މަސްވެރިކަމަށް މަޝްހޫރު ގްރިމްސްބީ ޓައުންގެ ފުޓްބޯޅަ ޓީމެެއް ކަމަށްވާ ގްރިމްސްބީ ޓައުން އެފްސީއިން މެންޗެސްޓަރ ޔުނައިޓެޑް ލީގު ކަޕުގެ ހަތަރުވަނަ ރައުންޑުން ބަލިކޮށް މުބާރާތުން ބޭރުކޮށްފިއެވެ. ގްރިމްސްބީ ޓައުން އަކީ އިނގިރޭސި ހަތަރުވަނަ ޑިވިޝަނުގެ ޓީމެކެވެ.

މި ޓްރާންސްފާ ވިންޑޯގައި 214 މިލިޔަން ޕައުންޑްއަށްވުރެ ބޮޑު ޚަރަދެއް ކޮށްގެން އައުސީޒަނާއި ކުރިމަތިލި ޔުނައިޓެޑް ރޭގައި ބަލިވެފައިވަނީ ޕެނަލްޓީ ޖަހައިގެންނެވެ. 9000 މީހުންގެ ޖާގައިގެ ސްޓޭޑިއަމްގައ ކުޅުނު މިމެޗުގައި ފުރަތަމަ ހާފު ނިމުމުގެ ކުރީން ގްރިމްސްބީ ޓައުން އިން ވަނީ 2 ގޯލުގެ ލީޑެއް ނަގާފައެވެ. އަދި ދެވަނަ ހާފުފެށިގެން ގެނައި ބަދަލުތަކާއެކު ޔުނައިޓެޑް ގެ ބަދަލު ކުޅުންތެރިއެއްގެ ގޮތުގައި ކުޅެން ނިކުތް އެމްބޫމޯ 75 ވަނަ މިނެޓުގައި ގޯލުޖަހާފައިވާއިރު، މެޗު ނިމޭން ކުޑަތަންވެފައިވަނިކޮށް ޑިފެންޑަރ މެގުއަރ ވަނީ ގޯލުޖަހައި ނަތީޖާ ހަމަހަމަކޮށްފައެވެ.

Ad by Hajj Corporation

މިއާއެކު ނަތީޖާ ނެރެންޖެހުނީ ޕެނަލްޓީ ޖަހައިގެންނެވެ. ޕެނަލްޓީގައިވެސް ޖުމްލަ ކޮންމެ ޓީމަކުން 12 ކުޅުންތެރިޔަކު ޕެނަލްޓީ ޖަހާފައިވެއެވެ. ގްރިމްސްބީ މޮޅުވީ ޔުނައިޓެޑްގެ 12 ވަނަ ޕެނަލްޓީ ޖެހި އެމްބޫމޯ ޕެނަލްޓީ މިސްކޮށްލުމާއެކުގައެވެ.

މި ނަތީޖާއަކީ ފަހުގެ ތާރީޚެއްގައި ޔުނައިޓެޑް ހޯދު އެންމެ ލަދުވެތި ނަތީޖާއަށްވާއިރު، މީގެ ކުރިން 2014 ވަނަ އަހަރުގައި ޔުނައިޓެޑް ވަނީ ތިންވަނަ ޑިވިޝަންގެ އެމްކޭ ޑޮންސް އަތުން 4-0 އިން ބަލިވެފައެވެ. ނަމަވެސް މިނަތީޖާއަކީ އެޔަށްވުރެވެސް ލަދުވެތި ނަތީޖާއެކެވެ. މިދިޔަ އަހަރުގެ ނޮވެމްބަރުގައި އަމޮރިމް ޓީމު ހަވާލުވިފަހުން 44 މެޗުން ކާމިޔާބުކުރެވިފައިވަނީ 16 މެޗެވެ. އަދި މި ސީޒަންގެ ފުރަތަމަ ތިން މެޗުންވެސް ކާމިޔާބީއެއް ހޯދިފައެއް ނުވެއެވެ. އެހެންކަމުން ޔުނައިޓެޑްގެ ކޯޗުކަމުން އަމޮރިމް ވަކިކުރުމަށް މިހާރު ސަޕޯޓަރުން ކުރަމުން އަންނަ ޕްރެޝަރު އަންނަނީ އާދަޔާ ޚިލާފަށް ބޮޑުވަމުންނެވެ.