މެންޗެސްޓަރ ޔުނައިޓެޑްގެ ސަޕޯޓަރުން، ބްރައިޓަންގެ މިޑްފީލްޑަރ ކާލޯސް ބަލޭބާ ގެނައުމަށް ގޯފަންޑްމީ މެދުވެރިކޮށް ފައިސާ އެއްކުރަން ފަށައިފިއެވެ. މިކަން ކުރަން މި ޖެހުނީ ކުލަބުގެ މާލީ ހާލަތު ދަށްވެފައިވާ ދަނޑިވަޅެއްގައި ބަލޭބާ ގެ އަގު މަތިވުމާއިގުޅިގެންނެވެ.

މެދުތުރެއަށް ކުޅެ މިކުޅުންތެރިޔާގެ ސޮއި ހޯދުމަށް ޔުނައިޓެޑުން އިއްޔެ ރަސްމީކޮށް ހުށަހަޅާފައިވާއިރު، ބްރައިޓަން އާއި ވާހަކަ ދައްކަން ފެށުމަށް ވެސް 87 މިލިއަން ޕައުންޑް ބޭނުންވާ ކަމަށް ކެމަރޫނުގެ މީޑިއާތަކުން ރިޕޯޓު ކޮށްފައިވެއެވެ. އަދި ބަލޭބާގެ އަގު 100 މިލިއަން ޕައުންޑަށް އަރާފާނެ ކަމަށް ވެސް ލަފާކުރެވެއެވެ. 21 އަހަރުގެ މި ކުޅުންތެރިޔާގެ އެއްބަސްވުމުގައި އަދި ތިން އަހަރު ބާކީ އޮތުމަކީ އޭނާގެ އަގު މައްޗަށް ދިއުމަށް މެދުވެރިވި އެއް ސަބަބެވެ.

Ad by Hajj Corporation

ޔުނައިޓެޑްގެ ސަޕޯޓަރ އިއާން އެމް ގޯފަޑްމީގައި ހުޅުވާލި ފަންޑުފޮށީގެ ލަނޑުދަނޑިއަކީ 120 މިލިއަން ޕައުންޑް އެއްކުރުމެވެ. "އަޅުގަނޑުމެންނަށް މިކަން ވާން ޖެހޭ، އަޅުގަނޑުމެންނަށް މިކަން ވާން ޖެހޭ" މިހެން ތަކުރާރުކޮށް ލިޔެފައިވާ އިބާރާތަކާއެކު ބަލޭބާގެ ފޮޓޯއެއް ވެސް ހިމަނާފައިވެއެވެ.

މިދިޔަ ސީޒަންގައި ބަލޭބާ ވަނީ ޕްރިމިއަރ ލީގުގެ 34 މެޗެއްގައި ކުޅެ، ތިން ލަނޑު ޖަހާފައެވެ. ދި އެތްލެޓިކްގެ ރިޕޯޓެއްގައި ބުނެފައިވާ ގޮތުން ޔުނައިޓެޑުން ވަނީ ބަލޭބާއަށް ޝައުގުވެރިކަން ފާޅުކޮށްފައެވެ. ނަމަވެސް މަތިއުސް ކުންޔާ އާއި ބްރަޔަން އެމްބިއުމޯ އަދި ސެސްކޯ ގެނައުމަށް 200މިލިއަން ޕައުންޑް ހޭދަކުރުމަށްފަހު، ކުލަބުގެ މާލީ ހާލަތު މިހާރު އެވަރުގެ ބޮޑު އަދަދެއް ހޭދަކުރާކަށް ތަނެއް ނުދެއެވެ.

ބަލޭބާ ގެނައުމަށް ޔުނައިޓެޑުގެ ސަޕޯޓަރުން މި ކުރާ މަސައްކަތަކީ ކުލަބުގެ މެނޭޖްމަންޓުން ރަސްމީކޮށް ތާއީދުކުރާ ކަމެއް ނޫނެވެ. އަދި މި ފަންޑުފޮށި މެދުވެރިކޮށް އެއްކުރެވޭ ފައިސާ ބަލޭބާގެ ޓްރާންސްފަރ ފީ އަށް ބޭނުންކުރެވޭނެ ކަމާމެދު ވެސް ސުވާލު އުފެދެއެވެ.