ނ. މަގޫދޫ ކައުންސިލުގެ މެޖޯރިޓީ ފުރަތަމަ ފަހަރަށް އިދިކޮޅު - އެމްޑީޕީއަށް ގެއްލިއްޖެއެވެ.

ދިވެހިރާއްޖޭގައި ފުރަތަމަ ބޭއްވުނު ލޯކަލް ކައުންސިލް އިންތިހާބުން ފެށިގެން މިހާތަނަށް މަގޫދޫ ކައުންސިލުގެ މެޖޯރިޓީ ދަމަހައްޓަމުން އައީ އެމްޑީޕީއިންނެވެ.

Ad by Hajj Corporation

ނަމަވެސް އެކަން ބަދަލުކޮށްލާ ހޮނިހިރު ބޭއްވި ލޯކަލް ކައުންސިލް އިންތިހާބުގައި ޕީއެންސީ ވަނީ ކައުންސިލުގެ މެޖޯރިޓީ އަތުލައި ސިޔާސީ ކުލަ ބަދަލުކޮށްލާފައެވެ. މިއީ މަގޫދޫ ކައުންސިލުގެ މެޖޯރިޓީ އެމްޑީޕީއަށް ގެއްލުނު ފުރަތަމަ ފަހަރުކަން މިހާރުގެ ވަގުތީ ނަތީޖާއަށް ބަލާއިރު ކަށަވަރެވެ.

50.57 އިންސައްތައާއެކު ކައުންސިލް މެންބަރުގެ ގޮނޑި ކާމިޔާބު ކުރައްވާފައިވަނީ ޕީއެންސީގެ ކެންޑިޑޭޓު އަޤީލް ހުސައިންއެވެ. އަދި 52.63 އިންސައްތައާއެކު ކައުންސިލް އަންހެން މެންބަރުގެ ގޮނޑި ވަނީ ޕީއެންސީގެ މެންބަރު ފާތިމަތު މާޝާ އަބްދުﷲ ކާމިޔާބު ކުރައްވާފައެވެ.

ނަމަވެސް މި ހިނގަމުންދާ ދައުރެކޭ އެއްފަދައިން ކައުންސިލު ރައީސްގެ ގޮނޑި ކާމިޔާބު ކުރައްވާފައި ވަނީ އެމްޑީޕީގެ ކެންޑިޑޭޓެވެ. އެގޮތުން އެމްޑީޕީގެ ކެންޑިޑޭޓު އަބްދުﷲ ޚާލިދު މި ގޮނޑި ކާމިޔާބު ކުރައްވާފައި ވަނީ 51.92 އިންސައްތަ ވޯޓާ އެކުގައެވެ.

ލާމަރުކަޒީ ގާނޫނުގެ ދަށުން ދިވެހި ރާއްޖޭގައި ފުރަތަމަ ބޭއްވުނު ލޯކަލް ކައުންސިލް އިންތިހާބުން ފެށިން މިހާތަނަށް މަގޫދޫ ކައުންސިލު ރައީސްގެ ގޮނޑި ދިފާއު ކުރަމުން އަައީ އެމްޑީޕީއިންނެވެ.