ނެދަލެންޑްސްގެ ޒުވާން ތަރި ޒަވީ ސިމޯންސް، ޓޮޓްނަމް ހޮޓްސްޕަރސްއަށް ބަދަލުވުމުގެ ކުރިން ބޭނުންވާ މެޑިކަލް ޓެސްޓްތައް ފުރިހަމަކޮށްފި އެވެ.

ޒަވީ މީގެ ކުރިން ޗެލްސީއާއެކު އެއްބަސްވުންތަކެއް ހެދި ނަމަވެސް ޓޮޓެންހަމްއިން ވާނި އޭނާ ކުލަބަށް ގެނައުން އަވަސްކުރުމަށް ހުށަހެޅުންތަކެއް ހުށަހަޅާފަ އެވެ. 2013 ވަނަ އަހަރު ވިލިއަން ޓޮޓްނަމްގައި މެޑިކަލް ހެދުމަށްފަހު ޗެލްސީއަށް ބަދަލުވި ގޮތް ތަކުރާރުވިޔަ ނުދިނުމަށް ސްޕަރސް ވަރަށް ބޮޑަށް ބޭނުންވެފައިވާ ކަމަށް ރިޕޯޓުތައް ބުނެ އެވެ.

Ad by Hajj Corporation

މި ސީޒަންގައި ސްޕަރސްއަށް މޯގަން ގިބްސް-ވައިޓްއާއި އެބެރެޗީ އެޒޭގެ ސޮއި ލިބިފައިނުވިނަމަވެސް ޒަވީ ކްލަބަށް ބަދަލުވުމުގެ ރަސްމީ ކަންކަން ފުރިހަމަ ކުރުމަށް ޓޮޓްނަމް ހޮޓްސްޕަރސް ވަނީ ތައްޔާރުވެފައެވެ. ސްޕަރސްއިން ޒަވިއަށް މި ހުށަހެޅުން ހުށަހެޅީ ބުރާސްފަތި ދުވަހު ކަމަށްވާއިރު، ވަރަށް އަވަހަށް ޒަވީ އެ ކުލަބަށް ބަދަލުވުމުގެ ކަންކަން ނިމޭނެކަމަށް މައުލޫމާތުލިބެއެވެ. ޕްރީ-ސީޒަންގައި އަނިޔާގެ މައްސަލަ ދިމާވެފައިވާ ޖޭމްސް މެޑިސަންގެ ބަދަލުގައި، ޒަވީއަށް ޓޮޓްނަމްގެ ނަންބަރު 10ގެ މަގާމު ލިބޭނެ ކަމަށްވެސް މިހާރުވަނީ ބެލެވެންފަށާފައެވެ.

އުމުރުން 22 އަހަރުގެ ޒަވީ ވަނީ ލައިޕްޒިގަށް ޖުމްލަ 78 މެޗު ކުޅެ، 22 ގޯލު ޖަހައި، 24 އެސިސްޓް ކާމިޔާބުކޮށްދީފައެވެ. އަދި ނެދަލެންޑްސްގެ ގައުމީ ޓީމަށް 28 މެޗު ކުޅެދީފައިވެއެވެެ.

ޒަވީ ކުލަބަށް ގެންދިއުމުގެ މަސައްކަތް އަވަސްކޮށްފިނަމަ މި ހަފްތާ ބަންދުގައި ބޯންމައުތާ ދެކޮޅަށް އަމިއްލަ ދަނޑުގައި ކުޅޭ ޕްރިމިއާ ލީގުގެ ފުރަތަމަ މެޗުން ޒަވީއަށް ފުރުސަތު ލިބިގެންދާނެ އެވެ.

ޒަވީ ސިމޯންސް ވެފައިވަނީ، ވޯލްޑް ކަޕްގެ ނޮކައުޓް މެޗެއްގައި ނެދަލެންޑްސް އަށް ކުޅުނު އެންމެ ޒުވާން ކުޅުންތެރިޔާ އަށެވެ.

ޒަވީ ސިމޯންސް، ފުރަތަމަ ފަހަރަށް ނެދަލެންޑްސް ސީނިއާ ގައުމީ ޓީމުގައި ހިމެނީ، 2022 ވަނަ އަހަރުގެ ފީފާ ވޯލްޑް ކަޕާ ދިމާކޮށް، ނެދަލެންޑްސްގެ އޭރުގެ ކޯޗު ލުއީ ވެން ހާލް ނެގި ސްކޮޑުންނެވެ.

ޒަވީ ޓޮޓްނަމް ހޮޓްސްޕަރސް އަށް ބަދަލުވާން 60 މިލިއަން ޔޫރޯގެ އަގެއް ހުށަހަޅާފައިވާކަމަށް މައުލޫމާތުލިބެއެވެ.