އިނގިރޭސި ޕްރިމިއާ ލީގުގައި ރޭ ލީޑްސް ޔުނައިޓެޑާ ދެކޮޅަށް ކުޅުނު މެޗު 1-1 އިން އެއްވަރުވެ، ހުރިހާ މުބާރާތެއްގައި ވެސް މޮޅެއް ނުލިބި މެންޗެސްޓަރ ޔުނައިޓެޑުން ހަ މެޗު ހަމަކޮށްފިއެވެ. މި ނަތީޖާއާއެކު ކޯޗު މައިކަލް ކެރިކަށް އޮތް ޕްރެޝަރު އިތުރަށް ބޮޑުވެފައިވާއިރު، ޕްރިމިއާ ލީގުގައި ވެސް މޮޅެއް ނުލިބި ޔުނައިޓެޑުން މިވަނީ ފަސް މެޗު ފުރިހަމަކޮށްފައެވެ. ސެޕްޓެމްބަރު މަހު ޗެމްޕިއަންސް ލީގުގައި ސަބާހް ބަލިކުރި ފަހުން އެ ޓީމަށް އަދި މޮޅެއް ހޯދިފައެއް ނުވެއެވެ.

އެލަންޑް ރޯޑްގައި ކުޅުނު މި މެޗުގެ 35 ވަނަ މިނެޓުގައި ޔޫރީ ޓީލެމަންސް ދިން ބޯޅައަކުން ޔުނައިޓެޑަށް ލީޑު ނަގައިދިނީ ބްރަޔަން އެމްބުއޭމޯއެވެ. ނަމަވެސް، ދެވަނަ ހާފު ފެށިގެން ހަވަނަ މިނެޓުގައި ޑޮމިނިކް ކަލްވަޓް-ލެވިން ވަނީ ލީޑްސްއަށް ނަތީޖާ ހަމަހަމަކޮށްދީފައެވެ. ކަލްވަޓް-ލެވިން މި ލަނޑު ޖެހީ އެންޓޮން ސްޓަކް ނެގި ކޯނަރަކުން ތާރިކް މުހަރެމޯވިޗް ފޮނުވާލި ބޯޅަ ގޯލުގެ ތެރެއަށް ވައްދާލައިގެންނެވެ.

Ad by Hajj Corporation

ދެވަނަ ހާފުގައި މެޗު ކާމިޔާބުކުރަން އެންމެ ރަނގަޅު ފުރުސަތުތަކެއް ތަނަވަސްކުރީ ލީޑްސް އިންނެވެ. ޚާއްސަކޮށް ސްޓަކް އަދި ލޫކަސް ނެމެޗާއަށް ލިބުނު ފުރުސަތުތައް ފާހަގަކޮށްލެވުނުއިރު، މެޗުގެ ފަހުވަގުތު ޔުނައިޓެޑުގެ ޑިފެންސަށް ބޮޑު ބާރުބޮޑުވުމަކާ ކުރިމަތިލާން ޖެހުނެވެ. މި ނަތީޖާއާއެކު އެމްބުއޭމޯ ލީޑު ނަގައިދިން ފަހު ތިން މެޗުން ވެސް ޔުނައިޓެޑް މިވަނީ އެއްވަރުވެފައެވެ.