މާލޭގެ މަގުތަކުގެ ތަރައްގީއާއި އުމްރާނީ ކުރިއެރުމަށް ބަލާއިރު، ފެންނަން އޮތީ ދެ ފިކުރެއްގެ ދެމެދުގައި އޮތް ބޮޑު ތަފާތެކެވެ. އެއް ފަރާތުން ފެންނަނީ ރޭވުންތެރިކަމާއެކު ހަލުވި ދުވެލީގައި މަސައްކަތް ނިންމާ ގާބިލު ވެރިކަމެކެވެ. އަނެއް ފަރާތުން ފެންނަނީ ފަސް އަހަރުގެ ދައުރެއް ނިމިގެން ދިޔައިރުވެސް، އެންމެ މަގެއްގެ މަސައްކަތް ފުރިހަމައަށް ނިންމާނުލެވުނު ނާގާބިލު މަންޒަރެކެވެ.

ތަރައްގީގެ މޭސްތިރިޔާގެ ކާމިޔާބީތައް

Ad by Hajj Corporation

ޕީޕީއެމްގެ ވެރިކަމުގައި، އޭރުގެ ހައުސިން މިނިސްޓަރު އަދި މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ބެއްލެވުމުގެ ދަށުން މާލެއަށް އައި ތަރައްގީއަކީ ފެންނަން އޮތް ހަގީގަތެކެވެ. އަދި އެމަނިކުފާނުގެ މޭޔަރުކަމުގައި އެތައް ކުރިއެރުމެއް މާލެ އަށް ގެނެސްދެއްވިއެވެ. މާލޭގެ ދެކުނު ފަރާތާއި އިރުމަތީ ފަރާތުގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރެއްވުމާއި، ސިނަމާލެ ބުރިޖު ފަދަ ބިޔަ މަޝްރޫއުތައް ނިންމަވާލެއްވީ އެމަނިކުފާނުގެ މޭސްތިރިކަމުގައެވެ. މީގެ އިތުރުން މާލޭގެ އެތެރޭގެ ގިނަ މަގުތަކެއްގެ ހާލަތު ރަނގަޅުކޮށް، އާންމުންނަށް ފަސޭހަވާނެ ގޮތަށް ބަދަލުކުރެއްވީ އެއްވެސް ޝައްކެއް ނެތް ގާބިލުކަމާ އެކުގައެވެ.

އެމްޑީޕީގެ ނާގާބިލުކަމާއި އަމީނީ މަގު

އެމްޑީޕީގެ ފަސް އަހަރުގެ ވެރިކަމުގައި މާލެ ސަރަހައްދަށް އެދެވޭ އެއްވެސް ބޮޑު މަސައްކަތެއް ކުރެވިފައެއް ނުވެއެވެ. ކުރެވުނު ހަމައެކަނި މަސައްކަތަކީ އަމީނީ މަގު ހެދުމެވެ. ނަމަވެސް އެ މަސައްކަތް ވެސް ނިންމާލެވުނީ ފަސް އަހަރު ދުވަހުގެ ދިގު އިންތިޒާރަކަށް ފަހު، ރިޔާސީ އިންތިޚާބުގެ ވޯޓު ބޯމަތި ވަނިކޮށެވެ. އެންމެ މަގެއް ހެދުނުއިރު ވެސް އޮތީ ހަޑިހާވާފައެވެ. ރައްޔިތުންގެ ޓެކްސްފައިސާ އިސްރާފުކޮށްފައެވެ.

މީގެ މިސާލެއް ދެކިލަން ދެ މިނިޓަށް އިސްކަންދަރު ކޮއްޓާ ހިސާބުން ފެށިގެން ދިރާގާ ހަމައަށް ދުއްވާލަމާ ހިންގަވާށެވެ. ފެންނަނީ އަޑިގުޑަންތަކާއި، ރޫޅިފައިވާ ތަންތަނުގައި އަޅާފައިވާ ޕެޗުތަކެވެ. މިއީ ރައްޔިތުންގެ ޓެކްސް ފައިސާ އިސްރާފުކޮށް، ފެންވަރު ދަށްކޮށް ކުރި މަސައްކަތެއްގެ ދިރިހުރި މިސާލެކެވެ. މަގު ހަދާފައި އޮތީ އަމާ ބުނީތީ ފަރަށް ދާ އުސޫލުންނެވެ.

ނޫނެކޭ ބުނަންވީ ވަގުތު

މި ކުޑަ މިސާލުން ވެސް ބުނެ ދެނީ ބޮޑު ވާހަކައެކެވެ. އެމްޑީޕީގެ ކައުންސިލަރުންނަށް ނުވަތަ އެ ފިކުރަށް ވޯޓު ދިނުމަކީ މާލޭގެ ތަރައްގީއަށް އޮތް ހުރަހެއްކަމެވެ. ފަސް އަހަރުން އެންމެ މަގެއްވެސް ރަނގަޅަށް ހަދާނުލެވުނު ބަޔަކަށް މާލޭގެ މުސްތަގުބަލު ހަވާލުކުރުމަކީ ބުއްދިވެރި ކަމެއް ނޫނެވެ. ރައްޔިތުންގެ ތަކުލީފުތަކަށް އިޖާބަ ނުދެވޭ، ނާގާބިލު ވެރިންނަށް "ނޫނެކޭ" ބުނަންވީ މިހެންވެއެވެ. ތަރައްގީ ބޭނުންވާ ނަމަ އިޚްތިޔާރު ކުރަންވީ ނަތީޖާ ދައްކާފައިވާ ގާބިލު ޓީމެވެ.