އިނގިރޭސި ޕްރިމިއާ ލީގުގައި ރޭ ކްރޭވަން ކޮޓޭޖްގައި ކުޅުނު މެޗުން ފުލަމް އަތުން 2-1 އިން ބަލިވެ، ޓޮޓެންހަމް ހޮޓްސްޕާސްގެ ވަގުތީ ކޯޗު އީގޯ ޓޫޑޯއަށް ޖެހިޖެހިގެން ދެވަނަ ނާކާމިޔާބީއާ ކުރިމަތިލާން ޖެހިއްޖެއެވެ. މި ނަތީޖާއާއެކު ޓޮޓެންހަމް އޮތީ ރެލިގޭޝަން ޒޯނާ އެންމެ ހަތަރު ޕޮއިންޓް ގާތުގައެވެ. އެހެންކަމުން ޓޮޓްނަމް މިހާރުއޮތީ ރެލިގޭޓްވުމުގެ ބޮޑު ބިރުވެރިމަކަމެއްގެ ތެރޭގައެވެ.

މެޗުގެ ކުރީކޮޅު ފުލަމްއިން ވަނީ ލީޑު ނަގާފައެވެ. މެޗުގެ ހަތްވަނަ މިނެޓުގައި އޮސްކާ ބޮބް ނެގި ހުރަހެއް ޑިފެންޑަރެއްގެ ގައިގައި ޖެހިފައި ލިބުމުން، ހެރީ ވިލްސަން ވަނީ ވަރަށް ރީތި ވޮލީއަކުން ގޯލުގެ ތެރެއަށް ބޯޅަ ފޮނުވާލާފައެވެ. މި ގޯލު ޖެހުމުގެ ކުރިން ރައުލް ހިމެނޭޒް، ޓޮޓެންހަމްގެ ރާޑޫ ޑްރަގުސިންއަށް ފައުލް ކުރި ކަމަށް ބުނެ ޓޮޓެންހަމްގެ ކުޅުންތެރިން ޝަކުވާ ކުރި ނަމަވެސް، ވީއޭއާރުން ނިންމީ އެއީ ރަނގަޅު ގޯލެއް ކަމަށެވެ.

Ad by Hajj Corporation

ފުރަތަމަ ހާފު ނިމުމުގެ ކުރިން ފުލަމްއިން ވަނީ އެޓީމުގެ ދެވަނަ ލަނޑު ޖަހާފައެވެ. އަލެކްސް އިވޯބީ ދުރުން ފޮނުވާލި ބާރު ހަމަލާއެއް ގޯލުގެ ތިރީ ކަނަށް ވަދެގެން ދިޔައިރު، މިއީ އޭނާ ކާމިޔާބުކުރި ވަރަށް ފުރިހަމަ ލަނޑެކެވެ. މުޅި މެޗުގައިވެސް އިވޯބީގެ ފަރާތުން މޮޅު ކުޅުމެއް ފެނިގެންދިޔައިރު، އޭނާ ވަނީ ލަނޑު ޖެހުމުގެ އިތުރުން ހަތަރު ފުރުސަތު ތަނަވަސްކޮށްދީފައެވެ.

ދެވަނަ ހާފުގައި ޓޮޓެންހަމްއިން ބަދަލުތަކެއް ގެނެސް ކުޅުން ރަނގަޅު ކުރިއެވެ. އެގޮތުން ބަދަލު ކުޅުންތެރިއެއްގެ ގޮތުގައި ކުޅެން އެރި ރިޗާލިސަން ވަނީ އާޗީ ގްރޭ ނަގައިދިން ހުރަހަކުން ބޮލުން ގޯލެއް ޖަހައި ފަރަގު ކުޑަކޮށްދީފައެވެ. ނަމަވެސް މެޗުގެ ފަހު ވަގުތުކޮޅު ޕަޕޭ މަޓާ ސާރ ފޮނުވާލި ހަމަލާ ގޯލާ އަމާޒުނުވުމުން، ޓޮޓެންހަމްއަށް މެޗު އެއްވަރުކުރެވޭ ގޮތެއް ނުވިއެވެ.

މި ބައްޔާއެކު ޓޮޓެންހަމްއިން ވަނީ ލީގުގައި އެންމެ ފަހުން ކުޅުނު 10 މެޗުންވެސް މޮޅެއް ނުވެ، އެޓީމުގެ ތާރީޚުގައި 1994 ވަނަ އަހަރު ހެދި ގޯސް ރެކޯޑާ އަރާ ހަމަކޮށްފައެވެ. އަނެއްކޮޅުން ފުލަމްއަށް މިއީ މި ސީޒަނުގައި ޓޮޓެންހަމްގެ މައްޗަށް ހޯދި ދެވަނަ މޮޅެވެ. މިއީ 2003-04 ވަނަ ސީޒަނަށްފަހު ފުލަމްއިން ޓޮޓެންހަމް އަތުން ލީގު ދެ މެޗުންވެސް މޮޅުވި ފުރަތަމަ ފަހަރެވެ.