ޔޫރަޕުގެ މުބާރާތްތަކުގެ ތާރީޚުގައި މެންޗެސްޓާ ޔުނައިޓެޑް ދުށް އެންމެ ލަދުވެތި އެއް ރޭގައި، އިޓަލީގެ ކޯމޯ އަތުން 4-1 އިން ބަލިވެ ކޯޗު މައިކަލް ކެރިކަށް އޮތް ޕްރެޝަރު އިތުރަށް ބޮޑުވެއްޖެއެވެ. މި ނަތީޖާއާއެކު ޔުނައިޓެޑް ވެގެން ގޮސްފައިވަނީ ޔޫރަޕުގެ މުހިންމު މުބާރާތެއްގައި ޖެހިޖެހިގެން ދެ މެޗުގެ ފުރަތަމަ ދެ މިނެޓު ތެރޭގައި ލަނޑު ވަން ފުރަތަމަ އިނގިރޭސި ޓީމަށެވެ.

މެޗު ފެށިގެން 118 ސިކުންތުގެ ތެރޭގައި ކޯމޯއަށް ލީޑު ނަގައިދިނީ އާޖެންޓީނާގެ ޕްލޭމޭކަރު ނިކޯ ޕާޒްއެވެ. އޭނާ ވަނީ މި މެޗުގައި ދެ ލަނޑު ޖެހުމުގެ އިތުރުން ޓަސޮސް ޑޫވިކަސް ޖެހި ލަނޑު ކާމިޔާބުކުރަން ފުރުސަތު ތަނަވަސްކޮށްދީފައެވެ. ކޯމޯގެ ހަތަރުވަނަ ލަނޑު ބޮލުން ޖަހައި ކާމިޔާބުކުރީ ޔަކޯބޯ ރާމޯންއެވެ.

Ad by Hajj Corporation

މެޗުގެ އިތުރު ވަގުތުގައި ޔުނައިޓެޑްގެ ހަމައެކަނި ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޖޯޝުއާ ޒާކްޒީއެވެ. ނަމަވެސް އެ ލަނޑުން ޓީމުގެ މާޔޫސްކަމަށް އެއްވެސް ލުޔެއް ނުލިބުނެވެ. މެޗު ނިމުމުން ކެރިކް ވަނީ ސަޕޯޓަރުންގެ ކިބައިން މައާފަށް އެދި ދެއަތް އުފުލައިފައެވެ.