އާސެނަލް މިޑްފީލްޑަރު ތޯމަސް ޕާޓޭ ލަލީގާގެ ޓީމެއްކަމަށްވާ ވިލަރެއާލް ގުޅުނު ކަމަށް އެ ކުލަބުން ވަނީ ރަސްމީކޮށް އިއުލާންކޮށްފައެވެ. އޭނާ ވަނީ އިތުރު އަހަރެއްގެ އޮޕްޝަނަކާއެކު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.

32 އަހަރުގެ ގާނާގެ މިޑްފީލްޑަރު މި އަހަރުގެ ޖޫން މަހުގައި އާސެނަލްގެ އެގްރީމަންޓްގެ މުއްދަތު ހަމަވުމުގެ ކުރިން ކުލަބުން ވަނީ އެގްރީމަންޓް އައުކުރުމަށް ހުށަހަޅާފައެވެ. ނަމަވެސް ދެފަރާތުން އެއްބަސްވުމަކަށް ނާދެވުމުން ޕާޓޭގެ ކޮންޓްރެކްޓް އައުކުރުމުގެ މަރުޙަލާ ވަނީ އޭރު ހުއްޓާލާފައެވެ.

Ad by Hajj Corporation

އާސެނަލްގައި 167 މެޗާއި އެޓްލެޓިކޯ މެޑްރިޑްގައި 188 މެޗު ކުޅެފައިވާ ޕާޓޭއަކީ ތަޖުރިބާކާރު ކުޅުންތެރިއެކެވެ. ޗެމްޕިއަންސް ލީގުގައި ކުޅުމުގެ ފުރުސަތު ލިބުމަކީ އޭނާ ވިލަރިއާލްއާ ގުޅުމަށް ނިންމުމުގައި މުހިންމު ދައުރެއް އަދާކުރި ކަމެއް ކަމަށް ބެލެވެއެވެ.

ނަމަވެސް، ޕާޓޭ ވިލަރިއާލްއާ ގުޅުމާ ގުޅިގެން ވަނީ ބޮޑު ފާޑުކިޔުންތަކެއް އަމާޒުވެފައެވެ. މިއީ ޖުލައި 4 ވަނަ ދުވަހު އޭނާގެ މައްޗަށް ފަސް ރޭޕް ކުށުގެ ދަޢުވާއާއި އެއް ޖިންސީ ފުރައްސާރައިގެ ދަޢުވާ އުފުލިފައިވެއެވެ. މިދަޢުވާތަކަށް ޕާޓޭ އިންކާރުކޮށްފައިވާއިރު، ކޯޓުން ވަނީ ބެއިލްގެ ދަށުން ދޫކޮށްލާފައެވެ. އޭނާގެ ދެން އޮތް ޝަރީއަތުގެ އަޑުއެހުން އޮތީ ސެޕްޓެމްބަރު 2 ވަނަ ދުވަހު އޯލްޑް ބެއިލީގައެވެ.