އުމުރުން 32 އަހަރުގެ މޮރާޓާ 15 އަހަރުތެރޭގައި އޭނާގެ 10 ވަނަ ޓްރާންސްފާގައި އައު ކުލަބަކަށް ކުޅެން އެއްބަސްވެއްޖެއެވެ. އެގޮތުން ސްޕެއިންގެ ތަޖުރިބާކާރު ސްޓްރައިކަރު މޮރާޓާ މިހާރު ތައްޔާރުވަމުން ގެންދަނީ އިޓަލީގެ ކޯމޯއަށެވެ.

މިވަގުތު މޮރާޓާ އޭސީ މިލާނުގެ ލޯނެއްގެ ދަށުން ތުރުކިޔޭގެ ގަލަޓަސަރާއީ އަށް ކުލެމުން އަންނައިރު، ގަލަޓަސަރޭއިން ވަނީ އޭނާގެ ލޯނު އެއްބަސްވުން ނިމުމަކަށް ގެނައުމަށް ކޯމޯއިން ހުށަހެޅި 5 މިލިއަން ޔޫރޯގެ ފައިސާ ބަލައިގަންނަށް އެއްބަސްވެފައެވެ. މިލޯނު އެއްބަސްވުމުގެ ދަށުން އަދި 2026 ވަނަ އަހަރުގެ ޖޫން މަހުގައި 10 މިލިއަން ޔޫރޯއަށް ދާއިމީކޮށް ގަތުމުގެ މަޖުބޫރު މާއްދާއެއް ހިމެނިފައިވެއެވެ.

Ad by Hajj Corporation

2024/25 ގެ ސީޒަންގައި ގަލަޓަސަރޭއަށް ކުޅެ 16 މެޗުން 7 ލަނޑު ޖަހާފައިވާ މޮރާޓާ، ސީރީ އޭއަށް އެނބުރި ދިއުމަށް ނިންމީ 2026 ވަނަ އަހަރުގެ ވޯލްޑް ކަޕަށް ހޮވުމުގެ ފުރުސަތު އިތުރުކުރުމަށް ކަމަށް ބެލެވެއެވެ.

ރެއާލް މެޑްރިޑްގެ ޔޫތު އެކަޑެމީއިން ކެރިއަރުފެށި މޮރާޓާއަކީ މިހާރު ދުނިޔޭގެ ފުޓްބޯޅައިގެ އެންމެ މަތީ ފަންތީގެ އެންމެ ގިނަ ކުލަބުތަކަށް ބަދަލުވުމުގެ ރެކޯޑް އޮތް ކުޅުންތެރިޔާއެވެ. އޭނާ މީގެކުރިން ކުލެފައިވާ ކުލަބުތަކުގެ ތެރޭގައި ރެއާލް މެޑްރިޑް އާއި ޗެލްސީ އާއި އެތްލެޓިކޯ މެޑްރިޑް އާއި އޭސީ މިލާނާއި ޔުވެންޓަސް އާއި ގަލަޓަސަރާއީ ހިމެނެއެވެ. މީގެ ތެރެއިން ރެއާލް މެޑްރިޑް އަދި ޔުވެންޓަސް އަށް މޮރާޓާ ދެފަރަެއްގެމަތީން ކުޅެފައިވެއެވެ.