާސީ ބަދަލުކުރަން މަޖިލީހަށް ހުށަހެޅުމުގެ ކުރިން އެއްވެސް ވަރަކަށް މަޝްވަރާނުކުރުން.
• ގާނޫނުއަސާސީއަށް ބަދަލު ގެނައުމުގެ ބިލު ދިރާސާކުރުމާއި އެ ބިލާ މެދު މަޝްވަރާ ކުރަން އެކަށީގެންވާ ވަގުތާއި ފުރުސަތު ދިނުމުގެ ބަދަލުގައި އަވަސް އަރުވާލައިގެން ފާސްކުރަން މަސައްކަތްކޮށްފައިވާތީ ރަނގަޅު ނިޔަތެއް ނެތްކަން.
• ދެ އިންތިހާބު އެއްކޮށްލުމާ ގުޅޭ ވޯޓު ނަގަން ނިންމާފައިވަނީ ކައުންސިލް އިންތިހާބާއެކު ވިއަސް، ހިޔާލު ނެގުމުގެ ވޯޓަށް އެކަށީގެންވާ މުއްދަތެއް ނެތުން.

މިނުކުތާތައް ބަޔާންކުރައްވައި، މެމްބަރު މީކާއީލް ހުށަހެޅުއްވީ ދެ އިންތިހާބު އެއްކޮށްލުމާ މެދު ހިޔާލު ހޯދުމުގެ ވޯޓަށް އެމްޑީޕީގެ ގައުމީ މަޖިލިހުން ގޮތެއް ނިންމައިދިނުމަށެވެ.

އެ ހުށަހެޅުއްވި ގަރާރަށް އިސްލާހެއް ގެނެސް، ހިޔާލު ހޯދުމުގެ ވޯޓަށް ދެކޮޅު ހެދުމަށް ގައުމީ މަޖިލީހުގެ ބައްދަލުވުމުގައި ބައިވެރިވި 48 މެމްބަރުންގެ އިއްތިފާގުން ފާސްކުރިއެވެ.

އޭގެ އިތުރުން، މަކުނުދޫ ދާއިރާގެ ކުރީގެ މެމްބަރު މުހަައްމަދު ރާއީ ހުށަހެޅުއްވި ގަރާރު ވެސް، ހުރިހާ މެމްބަރުންގެ އިއްތިފާގުން ވަނީ ފާސްކޮށްފައެވެ. 

ރާއީ ހުށަހެޅުއްވީ ދެ އިންތިހާބު އެއްކޮށްލުމާ ގުޅޭގޮތުން މަގުމަތީގެ ހަރަކާތްތައް ފެށުމާ މެދު ޕާޓީގެ ގޮތެއް ނިންމުމަށެވެ. 

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި ގާނޫނުއަސާސީ އަށް އިސްލާހު ގެނައުމުގެ ކުރިން، ރައްޔިތުންގެ ފެންނަ ނުފެންނަ ވޯޓެއް ނަގަން ބާއްވާ އިންތިހާބު ވެސް އަންނަ އޭޕްރީލް ހަތަރުވަނަ ދުވަހު ބާއްވަން އިލެކްޝަންސް ކޮމިޝަނުން މިހާރު ވަނީ އިއުލާން ކޮށްފައެވެ. 

އެ ރިފަރެންޑަމް ބާއްވަނީ މި ފަހަރުގެ ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްްކަތްކުރާ ކޮމިޓީތަކުގެ އިންތިހާބާ އެކުގައެވެ.