ބާސެލޯނާގެ ގޯލްކީޕަރު މާކް-އަންދްރޭ ޓަރ ސްޓެގެންގެ ކެޕްޓަންކަން އަތުލުމަށްފަހު 24 ގަޑިއިރު ނުވަނީސް އޭނާއާ ދެކޮޅަށް ނަގާފައިވާ ޑިސިޕްލިނަރީ ފިޔަވަޅުތައް ބާތިލްކޮށް، އަނބުރާ ކެޕްޓަންކަން ހަވާލުކޮށްފިއެވެ.

ޖުލައި މަހު ބުރަކަށީގެ އޮޕަރޭޝަނަކާ ގުޅިގެން އުފެދުނު ޚިލާފަކާ ހުރެ ބުރާސްފަތި ދުވަހު ޖަރުމަނު ގޯލްކީޕަރުގެ ކެޕްޓަންކަން ވަނީ އަތުލާފައެވެ. ބާސެލޯނާއިން ބުނި ގޮތުގައި އޭނާގެ މެޑިކަލް ރިޕޯޓު ލަ ލީގާއާ ހިއްސާކުރުމަށް ހުއްދަ ދިނުމަށް އިންކާރުކުރި ކަމަށް ބެލެވެއެވެ.

Ad by Hajj Corporation

ނަމަވެސް މިހާރު ޓަރ ސްޓެގެން ވަނީ މެޑިކަލް ރިޕޯޓު ހިއްސާކުރުމުގެ ހުއްދަ ދީފައެވެ. އަދި މީޑިއާގައި ޝާއިއުކުރި ޕޯސްޓެއްގައި އޭނާ ބުނެފައިވަނީ ކްލަބުގެ މެނޭޖްމަންޓާއެކު މި މައްސަލަ ހައްލުކުރުމަށް ފުރިހަމައަށް އެއްބާރުލުން ދޭން ތައްޔާރަށް ހުރި ކަމަށެވެ.

"އަހަރެންގެ އިންޖަރީ މުއްދަތު އެހެން ކުޅުންތެރިން ރަޖިސްޓްރީކުރުމަށް ބޭނުންކުރާ ކަމަށް ދެކެވޭ ވާހަކައަކީ އިންސާފުވެރި އަދި ސައްހަ ވާހަކައެއް ނޫން." ޓަރ ސްޓެގެން ބުނެފައިވެއެވެ.

2014 ވަނަ އަހަރު ބޮރޫސިއާ މޮންޝެންގްލަޑްބާކުން ބާސެލޯނާއަށް ބަދަލުވި ފަހުން ޓަރ ސްޓެގެން ވަނީ 400 އަށް ވުރެ ގިނަ މެޗު ކުޅެފައެވެ. އޭނާއާއެކު ބާސެލޯނާއިން ޗެމްޕިއަންސް ލީގާއި ލަ ލީގާގެ 6 ޓައިޓަލް ހޯދާފައިވެއެވެ.